Malasi 1
1
1Aɔ̃ Lafɛ̃ɛ í ba inɛi Izirɛli ŋa ide ku fɔ hai do bi Malasi.
Izirɛlii Aɔ̃ Lafɛ̃ɛ í cica
2Aɔ̃ Lafɛ̃ɛ í ni, ǹ bi iŋɛ inɛi Izirɛli ŋa. Amma ì ya fɔi i maa ni ŋa, mii wa nyisi iyi ì bi wa. Nɔ ǹ ni, Esau kù jɛ igbãi Zakɔbu? Do nŋu fei Zakɔbui ǹ bi 3nɔ ǹ kɔ̀si Esau. Ǹ lɛgɛ iri kutaɛ ŋau nɔ ǹ jɔ̀ ilɛɛu í baa í jɛ bi kuwai ajaako ŋa. 4Inɛi Edɔmu dimii Esau ŋa aa ni, à lɛgɛ ilu nwa ŋa, amma aa ka teese ka ma ŋa má. Amu Aɔ̃ Lafɛ̃ɛi lele do ilɛ ǹ ni, baa bii à teese à ma ŋa má, an nyi n kɛkɛ ŋa mái. Nɔ aa ya maa kpe ilɛ nŋau ilɛi woo ce laalɔ ŋa iyi idɔɔkɔ̃i amu Aɔ̃ Lafɛ̃ɛ í wa si hee do ajɔ fei. 5Iŋɛ inɛi Izirɛli ŋa iju nŋɛ á yɔɔ, nɔ aa fɔ ŋai i ni ŋa, Aɔ̃ Lafɛ̃ɛ gbugbãɛ í lɔ kɔɔi ilɛi Izirɛliu.
Aɔ̃ Lafɛ̃ɛ wa fa laakaii woo wee ŋa
6[Aɔ̃ Lafɛ̃ɛi lele do ilɛ wa ba woo wee ŋa ide ku fɔ wa ni,] ama í ya mà bɛɛrɛi baaɛi, amaacɛ mɔ í ya jirima lafɛ̃ɛɛi. Bii ǹ jɛ baa nŋɛi, bɛirei ì waa nyisiò bɛɛrɛm ŋa. Bii ǹ jɛ lafɛ̃ɛ nŋɛi hee iwoi jirimam iyi ì nɛ í wa ŋa. Iŋɛ woo wee ŋau, ì waa yaakom nɔ ì waa ni ŋa, si iwoi à waa yaakoɛ. 7Ì ya maa ceem kuwee ŋa do ijɛ ŋa iyi a kù maaju si bi kuweem nɔu. Nɔ ì ya fɔ i maa ni ŋa, si iwoi à jɔ̀ iriɛ í so riisi. Ì jɔ̀ í so riisi ŋai si na iyi í jɔ̀ i kù saalu bi kuweem nɔu ŋa. 8Ì ya maa ce kuwee ŋai do mɛɛmu gɔ ŋa iyi à fɛɛju, walakɔ iyi kutɛ akã nŋa kù waa nɛ baani, walakɔ mɛɛmu bɔ̃ɔ. Iyi bɛ kù jɛ mii laalɔ? Ǹ wa n bee ŋɛi amu Aɔ̃ Lafɛ̃ɛi lele do ilɛ, bii ì waa kooa ilu ilɛ nŋɛ mɛɛmu dimii bɛɛbɛ ŋa, á nɛ si inɔ didɔ̃? Á gbaa do inɔ akã mbɛ? 9Nsɛi, i tɔɔ amu Aɔ̃ Lafɛ̃ɛ nŋɛ ku ba n ce nŋɛ didɔ̃. Ì waa tamaa an gba ŋɛ do inɔ akã ŋai? Aawo, domi laalɔi ì ce ŋa. Amu Aɔ̃ Lafɛ̃ɛi lele do ilɛi ǹ fɔ bɛɛbɛ. 10Inɛ akã nŋɛ í nɛ koo cĩmbo gamboi kpasɛ̃m ŋaui wo ku ba i maà naa i koo i maa ko ina si ngbɛ bi ku ce kuweem nɔu ŋa. N kù nɛ inɔ didɔ̃ si ŋɛ, nɔ bɛɛbɛ mɔi kuwee ŋa iyi ì waa ceem ŋa kù waa dɔ̃ɔm si. 11Hai nunui daakɔ hee ku bɔ nunui alɛ inɛi andunya ŋa fei à mà bɛɛrɛm. À ya maa joom tuae ŋa bii fei, nɔ à ya maa ceem kuwee ŋa ku ba a nyisiò bɛɛrɛi irim. Do ntɔ inɛi andunya ŋa fei à mà bɛɛrɛm. 12Amma iŋɛ ì waa riisi irim ŋai, domi ì waa ni ŋa, bi kuweei Aɔ̃ Lafɛ̃ɛu í riisi nɔ sɔnda ncɛɛ kãma kù wa si. 13Ì ya fɔ i maa ni ŋa icɛ ngbɛi ì waa cea ara nŋɛ. I kù saalum ŋa. Ì ya maa ceem kuwee do mɛɛmu ŋa iyi ì ce ile wa ŋa, do iyi kutɛɛ kù waa nɛ baani, walakɔ iyi wa ce bɔ̃ɔ. Kuwee ŋa iyi ì waa ceem ŋa mbɛ. Ì waa tamaa si bɛi an gba ŋa ŋai? 14Ikpei á jɛ ti inɛ laalɔ iyi í nɛ mɛɛmu akɔ iyi wa nɛ baani nɔ í mu iyi kù waa nɛ baani wa ceem do kuwee. Amu Aɔ̃ Lafɛ̃ɛi lele do ilɛ, ilaalu nla nlai ǹ jɛ nɔ inɛi andunya ŋa fei à mà bɛɛrɛm.
Currently Selected:
Malasi 1: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
