JOHANA 15

Isua, Grêp tak

1“Kei hi grêp tak chu ka ni a, ka Pa a huan enkawltu a ni. #Isa. 5:1-7; Ezek. 19:10. 2Ka zawmpui pêng rah lo apiang a paih ṭhîn a, a rah apiang a thian fai ṭhîn, a rah tam lehzual nân. 3In hnêna ka thu sawi zawng zawng avâng chuan in thianghlim tawh pang a ni. 4Keimahah awm reng ula, kei pawh nangmahniah ka awm reng ang. Pêng chu grêp hruia a awm reng loh chuan a rah thei lo ang bawkin, nangni pawh keimaha in awm reng loh chuan in rah thei lo vang. 5Kei grêp chu ka ni, nangni a pêngte chu in ni. Tu pawh keimaha awm renga, kei pawh amaha ka awm rengna chu tam takin a rah ṭhîn; keimah lovin eng mah in ti thei si lo. #Jn. 6:56. 6Tu pawh keimaha awm reng lo chu, pêng anga paih chhuahin an awm ṭhîn, pêng paih chu a vuai a, an fawm a, meiah an paih a, a kâng ṭhîn. 7Keimaha in awm renga, ka thu nangmahnia a awm reng bawk chuan, in duh apiang dîl ula, in hmu zêl ang. 8Tam taka in raha, ka zirtîrte in nih tak meuh hian ka Pa chawimawiin a awm ṭhîn. 9Pain mi hmangaih angin kei pawhin ka hmangaih che u hi; ka hmangaihin awm reng rawh u. 10Ka thupêkte in zawm chuan, ka hmangaihin in awm reng ang, keiin ka Pa thupêkte ka zâwm a, a hmangaiha ka awm reng ang hian. #Jn. 14:15.

11“Ka lâwmna hi nangmahnia a awm reng nân leh, in lâwmna chu a famkim nân hêng thu hi in hnênah ka sawi a ni. 12Hei hi ka thupêk chu a ni; ka hmangaih che u ang hian nangni pawh inhmangaih tawn rawh u.#Jn. 13:34; 15:17. 13Miin a ṭhian tân a nun a pêk aliama hmangaihna nasa zâwk tu man an nei lo. #Rom. 5:7. 14Thu ka pêk che u hi in tih chuan ka ṭhiante in ni ang. 15Bawih ka ti leh tawh lo vang che u; bawih chuan a pu thiltih a hre si lo va; ṭhiante ka ti zâwk a che u; ka Pa hnên aṭanga thil ka hriat zawng zawng ka hrilh tawh si che u a. 16Nangnin mi thlang lo, keiman ka thlang zâwk che u a, va rah tûr leh in rah awm reng tûrin ka ruat bawk a che u; tichuan, ka hminga Pa hnêna in dîl apiang a pe dâwn che u nia.#Jn. 6:70; 13:18. 17He thu hi ka pe a che u, inhmangaih rawh u.

Khawvêl huat

18“Khawvêlin a huat che u chuan, a huat hma che uin kei mi haw tawh tih hria ang che u.#Mt. 24:9; Jn. 7:7; 1 Jn. 3:13. 19Khawvêl mi ni ula chuan, khawvêlin ama ta chu a hmangaih ang che u; nimahsela, khawvêl mi in ni lo va, khawvêla mi ka thlan chhuah in nih avângin khawvêlin a hua che u a ni. 20Bawih a pu aiin a ropui lo tih thu in hnêna ka sawi kha hre reng rawh u. Annin kei mi tihduhdah ang khân nangni pawh an tiduhdah ang che u; ka thu an zawm chuan in thu pawh an zâwm ang. #Mt. 10:24; Lk. 6:40; Lk. 6:40; Jn. 13:16. 21Nimahsela, hêng thil zawng zawng hi ka hming avângin in chungah an ti ang, mi tîrtu an hriat loh avângin. 22Kei lo kalin an hnênah thu sawi lo ila chuan, sual an nei lo tûr; tûnah zawng an sual chhuanlam tûr an nei tawh lo. 23Tu pawh mi hua chuan ka Pa pawh a hua a ni. 24Mi dang tu ma la tih ngai loh thilte an zîngah ti lo ila chuan, sual an nei lo tûr; tûnah zawng ka thiltihte an hmu a, kei leh ka Pa chu min haw ta bawk a ni. 25Engpawh ni se an Dân Lehkhabuah, ‘Annin a chhan awm lovin min hua,’ tih ziak kha a lo thlenna tûr a ni. #Sam. 35:19; 69:4.

26“Awmpuitu, Pa hnên ata in hnêna ka rawn tirh tûr, Paa chhuak Thlarau dik tak chu a lo thlen hunah, ani chuan ka chanchin a hriattîr ang.#Jn. 14:6. 27Nangni pawh ka thu hretute in ni e, a tîr ata ka hnêna in awm avângin.

Currently Selected:

JOHANA 15: MIZCLBSI

Highlight

Copy