MATHAIA 10

Zirtîr Sâwmpahnihte

(Mk. 3:13-19; Lk. 6:12-16)

1A zirtîr Sâwmpahnihte#10:1 Isua zirtîr 12 bîk sawi nân hetianga ziak a ni. chu a ko va, thlarau bawlhhlawhte hnawt chhuak thei tûra thuneihna leh natna leh chak lohna tinrêng tidam thei tûrin thiltihtheihna a pe a. #Tirh. 1:13.

2Tirhkoh Sâwmpahnihte hming chu hêng hi a ni: A hmasa berah Simona, Petera an tih leh a unau Andria te, Zebedaia fa Jakoba leh a unau Johana te, Filipa leh Bartholomaia te, 3Thoma leh chhiahkhawntu Mathaia te, Alfaia fa Jakoba leh Thadaia#10:3 Mss ṭhenkhatah ‘Lebbaia, Thadaia an tih’ tih a ni. te, 4Kanan mi Simona leh a mantîrtu Juda Iskariota#10:4 ‘Iskariot mi fa’ tih theih a ni bawk. te an ni.

Sâwmpahnihte tih tûr

(Mk. 6:7-13; Lk. 9:1-6)

5Chûng Sâwmpahnihte chu Isuan a tîr chhuak a, thu a pe a, “Jentail-te chu tlawh suh ula, Samari mite khaw engah mah kal hek suh u; 6berâm bo, Israel hnam hnênah chuan kal zâwk rawh u. #Mt. 15:24. 7In zinnaah, “Vânram chu a lo hnai ta,” tiin hril zêl ang che u. #Lk. 10:4-12. 8Damlote tidamin mitthite kaitho ula, phârte tithianghlimin ramhuaite hnawt chhuak ang che u. A thlâwnin in hmu a, a thlâwnin pe ang che u. 9In kâwnghrênah rangkachak emaw, tangka emaw, dâr tangka emaw pai suh ula, 10zin kawng atân iptê emaw, kawr pahnih emaw, pheikhawk emaw, tiang emaw keng hek suh u; hnathawktu chu ei tûr hmu tlâk a ni si a. #1 Kor. 9:14; 1 Tim. 5:18.

11“Khaw lianah emaw, khaw tê-ah emaw, in luhna apiangah, thlenna âwm, mi zawng chhuak ula, in chhuah leh hma chu chutah chuan thleng reng ang che u. 12Ina in luhin chibai bûk ang che u. 13Chu ina mite chu chibai bûk tlâk an nih chuan in thlamuanna thu#10:13 Chibai bûk hla chu ‘Salom’ tih a ni, ‘In hnênah thlamuanna awm rawh se’ tihna. chu an chungah thleng rawh se; an tlâk loh erawh chuan in thlamuanna thu chu in chungah lo kîr leh rawh se. 14Mi tu pawhin an lo lawm loh che ua, in thu pawh an ngaihthlâk loh chuan, chu in ata emaw, chu khua ata emaw in chhuah hunin in kea vaivut chu thing thla ang che u. 15Thu dik ka hrilh a che u, rorêl ni-ah chuan chu khaw tuar tûr ai chuan Sodom leh Gomora ram tuar tûr chu a ziaawm zâwk ang.#Tirh. 13:51; Mt. 11:24; Lk. 10:12; Gen. 19:24-28; 2 Pet. 2:6.

Tihduhdahna lo thleng tûr

(Mk. 13:9-13; Lk. 21:12-17)

16“Ngai teh u, chinghne zînga berâm lût angin ka tirh che u hi; chuvângin, rûl anga finga, ṭhuro anga pawi khawih lovin awm ang che u. 17Amaherawhchu, mite lakah fîmkhur rawh u; Sanhedrin-ah an thlen ang che u a, an Sunagog-ahte an vua ang che u. #Mk. 13:9-13; Lk. 12:11,12; 21:12-19; Jn. 16:2. 18Keimah avângin hotute leh lalte hmaah, anni leh Jentail-ten ka thu an hriat theih nân an la thlen ang che u. 19Nimahsela, chutia an thlen hunah che u chuan in sawi tûr leh in sawi dân tûr engto suh ang che u; in sawi tûr chu a hun takah chuan hriattîr in ni dâwn si a. 20A sawitu chu nangni in ni dâwn si lo va, nangmahnia awm Pa thlarauvin a sawi zâwk dâwn a ni.

