MATHAIA 12

Sabat thu

(Mk. 2:23-28; Lk. 6:1-5)

1Chûng lai chuan Isua chu sabat ni-in buhpui hmunahte a kal tlang a; zirtîrte chu an ril a ṭâm a, a vuite chu an thliak a, an ei ta a. #Exod. 20:10; Deut. 5:14; 23:25. 2Farisai-ten an hmuhin a hnênah, “En teh, i zirtîrten sabat nia tih thiang lo chu an tih hi,” an ti a. 3Ani erawh chuan an hnênah, “A ṭhiante nên an rilṭâm laia Davida thiltih kha in chhiar lo vem ni? #1 Samu. 21:1-6; Lev. 24:9. 4Pathian inah a lût a, amah leh a ṭhianten ei thian loh, puithiamte chauh ei thian, ‘chhang dah’ an ei thu kha? 5A nih leh sabat ni pawh ni se Tempula puithiam awmte chuan sabat an tihbawrhbân pawhin an thiang tho tih Dân bu-ah in chhiar lo vem ni? #Num. 28:9,10. 6Ka hrilh a che u, Tempul aia ropui zâwk hetah hian a awm. #Mt. 12:41,42; Lk. 11:31,32. 7‘Inthawina aiin khawngaihna ka duh e,’ tih hi engtihna nge lo hre tawh ula chuan, mi pawisawi lote chu thiam loh in chantîr lo tûr,#Hos. 6:6; Mt. 9:13. 8Mihring Fapa hi sabat Lalpa a ni si a,” a ti a.

Kut zeng tihdam

(Mk. 3:1-6; Lk. 6:6-11)

9Chuta ṭang chuan a kal a, sunagog-ah a va lût a. 10Ngai teh, kut zeng pakhat hi a lo awm a, Isua an hêk theih nân, “Sabat nia tihdam a thiang em?” tiin an zâwt a. 11Ani chuan an hnênah, “In zînga tu pawh hian, berâm pakhat nei ula, sabat niin khuarkhurumah tla ta sela, tu nge la chhuak lo vang che u? #Lk. 14:5. 12Berâm ai chuan mihring chu a va hlu zâwk êm! Chuvângin, sabat nia thil ṭha tih hi a thiang a ni,” a ti a. #Mt. 10:31. 13Tichuan, chu mi hnênah chuan, “I kut phar rawh,” a ti a. A han phar a, a kut lehlam angin a dam ta viah a.

14Chutichuan, Farisai-te chu an chhuak a, amah an tihboral theih dân tûr ngaihtuahin an inrâwn ta a. #Mk. 14:1; Jn. 7:30; 8:59; 11:53.

Pathian chhiahhlawh thlan

15Isuan chu chu a hriatin chuta ṭang chuan a kal hrang ta a. Mi tam takin amah an zui a, an za-in a lo tidam hlawm a. #Mk. 3:7-12; Lk. 6:17-19. 16Anni chu a chanchin puang lo tûrin a ti tlat a, 17zâwlnei Isaia hmanga a sawi kha a lo thlen theihna tûrin:

18“En teh, ka chhiahhlawh, ka thlan, ka duh tak, ka rilruin a lawm êm êma hi:

A chungah ka thlarau ka dah ang; tichuan, Jentail-te hnênah rorêlna thu a puang ang. #Isa. 42:1-4 (LXX).

19A hnial lo vang a, a au hek lo vang a, kawtthlêrah pawh tu man a aw an hre bawk lo vang.

20Hneh tûra rorêlna a tirh chhuah hma zawng

Luang sâwp a titliak fithla lo vang a,

Khâwnvâr de sêt sêt pawh a timit lo vang.

21Ama hmingah chuan Jentail-ten beiseina an nghat ang,” tih hi.

Isua leh Belzebula

(Mk. 3:20-30; Lk. 11:14-23)

22Chumi lai chuan ramhuai man mitdel ṭawngtheilo pakhat a hnênah an rawn hruai a; a lo tidam a; chutichuan, ṭawngtheilo chu a lo ṭawng thei a, a lo hmu thei ta a. #Mt. 9:32,33. 23Mipui zawng zawng chuan mak an ti hle a, “He mi hi Davida Fapa chu a ni dâwn lâwm ni?” an ti a. 24Farisai-te erawh chuan chu chu an hriatin, “He mi hian ramhuai lal Belzebula vâng lo chuan ramhuai a hnawt chhuak lo vang,” an ti a. #Mt. 9:34; 10:25.

25Isuan an ngaihtuahte chu a lo hria a, an hnênah, “Khawii ram pawh mahni indo chu an ṭiau ṭhîn; khawii khua pawh, chhûngkua pawh, mahni indo apiang an ding khawchhuak lo vang. 26Setana pawhin Setana vêk a hnawh chhuah chuan mahni indo a ni ang a, a ram chu engtin nge a din khawchhuah ang le? 27Keiin Belzebula vângin ramhuaite hnawt chhuak ni ila, in mite#12:27 fate tih a ni; ‘ramhuai hnawh chhuah thiamte’ tihna. khân tu vângin nge ramhuai an lo hnawh chhuah ṭhin ni? Tichuan, anni khân asin thiam loh chantîr zâwk dâwn che u. 28Pathian Thlarau vânga ramhuai hnawt chhuak ka nih si chuan in hnênah Pathian ram chu a lo thleng ta tihna a ni. 29A nih loh leh, miin mi chak chu a phuar hmasak zet loh chuan engtin nge a ina lûtin a sum a lâksak theih ang? A phuar hnuah erawh chuan a in chu a ramsak ang. 30Ka lama ṭang lo tawh phawt chuan mi do va, mi lâk khâwmpui lo chuan a tidarh a ni. #Mk. 9:40; Lk. 11:23.

