Dehet deng Aan in Nutus sas 2

Atuli las haup Ama Lamtua Allah Koo Niu ka

1-2Tom nol atuil Yahudi las leol tene, man oen noken noan, ‘Leol Pentakosta’,#2:1: Atuil Yahudi las leol ‘Sabat’ ta, leol eneng. Undeng na le oen kaih leol Pentakosta la, mulai deng Yesus in mate ka taplaeng Sabat itu. Tiata kit tana noan, kahin deng lelon Lamtua Yesus in mate ka (na leol lima) taplaeng Sabat itu lam, lelo buk lima. totoang atuil in muid Lamtua Yesus sas nakbua se uma mesa.#Atorang deng Tulu Agama las 23:15-21; Dehet Ulang deng Lalan in Nuli 16:9-11 Nahkitu lam, oen ming dukun maa deng apan-dapa kua, banansila el angin tuan na hoos sa. Un dukun na tene isi, tiata atuil in se la ngas, ming haup atuil tenga las falan lo. 3Hidi kon oen ngat tam ai kaloe naih bating-bating lako se oen mesa-mesa dapas. 4Kon nam oen totoang haup Ama Lamtua Allah Koo Niu ka. Tiata oen mulai nahdeh nini dais didang bili-ngala, muding asa man Koo Niu ka in tek oen le aa ka.

5Dedeng na, muik atuil Yahudi mamo deng nusa-nusa in ne apan-kloma ki ngias maas nakbua se Yerusalem. Oen dalen nas kom naseke in muid Ama Lamtua Allah. 6Nikit oen ming haup hoos na kon, oen maas nakbua se maan na. Kon oen mesa-mesam ming haup oen dasi-dehet esan deng, Lamtua Yesus atulin nas. Undeng na, tiata oen hera-herang. 7Oen totoang hera-herang le tek apa noan, “Atuli-atuil in aang nias totoang, atuil Galilea ta loo? 8Mo taon elola le kit ming oen aa nini kit mesa-mesam dasi-dehet tia? 9Kit mamo maang deng propinsi Patia, Media, Elam, Mesopotamia, Yudea, Kapadokia, Pontus, Asia, 10Frigia, Pamfilia, Mesir, deng Libia man dani nol kota Kirene; ela kon kit tenga lias maang deng kota Roma; 11muik in maa kon deng nusa Kreta, nol teng deng dale Arab. Kit tenga lias atuil Yahudi, nol muik kon atuil deng bangsa-bangsa didang, man tamas daid agama Yahudi. Molam kit totoang ming haup atuil nias aa deng sa-saa in muun isi, man Ama Lamtua Allah in daek hidi son nas nini kit dasi-dehet mesa-mesa. Wuih, ni muun isi!”

12Oen totoang ngaa-bahan le ketan apa mes nol mesa noan, “Taon elola le daid ela lia le? Un nahin na elola le?”

13Mo muik atuil didang dehe, man bilu-aa one. Oen tek noan, “Hoeh! Toe mudis deken! Ta oen mahus ngele isi!”

Petrus nikit in aa se atuli hut mamo silan

14Petrus nol Lamtua Yesus aan in nutus at hngul esa kas se na. Kon Petrus keko lako el muka-mata lua, le un nikit in aa nol atuil hut mamo man in maa nakbua se na ngas. Un aa mumuun noan, “Ina-amang nol kaka-paling totoang! Mi man atuil Yahudi, nol mi man maa le daad se kota Yerusalem! Tidi mi hngilan nas le hii auk in aa nia, ta auk le tek mi totoang, mo mi musti nangan auk in aa ni babanan. 15Mi bali noan atuil nias mahus se? Loo! Nangan, ta taon elol le atuli niun mahu oskaong bii nia? Salolen le halas-sam diuk sipa! 16Mo mi ming atuil nias aa nini mi dasi-dehet mesa-mesa. In toma ka elia: dedeng na, Ama Lamtua Allah nini Un mee-baha mesa, ngala Yoel, le tek meman deng dais man noan:

17‘Ama Lamtua Allah tek noan, “Eta lelo-lelon nas mana le hidis sam,

Auk le boho Auk Koo Niu ki lako se atuli las totoang.

Se mi anan biklobe las, nol mi anan bihata las,

le Auk taos daid Auk mee-baha.

Mi anan muda kas,

mam ngat net asa man Auk in le tulu-balang bel one ngas.

Nol mi atuli-atuil blalan nas,

mam natloa haup asa man Auk in le tulu-balang bel one ngas.

