METHIU 7
7
Mee taklina Vajeer ituniimah khaena Ynchuwpeeh
(Luk 6.37-38,41-42)
1“Mee taklina vajeer tumahra, amana chembe Thangnang ing nataklina vajeer tumahnii. 2#Mk 4.24Nang ing mee taklina vajeer tutaniive, Thang-nang ing nataklinakho ynchimchak ing vajeer tuvaata. 3Ynchii khaena namikna ibuwr omcha ibuwrruchii ing, unae mikna om ibuwr chucha nabuwrva? 4Amanche namik abuwr brohrae, nauw nanae mikna ibuwrcha ripeeh kachii nachiiva? 5Ichum nabuchaang nang maensa ing namikna ibuwrkha rijapla, amanche aanuwting nauw nanae mikna om ibuwrchu iseengkiir ing mupeh vaanta.”
6“Ynthiing peehva ichii chaap uti aeting pimahruw; amanche voh ae maensokna amen iruwpak rung verenmahruw, enuw ing chanii ae naka neningting vaanleh ae naka ynsi aekho arusa.”
Niihruw, Jongruw, Ichumruw
(Luk 11.9-13)
7“Niihruw ipivaata; Jongruw tuwhva nenta; ichumruw ibarangpeeh vaata. 8Akhaechuve aaniih vakhae ing phavaata, aajong vakhae inche tuwh-vaata, amanche aachum mee khaenache barangpeeh vaata. 9Achuw yngkheh nengkaarna siti ing tar aniihtahna rung pivachii mee ynvaenachuw? 10Amanche nga aniihtahna baruwr pivanente? 11Nenuw chamahkhang tanuwkho nensiti ae ningna isa peeh pinii chuve nemanghuwsa, chunuw chembe thangbaenna ong nenpa inche aajaehmeh aniihsah mee ningnache isa pining tavaate.”
12 #
Luk 6.31
“Naningna mee ing tunaka nachii vaangkhe nang ingkho meening nache tura; akhaechuve havi Mosi chonghak vokhehkho Jaephar chong arutho chuva.”
Ymbik Lam
(Luk 13.24)
13“Varuwhnii lam ymbik nache ruwhruw, akhaechuve imaangnii ting ruwhnii lam chuve manjaka ijiinii laena, amanache ivaruwh mee nempakna. 14Changvakonchu iringnii phanii lam chuve mambikna vokhehkho ijiinii ruwna, amanche ama lamchu atuwh mee tuumpakna.”
Thingbur re Aanla
(Luk 6.43-44)
15“Taangnacha jao peendiir ing ynthong aeka, sungtingcha imi vaang ichii ae, neningna itheng ichummah jaephar mee ae khaena ynriimruw. 16Nenuw ing entu nong aanla nache manghuwva nenta. Iringbur tanii vomrip aanla vokhehkho iringbur tanii thachang iriihchak muwkhang? 17Chunuw vaniive isa thingbur chaap nache isa ynlana, isamah thingbur nache isamah ynlana. 18Isa thingbur nache isamah aanla vokhehkho isamah thingbur nache isa aanla ynla chehmah. 19#Met 3.10; Luk 3.9Aanla isa ing ynla chehmah thingbur chaapchu ynsaehka mi sungting ynrennah. 20#Met 12.33Jinge ichii ing nenuw ing enuwchu engaanla nache manghuwva nenta.”
Ki ing nenuwchu Manghuw mahchuwng
(Luk 13.25-27)
21“Kaningna Aafhuw, Aafhuw, tanaka yngeen mee chaap ing iruwng lipah tungmahnii, changvakonchu thangbaenna ong kapa ing amanden nong atu mee chaap inche tungvaata. 22Ama inii nache mee aanem ing kaningna tavaatae, ‘Aafhuw, Aafhuw,’ narumingna Thangnang chong manthangmah ungkhang, naruming ajaarna umlae ae kenthurmah vakhang, amanche narumingna laetho kemandangmah vakhang? 23Changlaenche ki ing eningna tavakata, ‘Utaraenkho nenuwchu manghuw mahchuwng; kakuurna ongmahruw ichuwhmah nongtu mee ae.’
Een Itu Meenii
(Luk 6.47-49)
24“Achuw yngkheh ing kachong chaap siinaka amanjii mee chuve ising ing rung taklina een amangiir ising mee thohche aanghakna. 25Khuw suwrka chii riimsa, amanche khuwsii ipirpak ing varaangsa. Changvakonchu tiihmah, akhaechuve rung taklina amangiirpa. 26Achuw yngkheh ing kachongchu siinaka amanjiimah mee chuve ipang ing siih taklina een amangiir mee thohche aanghakna. 27Khuw suwrka chii riimsa, amanche khuwsii ynleh inche eenchu raenka tiihsa; vokhehkho ithipak inche tiihsa.”
28 #
Mk 1.22; Luk 4.32 Hava chong i Jesu ing ariir amanchinuwna mee aenche achong nache ngiksae, 29yngkhaena ynchii imbe thiimthang ae vaang chongmahka ama ing aatuaricheh yngkheh ing chongsa.
Currently Selected:
METHIU 7: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.