31“Chuvâng chuan ka hrilh a che u, mite sualna zawng zawng leh Pathian pawi an sawi tinrêng te chu ngaihdam a ni ang. Thlarau pawi sawi erawh chu ngaihdam a ni ngai lo vang. #Lk. 12:10. 32Tu pawh, Mihring Fapa sawisêl chu ngaihdam an ni ang a, Thlarau Thianghlim sawichhia erawh chu, tûn dam chhûngah pawh, hun lo la thleng tûrah pawh ngaihdam a ni lo vang.

Thing leh a rah

(Lk. 6:43-45)

33“ ‘Thing ṭha chu a rah pawh a ṭha,’ in tih loh vêk leh, ‘thing chhia chu a rah pawh a chhia,’ ti ta law law che u, thing chu a rahah a hriat si a. #Mt. 7:20; Lk. 6:44. 34Rûl thlahte u, nangnin sual nei reng chungin engtin nge thu ṭha in sawi theih ang? Thinlunga liam khawpa khat hi a ni kâin a sawi chhuah ṭhin. #Mt. 3:7; 15:8; 23:33; Lk. 3:7; 6:45; Jak. 3:11,12. 35Mi ṭha chuan a ro bâwm ṭha ata thil ṭhate a phawrh chhuak ṭhîn. 36Ka hrilh a che u, miten thu lawilo an sawi apiang, chu thu chu rorêl ni-ah chuan an sawi fiah a la ṭûl ang. 37I thu chuan thiam a chantîr ang che a, i thu vêk chuan thiam loh a chantîr bawk dâwn che asin,” a ti a.

Chhinchhiahna thil mak an phût

(Mk. 8:11,12; Lk. 11:29-32)

38Chumi lai chuan Dân zirtîrtute leh Farisai-te zînga mi ṭhenkhatten an chhâng a, “Zirtîrtu, i hnên ata chhinchhiahna thil mak hmuh kan duh e,” an ti a.#Mt. 16:1,4; Mk. 8:1,12; Lk. 11:16. 39Ani chuan a chhâng a, “Tûnlai mi, sual tak leh uire hmang takte hian, chhinchhiahna thil mak an zawng a; nimahsela, zâwlnei Jona chhinchhiahna chauh lo chu chhinchhiahna thil mak rêng entîr an ni lo vang. 40Jona chu ni thum leh zan thum nghapui kawchhûngah a awm ang khân Mihring Fapa hi ni thum leh zan thum lei chhûngah a awm bawk dâwn a ni. #Jon. 1:17; 2 Chr. 9:1-12. 41Ninevi mite chu rorêlna ni-ah chuan tûnlai mite nên hian an ding za ang a, thiam loh an chantîr ang; Jona thu hril avângin an sim si a; ngai teh u, Jona aia ropui zâwk hetah hian a awm asin. 42Chhim lam lalnu kha rorêl ni-ah chuan tûnlai mite rual hian a tho ve ang a, thiam loh a chantîr ang; Solomona finna ngaithla tûr mahin kâwlkil ata a lo kal si a; ngai teh u, Solomona aia ropui zâwk hetah hian a awm a ni. #2 Pet. 2:20.

Thlarau bawlhhlawh kîr leh

(Lk. 11:24-26)

43“Thlarau bawlhhlawh chu mi kawchhûng ata a chhuahin chawlhna zawngin tui awm lohna hmunahte a vâk a vâk a, a hmu zo lo va. 44Tichuan, ‘Ka in, ka chhuahsan takah khân ka kîr leh mai teh ang,’ a ti a; a va thlen chuan ruaka phiah faia tihfel diamin a va hmu a. 45Tichuan, a kal a, amah aia sual hlîr thlarau dang pasarih a rawn hruai a; an lût a, chutah chuan awmhmun an khuar ta a. Chu mihring awmze hnuhnûng zâwk chu a hmasa aiin a lo chhe daih ta a ni. Chutiang bawkin, tûnlai mi, mi sual takte chungah hian a la awm ang,” a ti a.

Isua nu leh unaute

(Mk. 3:31-35; Lk. 8:19-21)

46Mipuite hnêna thu a sawi lai chuan, a nu leh a unaute chu amah biak tumin pâwnah an ding a. 47Mi pakhatin a hnênah, “I nu leh i unauten biak tum chein pâwnah sâwn an nghâk a che,” a ti a.#12:47 Mss ṭhenkhatah he châng hi a chuang ve lo.

48Ani erawh chuan a hrilhtu chu a chhâng a, “Ka nu chu tu nge ni? Ka unaute pawh chu tute nge ni?” a ti a. 49A zirtîrte lamah a kut a phar a, “En teh u, ka nu leh ka unaute hi! 50Tu pawh ka Pa vâna mi duhzâwng titute chu ka unaute, ka farnu te, ka nu te an ni asin,” a ti a. #Jn. 15:14.

Currently Selected:

MATHAIA 12: MIZCLBSI

Highlight

Copy