18Tom nol lelo-leol man in mana le hidi ngas sam,

Auk bel Auk Koo Niu ki lako se Auk atulin in loka-loka ngas totoang.

Auk belen lako se biklobe las,

nol Auk belen lako se bihata las.

Le halin mam oen dehet asa man Auk in tek one ngas.

19-21Mam Ama Lamtua Lelon na maa. Mo Lelon na maa lius lo bii kam,

Auk tulu tada-taad herang se apan-dapa ku muna.

Taad herang nas tuladang el, lelo la dadi mitang;

nol bulan na kon daid mea, banansila el dala ka.

Auk kon le daek dasi-dais in muun isi se apan-kloma kia.

Dasi-dais nas banansila el, dala, ai, nol nus mitang buan-buan sakes lakos bus el apan-dapa kua.

Mo mam lius oras na, asii man haman le nodan tulung se Ama Lamtua Allah lam,

un man haup boa-blingin.” ’#Yoel 2:28-32

Yoel in teka ka ela.

22Tiata kaka-pail atuil Israel me! Tidi mi hngilan nas, le hii asa man auk in teka nia. Ama Lamtua Allah tulu nal Yesus, Atuling Nasaret ta son. Kaim tanan son noan, na toma, undeng kaim net esan son, Ama Lamtua Allah pake Yesus le daek tada-taad herang, nol daek dasi-dais man in muun dui hihidi ngas. Mi kon taan dais nias, undeng Yesus tao tada-taad herang nas se mi hlala son. 23Mo mi keo tele Una, hidim mi laok aa nol atuil daat tas, le pauk tele Un se kai sangsuli la dapa. Molota, Ama Lamtua Allah taan nas totoang son deng lolo hmunan nua, nol baktebes daid muid Un in ator son na.#Matius 27:35; Markus 15:24; Lukas 23:33; Yuhanis 19:18 24Meman mi tao ela, didiin Un mate baktetebes son. Mo Ama Lamtua Allah kom le Yesus mate napiut lo. Undeng na, le Ama Lamtua sao Un deng hmate ka in kuasa ka, halin Un haup in nuli pait. Tiata hmate ka in kuasa ka nal Un pait lo son.#Matius 28:5-6; Markus 16:6; Lukas 24:5

25Hmunan nu laih Daud dul meman son deng Yesus elia:

‘Auk tana le Ama Lamtua leo-leo nol auk tutungus.

Tiata muik tahan asa mes lo kon, man tao nahu nal au,

undeng Ama Lamtua Allah se auk halin ni tutungus.

26Tiata auk daleng ngi kolo;

hidim auk naka-nahalit Un tutungus,

nol auk kon hii-natang Una.

27Ta Un nang soleng auk hmanging ngi napiut se atuil in mate ngas mana la lo.

Nol Ama Lamtua nang Un Atulin Niu ka aap-sisin na, le daat se bolo dalen lo.

28Ama Lamtua tulu bel auk lalan in nuil toma ka son.

Undeng na, auk daleng ngi kolo isi,

lole Ama Lamtua leo-leo nol auk tutungus.’#Buk in Naka-nahalit 16:8-11

Ni man laih Daud dul pesang son lolo hmunan nua.

29Elia kaka-paling totoang! Bel auk dola, le auk tek mi langa-langa deng kit upun Daud. Un in aa na, un aa deng un apa ka esa lo. Undeng un mate le puan son, nol un utu ka ne kit hlala kia, maa pes leol neot nia. 30Laih Daud na mo, daid Ama Lamtua Allah mee-baha. Nol un tana le Ama Lamtua hid nini sumpa noan, mam laih Daud in hua-koet mes man kil prenta. Atuling na, man Ama Lamtua tulu meman son deng lolo hmunan nua.#Buk in Naka-nahalit 132:11; Samuel dua la 7:12-13 31Dedeng na, laih Daud ngat katang laok el mata lua. Nol Un tek muna deng Atuling man Ama Lamtua in tulu meman son na. Mam Atuling na mate, mo Un nuli pait deng Un in mate ka. Hidim laih Daud kon tek noan, Atuling na daad napiut se atuil in mate ngas mana la lo, nol un aap-sisin na kon daat lo.

