Luku 7

Jesu í jɔ̀ amaacɛi sooge inɛ ngbo gɔ í ba iri

(Cɔ Matie 8:5-13)

1Iyi Jesu í sɔ̃ inɛ ŋa ideu fei í tã, ŋɔi í bɔ Kapɛranumu. 2Wee inɛ ngboi sooge cĩɔ gɔ í wa bɛ. Inɛ ngbou í nɛ amaacɛɛ, nɔ í buui jiida jiida. Amaacɛui wa ce bɔ̃ɔ hee wa bi ku ku. 3Ŋɔi inɛ ngbou í gbɔ baaui Jesu, nɔ í bɛ inɛ ngboi Zuifu gɔ ŋa bi tɛɛ a koo a tɔɔɛ ku naa ku faaba amaacɛi nŋu. 4Ŋɔi inɛ ŋau à koo. Iyi à to bi Jesu, ŋɔi à tɔɔɛ suuru ntɔ ntɔ à ni mɔkɔu í to i sobiɛ 5domi í bi dimi nwa. Nŋui í nɔ í ma nwa ile bii à ya ka ce kutɔtɔɔu bɛ.

6Nɔ aŋaò Jesu ŋa à dasi kpãa à waa nɛ hee à maai kpasɛ̃u, ŋɔi inɛ ngbou í bɛ kpaasiɛ gɔ ŋa a koo a sɔ̃ɔ a ni, Lafɛ̃ɛ, inɛ ngbou njɛ í ni i maà taabi araɛ, domi nŋu kù to i lɔ wa kpasɛ̃i nŋu. 7Na ŋɔi í ce mɔm í yɔɔ iyi nŋu kù to nŋu ku naa bi tɛɛ do arai nŋu. Amma í ni i fɔ ide nŋu akã wa, amaacɛi nŋu á ba iri. 8Nɔ í ni baa nŋu takai nŋu, idei inɛ ngboi nŋu ŋai nŋu wa gbɔ, nɔ nŋu mɔ í nɛ sooge ŋa iyi wa gbã. Bii nŋu í sɔ̃ inɛ akã nŋu í ni ku bɔ ihɔ̃, í ya kooi. Bii nŋu í nɔ í kpe inɛ gɔ nŋa í ya naai. Nɔ bii nŋu í sɔ̃ amaacɛi nŋu gɔ nŋu í ni ku ce iyi ihɛ̃ í ya cooi.

9Iyi Jesu í gbɔ ideu í biti, nɔ í sinda í sɔ̃ zamaa iyi wa tooɛu í ni, ǹ wa n sɔ̃ ŋɛi, baa si inɔi inɛi Izirɛli ŋa fei n kù yɛ inɛ iyi í yɔkɔ í dasim naanɛ nla nla bɛi inɛɛu ihɛ̃. 10Iyi Jesu í fɔ bɛɛbɛ í tã ŋɔi amaabɛ ŋau à nyi kpasɛ̃, nɔ à ba amaacɛu í ba baani.

Jesu í jĩ amai abo jaaɔ̃ gɔ iyi í ku

11Si anyiɛ ŋɔi Jesu í bɔ ilu gɔ iyi à ya kpe Nayini. Mɔcɔɛ ŋa do zamaa nla gɔ à waa tooɛ. 12Waati iyi í maai si gamboi bindii iluu, í yɛ à so ikui ama awaasũ gɔ à waa bɔ ku suu. Ama awaasũu nŋu akãi iyeɛ í bí nɔ iyeu jaaɔ̃i. Inɛi inɔ ilu nkpɔ nkpɔi wa too fitii abou. 13Iyi Lafɛ̃ɛ í yɛ abou ŋɔi araare í muu, nɔ í sɔ̃ɔ í ni, maà kpata. 14Ŋɔi í sɛkɛɛ si ŋa í lu mii ku so ikuu nɔ inɛ ŋa iyi à waa soou à leekĩ. Nɔ Jesu í ni, awɔ awaasũ, ǹ wa n sɔ̃ɛi, dede. 15Nɔ awaasũ iyi í kuu í dede í buba wa fɔ ide. Nɔ Jesu í sindoa iyeɛ. 16Ŋɔi njo í mu aŋa fei, nɔ à saabu Ilaaɔ̃ à waa ni, walii ilu gbugbãi í naa si wa. Nɔ à waa ni má, Ilaaɔ̃ í naa bi inɛɛ ŋa ku ba ku sobi ŋa.

17Ŋɔi ideu í fangaa si ilɛi Zudee do si ilɛɛkoɛ ŋa fei.

