LUKA 4

Isuan thlêmna a tâwk

(Mt. 4:1-11; Mk. 1:12,13)

1Isua chu Thlarau Thianghlimin a khat a, Jordan lui aṭanga a lo haw chu, Diabola thlêm chungin thlalêrah ni sawmli Thlarau hruaiin a thang bo va. 2Chûng chhûng chuan eng mah a ei lo va, a tâwpah chuan a ril a ṭâm ta hle a. #Deut. 9:9; 1 Lal. 19:8.

3Tichuan, Diabolan a hnênah, “Pathian Fapa i nih tak tak chuan he lung hi chhanga chang tûrin thu pe rawh,” a ti a. 4Isua erawh chuan, “ ‘Chhang ringawt ringin mihring hi an nung tûr a ni lo,#4:4 Mss ṭhenkhatah ‘Pathian ka aṭanga thuchhuak tinrêng an ring bawk tûr a ni’ tih a tel. tih ziak a ni,” a ti a. #Deut. 8:3.

5Hmun sâng takah a hruai chho va, mitkhapkâr lovah khawvêl ram zawng zawng a entîr a. 6Diabola chuan, “Hêng zawng zawng chunga thuneihna leh a ropuina hi ka pe ang che; ka hnêna pêk a ni tawh a, ka duh duh pe thei pawh ka ni. #1 Jn. 5:19. 7Nang hi chuan chibai mi bûk la, a za-in i ta a ni vek mai tûr,” a ti a. 8Isuan, “ ‘Lalpa i Pathian chu chibai bûk la, ama rawng chauh bâwl rawh,’ tih ziak a ni,” a tihsan a. #Deut. 6:13.

9Jerusalem-ah a hruai leh a, Tempul chhîpah a dah a, “Pathian Fapa i nih meuh chuan heta ṭang hian zuang thla rawh:

10‘Nangmah vêng tûr chein

Vântirhkohte chu thu a pe ang,’ tih leh, #Sam. 91:11,12.

11‘An kutin an dâwm ang chia,

Tichuan, lungah i ke i sawh dâwn lo nia,’

tih ziak ang khân,” a ti a.

12Isua erawh chuan, “ ‘Lalpa i Pathian fiah suh,’ tih ziak a ni,” a tihsan leh ta a. #Deut. 6:16.

13Tichuan, Diabolan a thlêmna tûr tinrênga a thlêm zawh chuan a remchân leh hun atân a kalsan ta a.

Galili ramah Isuan rawng a bâwl ṭan

(Mt. 4:12-17; Mk. 1:14,15)

14Tin, Isua chu Thlarau thiltihtheihna nên Galili ramah a haw ta a; chu mi bial pumah chuan a chanchin a thang vêl ta a. #Mt. 9:26; Lk. 4:37. 15An sunagog-ahte mi a zirtîr ṭhîn a, miten an hlut hle a. #Mt. 4:23; 9:35; 11:1.

Nazaret miten Isua an duh lo

(Mt. 13:53-58; Mk. 6:1-6)

16A seilenna khua Nazaret chu a lo thleng a, a tih dân pângngaiin Sabat ni chuan sunagog-ah a lût a, chhiar tûrin a ding a. 17Zâwlnei Isaia lehkhabu zial chu an pe a, he thu chuanna thleng hian a han phelh a:

18Lalpa Thlarau chu ka chungah a awm a,

Pachhiate hnêna Chanchin Ṭha hril tûrin

Hriak mi thih a ni.

Saltâng chhuah tûr thu te,

Mitdel mit vâr tûr thu te,

Rahbeh chhan chhuah tûr thu te, #Isa. 61:1,2 (LXX).

19Lalpa duhsakna lan hun thleng ta te hi

Puang tûrin mi tîr a ni.

20Lehkhabu chu a zial a, rawngbâwltu a pe leh a, a ṭhu ta a, sunagog-a mi zawng zawng chuan an en ṭhuap mai a. 21An hnênah, “He lehkha Thu hi vawiin hian in hriatah a lo thleng ta,” tiin a han sawi ta a. 22An za chuan sawi ṭha an ti hle a, a thu sawi duhawm tak chu mak an ti a, “He mi hi Josefa fapa kha a ni lâwm ni?” an ti a. #Jn. 6:42; 7:15.

