1 TIMOTHEA 2

Ṭawngṭai chungchânga thuchah

1Ka chah duh hmasak ber che chu thil dîlna te, ṭawngṭaina te, dîlsakna te, lâwmthu hrilhna te mi zawng zawng tân hlân ula, 2Pathian ngaihsak leh zahawma awmin thlamuang taka kan khawsak ho dial dial theih nân lalber leh thuneitu zawng zawng pawh dîlsak rawh u; 3chu chu min chhandamtu Pathian hmuhin a ṭha a, a lâwmzâwng a ni. 4Ani chuan mi zawng zawng chhandama awmah leh thutak hria atân a duh si a. #Ezek. 18:23; 2 Pet. 3:9. 5Pathian pakhat chauh a awm a, Pathian leh mihring inkârah palai pakhat chauh a awm bawk, mihring Krista Isua chu. #Isa. 3:18-24; Gal. 3:20; Heb. 12:24. 6Mi zawng zawng tlan nân ani chu a inpe a, chhandamna thu chu hun a tih takah a rawn puang ta. 7Kei hi, Jentail-te hnêna chu rinna thu chu puang tûr leh thutak zirtîrtu leh tirhkoh atân ruat ka ni; he ka thu sawi hi thutak a ni a, dâwt a ni lo ve. #Gal. 2:7; 2 Tim. 1:11.

8Tichuan, in inkhâwmna apiangah mipaho chuan tihtakzetin, thinur chung leh ringhlel chunga ti lovin kut thianghlim pharin ṭawngṭai rawh se. 9Hmeichhia pawh a mawi tâwk leh inchawih tâwkin inchei sela, sam chei lêrh te, rangkachaka inchei te, tuikeplung ṭhi awrh te, puan man tam inbel te chîng suh se.#1 Pet. 3:3. 10Pathian ngaihsak hmeichhiate tih âwm rêng, thil tih ṭhatein inthuam zâwk rawh se. 11Hmeichhiate chuan ngawi rengin, thu awih takin thil an zir tûr a ni. 12Hmeichhiain an zirtîr te, mipa chunga thu an neih te ka phal lo, ngawih an chuh tûr a ni.#1 Kor. 14:34. 13Adama chu Evi ai chuan siam hmasak a ni a, #Gen. 2:7,21-22. 14buma awm kha Adama a ni lo va, hmeichhia kha a ni buma awm leh bawhchhetu chu.#Gen. 3:1-6; 2 Kor. 11:3. 15Amaherawhchu, rinnaah te, hmangaihnaah te, thianghlimnaah te, mawi taka an awm reng phawt chuan fa hrin avângin#2:15 ‘Fa hring mah se’ tih theih, Eden ânchhia emaw, thisen chhuak vânga bawlhhlawh emaw chu chhandam an ni lo vang tih zirtîrna kalh zâwnga sawi a ni. ‘Nau an chhiat lo vang’ tih theih a ni bawk. chhandam an ni ang.

Currently Selected:

1 TIMOTHEA 2: MIZCLBSI

Highlight

Copy