21“Tin, unaupa in a unaupa tihhlum tûrin a mantîr ang a, pa pawhin a fa a mantîr ang; fate pawhin an nu leh pate an do vang a, an tihlum ang. 22Ka hming avângin mi zawng zawngin an hua ang che u; a tâwp thlenga tuar peih apiang erawh chu chhandam an ni ang. #Mt. 24:9-13; Mk. 13:13; Lk. 21:17.

23“He khuaah hian an tihduhdah hunah che u chuan khaw dangah tlân ang che u; thu dik ka hrilh a che u, Mihring Fapa a lo kal hmain Israel khuate in fang chhuak hman lo vang.

24“Zirlai chu a zirtîrtu chungah a awm lo va, bawih pawh a pu chungah a awm hek lo. #Lk. 6:40; Jn. 13:16; 15:20. 25Zirlai chu a zirtîrtu anga a awm leh, bawih chu a pu anga a awm chuan an tân a tâwk a ni. In neitupa mah Belzebula an tih chuan, a chhûngte chu an va ti lehzual dâwn êm! #Mt. 9:34; 12:24; Mk. 3:22; Lk. 11:15; 2 Lal. 1:2.

Tu nge hlauh tûr

(Lk. 12:2-7)

26“Chutichuan, anni chu hlau suh u; lang leh lo tûra thuhrûk eng mah a awm lo, hriat loh tûra zêp pawh eng mah a awm hek lo. #Mk. 4:22; Lk. 8:17. 27Thima ka hrilh che u hi, êngah sawi ula, a rûka in hriat hi in chunga chuangin tlângaupui ang che u. 28Taksa tihluma thlarau tihlum thei lote chu hlau suh u; hremhmuna thlarau leh taksa tiboral theitu erawh chu hlau rawh u. #Heb. 10:11. 29Chawngzawng pahnih pawisa pakhatah an hralh ṭhîn lo vem ni? Nimahsela, an zînga pakhat mah in Pa hriat lohvin leiah an tla lo vang. 30In samzaite lam pawh hi chhiar vek a ni asin. 31Chuvângin, hlau suh u, chawngzawng tam tak aiin in hlu zâwk e. #Mt. 12:12.

Isua phat

(Lk. 12:8,9)

32“Chutichuan, mite hmaa mi ṭan apiang kei pawhin ka Pa vâna mi hmaah ka ṭan ve ang.#Mk. 8:38; Lk. 9:26; 2 Tim. 2:12; Thup. 3:5. 33Tu pawh mite hmaa mi phat erawh chu, kei pawhin ka Pa vâna mi hmaah ka phat ve ang. #2 Tim. 2:12.

Remna ni lovin khandaih

(Lk. 12:51-53; 14:26,27)

34“Leiah hian rem lêntîr tûra lo kal ka nih ring suh u, rem lêntîr tûra lo kal ka ni lo va, khandaih lêntîr tûra lo kal ka ni zâwk e. 35Fapa a pa dotîr tûr te, fanu a nu dotîr tûr te, mo a pasala nu dotîr tûr tea lo kal ka ni asin. #Mik. 7:6; Mk. 13:12. 36Mahni hmêlma tûr chu mahni chhûngkaw zînga mi ngei an ni ang. 37Mahni nu emaw, pa emaw, fapa emaw keimah aia hmangaih zâwktu chu ka mi ni tlâk a ni lo. 38Mahni kraws pua mi zui lo chu tu mah ka mi ni tlâk an ni lo.#Mt. 16:24; Mk. 8:34; Lk. 9:23. 39Tu pawhin mahni nun humhim an tum chuan an chân ang a, keimah avânga an nun chân chuan an hmu ang. #Mt. 16:25; Mk. 8:35; Lk. 9:24; 17:33; Jn. 12:25.

Lâwmman hmuh tûr

(Mk. 9:41)

40“Tu pawh lâwm che u chu kei mi lâwm an ni; tu pawh mi lâwm chu mi tîrtu lâwm an ni.#Lk. 10:16; Mk. 9:37; Jn. 13:20. 41Zâwlnei chu zâwlnei a nih avânga lâwm apiang chuan zâwlnei lâwmman an hmu ang; mi fel chu mi fel a nih avânga lâwm apiang chuan mi fel lâwmman an hmu ang. 42Thu dik ka hrilh a che u, hêng mi tê zînga pakhat pawh hi, zirtîr an nih avânga tui vâwt no khat pawh petu tu man an lâwmman tûr an chân tawp lo vang,” a ti a. #Mt. 25:40; Lk. 9:41.

Currently Selected:

MATHAIA 10: MIZCLBSI

Highlight

Copy