METHIU 12

Deennii Aafhuw

1Apha ichiinache Jesu ing Deennii iniina asebok aethoh ruwchimna envasiraenche asebok ae enven chaamka sabar chim aeka ensah. 2Changlaenche Pharisi aeng emutah nache Jesu ningna enriir, “Enla, nasebok aeng Deennii iniina chonghak ing arumah iser nong entupa.”

3Amana Jesu ing abasang ae, “Devit vokhehkho aanruwfhuw aenche enven achaamtahna ynchii atu ichiichu nenuw nenpamahva? 4Ama ing rumniieen sungting ynsaangkhe varuwhka chonghak ing arumah vokhehkho jaethiim mahnaka enuw ing isah arumah tarchu asahpae? 5Amachupang mahka Deennii iniina jaethiim aeng rumniieenna Deennii nongruwchu tumahkhang ae nakho enuw raarmah ae ichii Mosi chonghak na ynziihchu nenpamahva? 6Chukhaenache neningna kariirnah, rumniieen athiseh ing iruung hane ongna. 7#Met 9.13Changvakonchu ki ing ningchuwhchu kaadikva, chaatha ipeehchu idikmah ing. Nenuw ing havi ynchii achiiniiva ichii manghuw tanuwve, emiraar omah mee aechu manraar mahva nenchiiva; 8Mee Sapa i Deennii Aafhuw chuva.”

Akik Ithiipoh mee Yngkheh

(Mk 3.1-6; Luk 6.6-11)

9Jesu ing engongnii maphamchu maka meekongnii tingche vaksa, 10amanache akik yngkheh ithiipoh sapa yngkheh heong. Amana Jesu chu manraar kenta ichii mee topoh heong aenche aningna asii ae, “Deennii iniina ina yndam aruvakhang?” 11#Luk 14.5Jesu ing eningna ariir, “Nenuw nengkaarna achuw yngkheh jaochu Deennii iniina yngkuwng sungting buknacha, ama ing jaochu isuwmah niikhang? 12Jao chungna mee ing amen ruwhakna! Chukhaenache isa nong chuve Deennii inii nakho itu chonghak ingkho arusa.” 13Changlaenche ama ing ina mee ningnache ariir, “Nakik kha hengathohla.” Akikchu ahengathoh tahnache paangkheh tanii akik vaangkhe damkiirsa. 14Chutahnache Pharisi aechu anikungna taangting jungsuwh aeka ynsaangkhe Jesu havi thehvaan chiiva ichii chong emanseerpa.

Thangnang ing Aateer Meenae

15Jesu ing amachu amanghuw tahnache engongnii aphamchu abathenpa; amana mee inempak inche Jesu aanuwchu enjiipa. Ama ing ina vakhae aechu amandampa, 16vokhehkho atak i achuwva ichii riirmahdehruw taka iruwpak ing chong ajeerpa. 17Havi jaephar Isaia ningna Thangnang ing amanriir vasah chongchu ahungchumnii khaenava:

18“Enruw, ki ing kaateer vasah kameenae,

aningna kabarungriir inempak ingam kaning kamansiih chuva;

ataklina kalaetha thinva kata,

19ama ing reentaang mee ae ningnache ichumchu mandang vaata.”

“Amave ynchehjaar mahnii, vokhehkho uungmah dehnii,

lamfhuwna mee ing aaruurkho siimahnii.

20Ama ing ichum vajeer inche acheh mahtaang,

thingkiir tikho khiihmahnii,

Mi ichuwh chukho thehmahnii;

21amanche thingna tikho manchir mahnii,

aningnache reentaang mee aeng ningmanden mangom vaatae.”

Jesu vokhehkho Beelzebul

(Mk 3.20-30; Luk 11.14-23)

22Changlaenche umlae ichuwng amik ichu achong isuwhmah mee yngkheh enveruw. Jesu ing amachu amansak tahnache achong suwhsa vokhehkho imukho amupa. 23Chu-khaenache mee vakhae ing engik lamher ing ariir ae, “Havi Devit sapa khamah vakhang?”

24 # Met 9.34; 10.25 Changvakonchu Pharisi ae ing ensiitah nache ariir ae, “Umlae aafhuw Beelrzebul ruwreng jaarmah naka mee havi inge umlaechu thurcheh mahnii.”

25Jesu ing emandenchu amang-huwtah nache eningna ariir, “Iruwng lipah sungna ynlehmah nave lipah kiina. Amanche khuwsungna vokheh-kho eensungna ynlehmah nave ipaar chehmahnii ae.” 26Chutahnache umlae ing umlae thurcheh nave embingna ynleh mahpae, vokhehkho alipahchu ynsaangkhe paarva chiiva? 27Ki ing Beelzebul ruwreng jaarna umlaechu kathur vanave, nenuw nensiti aecha achuw ruwreng jaarna thurva chiipae? Chukhaenache nentaklina enuw ing vajeer aafhuw ynsuwh vaatae. 28Changvakonchu ki ing Thangnang laetha jaar ing umlaechu kathur vanave, atatak ing neningna iruwng lipahchu thengsa.