Inɛ ŋa iyi Zãa woo dasi inyi í bɛ

(Cɔ Matie 11:2-19)

18Ŋɔi mɔcɔi Zãa ŋa à koo à baa ile piisɔ̃ɔ bɛ à sisiaa mii ŋau bɛ fei. Nɔ í kpe amanɛ minji si inɔ nŋa, 19í bɛ ŋa bi Lafɛ̃ɛ a beeɛ a ni, awɔi ì jɛ inɛ iyi Ilaaɔ̃ á na ku bɛ wau? Mà ka degbe inɛ mmu gɔ. 20Iyi à to wa bi Jesu, ŋɔi à sɔ̃ɔ à ni, Zãa woo dasi inyiui í bɛ wa ka naa ka beeɛ ka ni, awɔi ì jɛ inɛ iyi Ilaaɔ̃ á na ku bɛ wau? Mà ka degbe inɛ mmu gɔ.

21Wee si waati nŋu bɛi, Jesu í jɔ̀ bɔ̃ɔ nkpɔ do kɔ̃ɔ ŋa à waa ba iri, nɔ wa lele inɛi inɔɔko ŋa hai si inɛ gɔ ŋa, nɔ í jɔ̀ fɛɛju nkpɔ í yɛ ilu má. 22Nɔ í jɛa amaabɛ ŋau í ni, i koo i sisia Zãa mii iyi ì yɛ do iyi ì gbɔ ŋa. Fɛɛju ŋa à waa yɛ ilu, woo sukutɛ ŋa à waa nɛ dee dee, dintɛ ŋa à ba iri à jɛ inɛ kumaaju, dekĩ ŋa à waa gbɔ ide, iku ŋa à jĩ, nɔ à waa waazoa ilu are ŋa laabaau jiidau. 23Ilu inɔ didɔ̃i inɛ iyi kaa nyiò anyi si naanɛ ku dasiɛ na irim.

24Iyi amaabɛi Zãa ŋau à gbɔ bɛi Jesu í fɔ, ŋɔi à sinda à nɛ. Waati iyi à waa nɛ, ŋɔi Jesu í lɔsi ku sisia zamaau idei Zãa í ni, mii ì bɔ ku cɔ gbaau ŋa. Fɔfɔ iyi fufu wa yaya? Aawo. 25To, mii ì bɔ ku cɔ ŋa. Mà mɔkɔ iyi wa dasi ibɔ kusĩau? Aawo, inɛ ŋa iyi à waa dasi ibɔi fia nkpɔ nɔ à wa si inɔi amani nla nla, aŋai à ya wa kabai ilaalu ŋa. 26To, mii ì bɔ ku cɔ ŋa. Mà waliii ì bɔ ku cɔ ŋa. Oo, ntɔ ntɔ an sɔ̃ ŋɛ, inɛɛu bɛ í re baa walii. 27Zãai kukɔi idei Ilaaɔ̃ wa fãa tengi bii í ni, Ilaaɔ̃ í ni,

wee ǹ bɛ woo sisi idem wa si wajuɛ

iyi á teeseɛ kpãaɛ.#7:27 Cɔ Malasi 3:1.

28An sɔ̃ ŋɛ, si inɔi inɛ ŋa iyi inaabo ŋa à bí fei, kãma nŋa kù wɛɛ iyi í re Zãa. Amma do nŋu fei, baa inɛ iyi í kere í re si bommai Ilaaɔ̃ í roo.

29Nɔ Jesu í ni má, inɛ ŋa iyi à gbɔ idei Zãa fei hee do woo gba fiai lɛmpoo ŋa fei à jɔ̀ Zãa í dasi ŋa inyi nɔ nŋu bɛ wa nyisi iyi à mà iyi Ilaaɔ̃ í jɛ dee dee. 30Amma Farisi ŋa do woo kɔ inɛ ŋa si wooda ŋa a kù jɛ Zãa ku dasi ŋa inyi. Bɛɛbɛ mɔi à kɔ̀si mii iyi Ilaaɔ̃ í dasi idɔ ku ce nŋa.

