METHIU 9
9
Jesu ing ahakchaang ithiipoh Amandam
(Mk 2.1-12; Luk 5.17-26)
1Jesu ing ruwkuwngna chiilaar kaahka een hungtung, 2changlae mee aeng ahakchaang ithiipoh ina yngkheh enveruwpa. Amana ina meechu damlem vaata ichii eman-denchu Jesu ing amutah nache ariir, “Narutha manruungla kasapa, isii natuchaap kakuhpa.”
3Amana thiimthang aenche enum ing ichong ae, “Hava mee inge ithipak ing chongna!”
4Achong nache engkharchu amanghuw tahnache Jesu ing asii ae, “Yngkhaena changchii isii ikhachu nenkharva? 5Nataklina isii vakhae kakuhpa ichiire hangiir nana sira ichii i ukha inche ilaehakva? 6Ki ing mandang kata amachuve, Mee Sapa inche laaruw paamna isii kuhnii ruwreng adeensa.” Amana ina mee ningtingche ariir, “Hangiir, najaar niikha chinana yngkaera.”
7Amana idam inche hangiirka yngkaesa. 8Amu mee vakhae aenche ynchikpohsae amanche hangchii aatuaricheh i mee ningna apeeh Thangnang chu emanpahsah ae.
Jesu ing Methiu A-een
(Mk 2.13-17; Luk 5.27-32)
9Atii Jesu ing ama denchu maka ahungsirae ree ikhuum mee aruming Methiu ing akaarohna heongchu amupa. Amana Jesu ing huung kaanuw ijiira taka aachiir. Ama ing hangiirka Jesu inuwchu ajiipa.
10 #
Luk 15.1,2 Jesu ing Methiu eenna amaarlae ree ikhuum aere mee aeng enrathiih aechu theng aeka Jesu vokhehkho asebok ae thohche imaarpoh ae. 11Havi Pharisi aenche emutah nache asebok ae ningna ensii, “Yngkhaena nenuw neng oja inge ree ikhuum aere isii icher mee aethoh imaarpohva!”
12Ama chongchu Jesu ing siika abasang ae, “Idam mee ae ningna ithiim ikanii omah, ina khaena chembe ikaniina. 13#Met 12.7‘Chaatha ipithoh chembe ningchuwh om ing kaadik hakva taka ynziihchu vajongnuwna tamruw.’ Ki ijuwng ing chuve ichum ynthiing ae ijongnii khaena mahva, changvakonchu isii icher ae khaenava.”
Maaru itong khaena chong Ensii
(Mk 2.18-22; Luk 5.33-39)
14Aanuwnache Johon sebok ae theng aeka Jesu ningna ensii, “Kenuw re Pharisi ing maaru tongchak ungka amanche nasebok aencha yngkhaena maaru atong mahpae?” 15Jesu ing eningna abasang, “Rakhii-niina itheng aeng songpa aanvae raentaang ijaanii phavaatae ichii nenkharnah? Utaraenkho phamahnii ae. Changvakonchu songpa jungruwva enchii apha hungvivaata, changlaenche enuw ing maaru tongvaatae.”
16“Achuw ingkho baruw rungopna ithar peen ing ibermah, akhaechuve ithar peen varaangkhe kika rungop-kha ynsiih sehsehna. 17Mee aenche ithar vomrip chiichu buruw shavin thuungfhuw nache thinniimah chak ae, thin ae nave shavinchu ynsiihka vomrip chiichu yntaana, vokhehkho shavin thuungfhuw ae chukho maangna; changvakonchu enuw ing ithar vomrip chiichu ithar shavin thuungfhuw nache enthinnah, amana chembe aaniimeh ing isa ing omna.”
Rupanuwti amanring re Sanuw Amandam
(Mk 5.21-43; Luk 8.40-56)
18Jesu ing changche achonglae enruw, Jehudi iruung yngkheh vathengka Jesu maensokna akheer-khuwh mansinka athamsah, “Kasanuw ataenrap thikdohsa; ivakpeeh nana ataklina nakik isiipeehsara, amana chembe ama hangring vaata.”
19Chukhaenache Jesu ing hangiirka avejiipa vokhehkho asebok ae ingkho envejiipa.
20Changlae kumsuum ariinii sii ynta ing ina sanuw yngkheh ing vakka atuk nungting arungop basuwrna aparpa. 21Ataksah ing amanden chuve, “Ki ing arungop basuwr pangkho parcheh saningve damva kata achii.”
22Jesu ing huw ruwsachu siika avaanleh tahnache sanuwchu muka ariir, “Kasanuw, nabarungriir mangamla, ithuwh ing namandensah inuwzii ing damsachii.” Aphachak nache sanuwchu vadamsa.
23Atii Jesu ing iruung een tingche avaruwh raenche simruwr itum ae tachaam iriae enghuw itamchu muka 24Jesu ing ariir, “Nengkheng ong-mahruw! Rupanuwti havi ithii mahva, ijaar vatah!” Chongchu ensiitah nache Jesu chu emaniisah. 25Mee vakhaechu taang ensuwh aanuwna, Jesu ing varuwhka rupanuwti akiknache abachuw tahnache rupanuwtichu hangringsa. 26Hava chongthar i apaam arakiing aangkhengna thangsa.
Jesu ing Mikchu meeniimeh Amansak
27Atii Jesu ing ama denchu maka ahungsirae mikchu mee ynniimeh aeng aanuw vejii aeka naning imanchuwhsar, Devit sapa ta aeka iva uung ae.
28Jesu ing eensung ahungruwh tahnache mikchu aekho varuwhsae. Amana Jesu ing asii ae, “Ki ing mansakcheh vakachuw ichii nentha-chanah?” “Imansakcheh vaanta ta aeka embasang.” 29Amana Jesu ing emik parka ariir, “Nenuw nenthacha inuwzii inche damruw!” 30Amana emik ichuchu saksa. Aanuwnache Jesu ing eningna ipirpak ing ariir, “Achuw ningnakho havi riirmahruw.”
31Changvakonchu enuw ing apaam lija ihuur aeka mee vakhae ningna hava thamin i enjarpa.
Jesu ing achong isuwhmah Amansak
32Enuw mee ynniimehchu engaangkaedeh aanuwna umlae ing ichuwng ichong achehmah yngkheh Jesu ningnache enveruwpa. 33Chang-vakonchu Jesu ing umlaechu athurthoh ichong achehpa. Amana mee aenche ngik aeka enriir, “Hava hangchii i Isrel sungna utaraenkho mumahrideh ung.”
34 #
Met 10.25; 12.24; Mk 3.22; Luk 11.15 Changvakonchu Pharisi aenche enriir, “Hava mee i umlae aaruung jaarna umlae athurcheh vatah.”
Mee ae khaena Jesu Ningchuwh
35 #
Met 4.23; Mk 1.39; Luk 4.44 Atii Jesu ing akhuwsiir, akhuw-veensiir nache baversa. Amana meekongnii nache varuwhka iruwng lipah tanii isa chongchu atongpeeh ae, vokhehkho ina, isuur imaang aechu amandam. 36#Mk 6.34Changlae ama ing mee inempak aechu amucha aning amanchuwhpae, akhaechuve acheer omah jao ae vaang enuw ja aeka ynsaenongsae. 37#Luk 10.2Chutahnache asebok ae ningna ariir, “Ruwrae kuumfhuw inempak ruungna, changvakonchu kuumvachii mee tuumpakna. 38Chukhaenache ruwrae kuumvachii mee ajebathennii khaena Aafhuw ningting thamsaruw.”
Currently Selected:
METHIU 9: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