32Atuling man laih Daud in teka-tek son na, Yesus! Ama Lamtua Allah bel Un nuli pait son, deng Un in mate ka. Kaim totoang nias net Un in nuli pait ta, nini kaim matan beas esan! 33Tiata halas nia, Ama Lamtua Allah nikit sakeng Yesus son, le kil pangkat in lapa dudui. Hidim Un daad ne Ama Lamtua Allah halin kanan na, se mana, man Ama Lamtua Allah tao pesang meman son na. Nol Un Ama ka, Lamtua Allah belen Koo Niu ka, muid asa man Un hidan meman son, lolo hmunan nua ka. Hidim Un Ama ka kon hid le bel Un Koo Niu ka bel kita. Tiata asa man mi in ming, nol mi in neta nia, Ama Lamtua bel Un Koo Niu ka. 34Laih Daud esa sake lako sorga lo, mo un dul noan,

‘Ama Lamtua Allah tek auk Lamtuan na noan,

“Daad se Auk halin kanan nia, se mana, man Auk tao pesang meman son nia,

35didiin Auk tao Ku musu las le suda muid se Ku.” ’#Buk in Naka-nahalit 110:1

36Undeng na le totoang atuil Israel lias musti taan baktetebes deng Yesus, man mi pauk tele son se kai sangsuli lu dapa ka. Un na mo, Kristus, man Ama Lamtua Allah hulin meman son deng hmunan nua ka. Nol Un kon daid kit Lamtuan!”

37Ming ela kon atuli las dalen nas dudus. Kon oen keket Petrus nol aan in nutus tenga las noan, “Kakas totoang! Kaim musti tao elola la?”

38Kon Petrus situs noan, “Mi mesa-mesam musti nang soleng mi in kula-sala ngas totoang, le muid se Ama Lamtua. Hidi na lam, mi musti nodan le haup in sarani, halin daid tada noan, mi bali muid Yesus Kristus Lalan in Nuli ka son. In sarani na kon daid tada noan, Ama Lamtua kose soleng mi in kula-kula ngas son. Hidim mi kon haup Ama Lamtua Allah Koo Niu ka.

39Lole Ama Lamtua Allah hid dais na meman son, bel totoang atuil man in tama son le daid Un atulin na. Nini ela lam, Un in hida ka bel mia, nol mi in hua-koet tas, nol bel atuil didang ngas kon.”

40Petrus aa mamo nol oen nabael ela le tekas noan, “Halas nia, atuli mamo sose deng lalan in nuil toma ka son. Tiata mi musti doha-tidu, le halin tao muid atuil daat tas lalan na deken. Molam mi musti tao muid Ama Lamtua Allah lalan lolo ka tuun. Nini ela lam, mi haup in nuli napiut nol Una.”

41Kon nam, atuil hut mamo nas sium Petrus in aa nol oen ela ka. Hidim oen tamas le muid Yesus Lalan in Nuli ka, nol nodan le haup in sarani. Tiata leol neot na kon, atuli lihu tilu, tamas nakbuan nol Yesus atulin nas. 42Oen kom in nakbuan leo-leo nol atuil didang man in muid Yesus sas. Nol oen daek banan saol apa, mes nol mesa. Lelo-lelon nam oen makoe isi in hii-ming Lamtua Yesus anan in nutus sas in tui ka. Oen kom in kohe-kanas leo-leo. Nol oen kon, kom in kaa leo-leo nol Lamtua Yesus atulin nas.

Atuil in parsai ngas lalan in nuli ka

43Dedeng na, Lamtua Yesus anan in nutus sas tao taad herang mamo, didiin atuli las totoang hera-herang, nol oen kon lii. 44Atuli-atuil in muid Lamtua Yesus Lalan in Nuli ka ngas nakbua, nol nuil koo-dalen mesa, didiin asa tuun man oen nena kam, oen pake leo-leo.#Dehet deng Aan in Nutus sas 4:32-35 45Hidim muik in hee oen hmuki-nalan nas nol pusaka las, le bating un duit ta bel atuil in parsai tenga las, muding mesa-mesam in parlu. 46Lelo-lelon nam, oen kom in nakbua se Ama Lamtua Allah Um in Kohe-kanas Tene ka. Oen kon tutnaal apa, le kaa nakbua deng uma mesa laok uma mesa, nol dael kolo. Nol oen totoang kom in hulung apa mes nol mesa, oen kon kila' apa lo. 47Lelo-lelom oen totoang naka-nahalit Ama Lamtua Allah tutungus. Totoang atuil in nakbuan nol oen lo ngas kon, kom oen isi. Lelo-lelom Ama Lamtua Allah bel slamat atuli, hidim oen tamas le nakbua nol Lamtua Yesus atulin nas. Tiata oen mamo keko lako.

Currently Selected:

Dehet deng Aan in Nutus sas 2: heg

Highlight

Copy