31Ŋɔi Jesu í ni, yooi an wãò inɛi nsɛi ŋau ihɛ̃. Yooi à jɔ. 32À jɔ amu ŋa iyi à waa buba bantuma, à sɔ̃ njɛ à waa ni, à fã nŋɛ yee nɔ i kù jojo ŋa, nɔ à kɔ̃ nŋɛ irii iku ŋa nɔ i kù kpata ŋa. 33Ǹ ni bɛɛbɛi si na iyi í jɔ̀ waati iyi Zãa woo dasi inyi í naa, í ya dĩ anu, ci ya mɔ vɛ̃ɛ, nɔ ì ni í nɛ inɛi inɔɔko ŋa. 34Nɔ iyi amu Amai Amanɛ ǹ naa, ǹ ya n jɛ nɔ n maa n mɔ, nɔ ì ni ŋa ǹ bi ijɛ nɔ ǹ jɛ woo mɔ atɛ̃ nɔ ǹ jɛ kpaasii woo gba fiai lɛmpoo ŋa do ilu dulum ŋa. 35Do nŋu fei, à yɛ iyi bisii Ilaaɔ̃ í jɛ dee dee na icɛ ŋa iyi wa ce.

Jesu wa jɛ kpasɛ̃i Farisi* gɔ

36Farisi gɔ í kpe Jesu ku jɛ bi tɛɛ ajɔ nŋu gɔ. Nɔ Jesu í lɔ ileɛ í buba wa jɛ. 37Wee abo à ta icu gɔ í wa ilu bɛ. Iyi í gbɔ à ni Jesu wa jɛ kpasɛ̃i Farisiu, ŋɔi í naaò tuae wa si ama caka kusĩa gɔ. 38Abou í naa í wai kɔkɔi Jesu bi isɛɛ ŋa. Wa kpata nɔ cikãajuɛ ŋa wa tontoo si isɛɛ hee í cɔɔ, nɔ wa gbãa do ntoi iriɛ ŋa, wa cɔ̃ɔcɔ̃ɔɛ, í fã siɛ tuaeu. 39Farisi iyi í kpe Jesu ku jɛu, iyi í yɔɔ, ŋɔi í fɔ si idɔɛ í ni, bii mɔkɔu ihɛ̃ waliii, á mà dimii inaabo iyi wa luu ihɛ̃ domi woo ta icui. 40Nɔ Jesu í ni, Simɔɔ, ǹ nɛ ide gɔ iyi an sɔ̃ɛ. Nɔ í ni, fɔ, Mɛɛtu.

41Ŋɔi Jesu í ni, mɔkɔ gɔ í wɛɛ iyi amanɛ minji wa mu gbeseɛ. Inɛ akã wa mu kpɛkɛlɛ cĩɔ miiu, inɛ akã mɔ ciitaa. 42Nɔ wee a kù nɛ mii iyi aa sãaò, nɔ í cea aŋa minji fei suuru. To, si aŋa minjiu, yoo nŋai á bi mɔkɔu ku re. 43Nɔ Simɔɔ í jɛaa í ni, ǹ tamaa inɛ iyi gbeseɛ í reui. Ŋɔi Jesu í sɔ̃ɔ í ni, ntɔi ì fɔ.

44Iyi í ni bɛɛbɛ í tã, ŋɔi í sinda si inaabou nɔ í sɔ̃ Simɔɔ í ni, ì yɛ abou ihɛ̃? Iyi ǹ lɔ wa kpasɛ̃ɛ i kù muum inyi n wiɛ kutɛm, amma abou ihɛ̃ í cɔ̀ kutɛm do cikãajuɛ ŋa, nɔ í gbãa do ntoi iriɛ ŋa. 45I kù cem fɔɔ do kucɔ̃ɔcɔ̃ɔ amma abou ihɛ̃, hai waati iyi ǹ lɔ wa, kù jɔ̀ kutɛm ku cɔ̃ɔcɔ̃ɔ. 46Nɔ i kù jɔsi irim ikpo, amma abou ihɛ̃, í fãsi isɛm tuae. 47Na ŋɔi í jɔ̀ ǹ wa n sɔ̃ɛ kubi nlai abou ihɛ̃ wa nyisi iyi Ilaaɔ̃ í kpa idei dulum dɛɛ, baa do iyi í kpɔ fei. Amma inɛ iyi à cea suuru keeke, kubiɛ mɔ keekei. 48Ŋɔi í sɔ̃ abou í ni, à kpa idei dulum dɛɛ. 49Inɛ ŋa iyi à waa jɛ aŋaò ŋau, à bee njɛ ide à waa ni, dimii amanɛ yoomai ihɛ̃ iyi á yɔkɔ ku kpa idei dulum dii amanɛ ŋa. 50Nɔ Jesu í sɔ̃ abou í ni, naanɛɛi í faabaɛ. Koo nɛ do laakai ku sũ.

Currently Selected:

Luku 7: MKL

Highlight

Copy