23Ani chuan an hnênah, “‘Daktor, nangmah intidam rawh,’ an tih ṭhin ang hian nangni pawhin, ‘Kapernaum khuaa i thil tih kan hriat angte kha i khaw lamah pawh hian ti ve ta che,’ min la tih dâwn ngei hi,” a ti a. 24A sawi zêl a, “Thu dik ka hrilh a che u, zâwlnei tu mah ama khaw lama miten an lâwm ngai lo. #Jn. 4:44. 25Dik tak chuan, Elija pawh kha, a dam laia kum thum leh thla ruk khua a khena, khawvêla ṭâm nasa tak tlâk lai khân, Israel ramah hmeithai tam tak an awm na a, #1 Lal. 17:1,8-16; 18:1; Jak. 5:17-18. 26an zînga tu hnênah mah tirh a ni lo va. Sidon rama Zarefat khaw hmeithai pakhat hnênah chauh tirh a nih kha. 27Zâwlnei Elisa dam lai pawh khân Israel ramah phâr tam tak an awm na a, an zîngah, Suria mi Naamana chauh lo chu tu mah dang tihthianghlim an nih loh kha,” a ti a. #2 Lal. 5:1-14.

28Chûng thu chu an hriatin sunagog-a awm zawng zawng chu an thinur ta êm êm a; 29an thawk lawk a, khua ata chu an nam chhuak a, an khaw kiang khâma nam thlâk tûrin an hruai ta a; 30nimahsela, ani chuan mipui a tâwn tlang a, a kal ta daih a. #Jn. 8:59; 10:39.

Ramhuai man tihdam

(Mk. 1:21-28)

31Galili rama khaw pakhat Kapernaum-ah a zuk kal a. Sabat ni chuan mite chu a zirtîr a. 32Thunei taka a zirtîr avâng chuan a zirtîrna chu mak an ti hle a. #Mt. 7:28-29; 13:54; 22:23; Mk. 11:18; Jn. 7:46.

33Sunagog-ah chuan ramhuai bawlhhlawh thlarau pai a awm a, ring takin a au ta chiam a, 34“E! Nazaret Isu, kan chungthu-ah rawn inrawlh i tum elo? Min tiboral tûrin i lo kal em ni? Tu nge i nih ka hria, Pathian Mi Thianghlim chu i ni,” tiin. 35Isua chuan a hau va, “Ngawi la, a chhûng ata lo chhuak rawh,” a ti a. Ramhuai chuan leiah a tithlu a, amah tina lovin a chhuahsan ta a. 36An za chuan mak an ti a, “Hei hi eng thu nge ni ta ngai? Thuneihna leh thiltihtheihna hmangin thlarau bawlhhlawhte thu a pe a, an chhuah tâk mai hi,” an ti a. 37Tichuan, chumi bial hmun tinah a chanchin chu a thang ta a. #Lk. 4:14; 5:15; Mt. 9:26.

Mi tam tak tihdam

(Mt. 8:14-17; Mk. 1:29-34)

38Tin, a tho va, sunagog aṭang chuan Simona inah a lût a. Simona pizawn chu a khua a lo sik hluah mai a, a tân an lo ngensak a. 39A kiangah a va ding a, khawsik chu a hau va, a reh ta a; tichuan, a tho thei ta nghâl a, chaw ei a siamsak ta a.

40Ni tlâk lai vêl chuan natna hrang hranga na, damlo nei apiang chuan an rawn hruai a; an zaa chungah kut a lo nghat ṭheuh va, a tidam zêl a. 41Ramhuaite pawh, “Pathian Fapa i ni,” tia auvin mi tam tak kawchhûng ata an lo chhuak bawk a; anni chu Isuan a hau va. Krista a ni tih an hriat avângin an ṭawng a phal lo.

Thuhrila zin

(Mk. 1:35-39)

42A tûk zîngah chuan hmun fianrialah a kal a, mipuite chuan an zawng a, a hnênah an lo kal a, anmahni a kalsan loh nân chelh an tum a. 43Nimahsela, ani chuan, “Khaw dangahte pawh Pathian ram Chanchin Ṭha hi hril tûr ka ni asin; chumi avânga tirh ka ni si a,” a ti a. 44Tichuan, Judai#4:44 Mss ṭhenkhatah ‘Galili’ tih a ni. rama sunagog-ahte chuan a lût a, thu a hril vêl ta a. #Mt. 4:23; 9:35; Mk. 1:39.

Currently Selected:

LUKA 4: MIZCLBSI

Highlight

Copy