Matie 2

Woo mà ŋa à naa Jesu ku cɔ hai nunui daakɔ

1À bí Jesui Betelehɛmu si ilɛi Zudee si waatii ilaalu Herodu. Si anyii kubíɛ woo mà yaasei leleaɔ̃ gɔ ŋa à naa Zeruzalɛmu hai nunui daakɔ, 2nɔ à bee à ni, iwoi ilaalui Zuifu ŋa iyi à bí nsɛiu í wa. Hai nunui daakɔi à yɛ leleaɔ̃ɛ í fita, ŋɔi à naa ku tɔɔɛ.

3Iyi ilaalu Herodu í gbɔ ideu, ŋɔi inɔɛ í fɔ, bɛɛbɛ mɔi inɛi Zeruzalɛmu ŋau fei inɔ nŋa í fɔ. 4Ŋɔi í tɔtɔɔ inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa fei nɔ í bee ŋa tengi bii à ni aa bí inɛ iyi Ilaaɔ̃ í cicau. 5Ŋɔi à jɛaa à ni, Betelehɛmui si ilɛi Zudee domi bɛɛbɛi walii Misee í tako í kɔɔ wo, 6í ni,

Ilaaɔ̃ í ni,

iŋɛ inɛi Betelehɛmu ŋa, si ilɛi Zudaa,

ntɔ ntɔ, ilu nŋɛ kù kere si ilu nlai Zudaa ŋa fei,

si na iyi í jɔ̀ hai si ilu nŋɛi ilaaluu á fita

inɛ iyi á gbã inɛi Izirɛli, inɛm ŋa.#2:6 Cɔ Misee 5:1-2.

7Ŋɔi Herodu í jɔ̀ à kpe woo mà ŋau do asii, í bee ŋa si waati iyi leleaɔ̃u í fita dee dee. Nɔ à sɔ̃ɔ. 8Iyi í gbɔ bɛɛbɛ nɔ í sɔ̃ ŋa í ni a bɔ Betelehɛmu a koo a bee yaasei amau wa sãa sãa. Bii à yɔɔ nɔ a nyi wa a naa a sɔ̃ nŋu ku ba nŋu mɔ nŋu koo gulɛaa.

9Iyi à gbɔ ideɛu à tã, ŋɔi à dasi kpãa. Nɔ leleaɔ̃ iyi à tako à yɛ hai nunui daakɔu í nyi í cua nŋa má hee tengi bii amau í wa, í bɛi í leekĩ lele bɛ cau. 10Iyi à yɛ leleaɔ̃u í leekĩ bɛɛbɛ, ŋɔi inɔ nŋa í dɔ̃ hee í caa. 11Nɔ à lɔ ile bɛ ŋɔi à yɛ amau do Maari iyeɛ. Nɔ à gulɛ à tɔɔɛ. Nɔ à fũ bɔgɔi amani nŋa à nya wura à muaa, do tuae iyi à ya jo do ikpo ku dɔ̃ inunu iyi à ya kpe miru.

12Si anyiɛ Ilaaɔ̃ í sɔ̃ ŋa si ala í ni a maà nyi bi ilaalu Herodu má. Nɔ à too kpãa mmu à nɛò ilɛi ide nŋa.

Zozɛfu ŋa à sa à nɛ ilɛi Ezibiti

13Iyi woo mà ŋau à to anyi à nɛ, nɔ amalekai Ilaaɔ̃ í naa bi Zozɛfu si ala í ni, dede i so amau do iyeɛ i sa i nɛò ŋa ilɛi Ezibiti, domi Herodu á dɛ amau ku kpa. I koo i buba bɛ titã hee ajɔ iyi an na n ni i nyi wa má ŋa.

14Na ŋɔi í jɔ̀ Zozɛfu í dede idũ í so amau do iyeɛ í nɛò ŋa Ezibiti. 15Bɛi à buba hee Herodu í koo í ku. Iyi bɛ í cei ku ba ide iyi Aɔ̃ Lafɛ̃ɛ í sɔ̃ walii Ozee ku sisia inɛ ŋau ku kɔ̃, si bɛi í ni, hai Ezibitii ǹ kpe amam wa.#2:15 Cɔ Ozee 11:1.

À kpa ama keeke ŋa

16Ŋɔi ilaalu Herodu í yɛ iyi woo mà leleaɔ̃ ŋau à lɛlɛ nŋui, ŋɔi idɔɛ í kɔ̃ jiida jiida. Ŋɔi í ce dooi waati iyi woo mà ŋau à yɛ leleaɔ̃u í fita, ŋɔi í jɔ̀ à koo à kpa ama inɛmɔkɔ kpɔtɔɔ ŋa hee ku koo si do amai adɔ̃ minji ŋa fei si ilui Betelehɛmu do ilɛɛkoɛ ŋa fei. 17Bɛɛbɛi ide iyi walii Zeremi í fɔu í ce. Í ni,

18à gbɔ anu ku dɔ̃ si ilui Rama.

À gbɔ kukpata do buubuu ku cã.

Asee, Rasɛlii wa kpata na irii amaɛ ŋa.

Nɔ à bɔ ku lɛlɛɛ,

amma kù jɛ ku gbɔ kulɛlɛu

domi amaɛ ŋa a kù wɛɛ má.#2:18 Cɔ Zeremi 31:15.

Zozɛfu ŋa à baa hai ilɛi Ezibiti

19Si anyiɛ Herodu í na í ku, ŋɔi amalekai Ilaaɔ̃ í naa bi Zozɛfu si ala ilɛi Ezibiti bɛ, 20í ni, dede i so amau do iyeɛ i nyiò ŋa ilɛi Izirɛli. Inɛ ŋa iyi à waa dɛ amau ku kpa à ku.

21Nɔ Zozɛfu í dede í so amau do iyeɛ à nyi ilɛi Izirɛli má. 22Amma í gbɔ iyi Aakelausii í jɛ bommai baaɛ Herodu si ilɛi Zudeeu, ŋɔi wa ce njoi ku bɔ ku buba bɛ. Nɔ Ilaaɔ̃ í sɔ̃ɔ si ala má í ni ku bɔ ilɛi Galilee. Ŋɔi í tekĩ í bɔ Galilee si bɛi Ilaaɔ̃ í sɔ̃ɔ. 23Nɔ í koo í buba ilui Nazarɛti. Bɛɛbɛi idei walii ŋau í kɔ̃, si bɛi à ni aa kpoo inɛi Nazarɛti.

Currently Selected:

Matie 2: MKL

Highlight

Copy