29“Changmah naka achuw yngkheh ing ipirpak eenna varuwh naka atakchu maensa ing phuwpmah tanga naka apeehchu ynsaangkhe richehva takhang? Atakchu phuwpvaang naka a-een sungna peehchu richehpeh vaata.”

30 # Mk 9.40 “Kithoh ynruwhakmah meechu eejeehniiva vokhehkho kithoh akhuumhakmah meechu eengkhiiva. 31Chukhaenache ki ing neningna kariir-nah, isii chaap vokhehkho ithipak ing ichong vakhang nakho kuhpeeh vaata, changvakonchu ynthiing laetha taklina ithipak ing ichong mee chuve ikuhpeeh phamahnii. 32#Luk 12.10Achuw yngkheh ing Mee Sapa takline arumah ing chongkhang nakho kuhpeeh vaata; changvakonchu ynthiing laetha taklina arumah ing ichong mee chuve ataraenkho amanche ringseeh nakho ikuhpeeh phamahnii.”

Thingbur re Aanla

(Luk 6.43-45)

33 # Met 7.20; Luk 6.44 “Thingbur chu saknave aanlakho sakvaata amanche thingbur chu sakmah nave aanla chukho sakmahnii. Athingbur isamah isachu aanlana naevaata. 34#Met 3.7; 23.33; Luk 3.7; Met 15.18; Luk 6.45Baruwr sitiae, nentakcha nensakchah ing ynsaangkhe isachu chongchehva nente? Abarungriirna amandenchu aner ing hangchong pehva. 35Isa barungriir areen mee tanii isa suwhna amanche isamah barungriir areen mee tanii isamah suwhna. 36Changvakonchu ki ing neningna kariirnah, achuw yngkheh ing ikaniimah chong ichongchaap vajeer inii nache hemandang savaata. 37Akhaechuve nachong inuwzii ing imanchum vaata amanche nachong inuwzii ing imanraar vaata.”

Jesu ing Laetho yndang Arumah

(Mk 8.11-12; Luk 11.29-32)

38 # Met 16.1; Mk 8.11; Luk 11.16 Changlaenche thiimthang aere Pharisi ae ing aningna enriir, “Oja, naningtanii kenuw ing laetho yngkheh munungka kenchiinah.” 39#Met 16.4; Mk 8.12Jesu ing abasang ae, “Ichamah vokhehkho rupanuwna ichuwhmah siti ae ing laetho mandangnii khaena ajongnah ae; changvakonchu jaephar Jona laetho mahnaka yngkheh pangkho pimahning.” 40Jona ing iruungpak nga vensungna siimthum jaenthum ynthin vaangkhe, Mee Sapa chukho ynthin vaata. 41Nineva mee ae ing vajeer inii nache ataen siimnii suwnthar siti aethoh hangiir ae naka nenuwchu imanraar vaatae; akhaechuve enuw ing Jona thamin itongna embarungriir enghuungpa, amanche enruw, Jona chungna iruungseh hane ongna. 42Khuwbur irip tanii iruwngnuw vokhehkho ataen siimnii suwnthar siti aethoh hangiir ae naka nenuwchu imanraar vaatae; akhaechuve iruwngnuw ing laaruw paam adongnii tanii Solomon ising iveerchu siisa kata taka itheng, amanche enruw, Solomon chungna iruungseh hane ongna.

Isamah Umlae Hunganri

(Luk 11.24-26)

43“Umlae inche mee yngkheh ningtanii hungsuwhka chii omah paamting baverka aongnii ajongcha tuwhmahsa. 44Aanuwnache ama ing atii ki ing kamah een tingkhe athar hunganritah kata taka ahunganritah nache eenchu aruwh ing heomsa, ynruwhpehsa vokhehkho mamaennii vaangkhe heomsa. 45Amana aarang vajong reehka ama ithi ing ichamah umlae sariimeh asungting ruwh aeka ongsae. Amanache ameechu amaensa nakha ithi ing aningkuur ing sakmahsehsa. Havi vaange hava suwnthar nenkho isamah i hungsuwh vaata.”

Jesu Amnuw re Anae ae

(Mk 3.31-35; Luk 8.19-21)

46Jesu ing mee ae ningna achonglae enruw, amnuw re anae ae ing aningna chong riirnungka ta aeka enghah. 47Chukhaenache mee yngkheh ing aningna ariir, naningna chong iriirnii khaena nangnuw re nanae ae ing taangna ynghahnah ae.

48Jesu ing abasang, “Achuwva ki kanuwchu? Achuw aepae ki kanae aechu?” 49Ama ing asebok aechu man-tika ariir, “Hanene kanuw vokhehkho kanae aechu ongnae! 50Akhaechuve thangbaen paamna ong kapa ing amanden nong atu meechu ki kanaeva, ki kasar chuva amanche ki kanuw chuva.”

Currently Selected:

METHIU 12: MOYO

Highlight

Copy