Luku 5

Jesu wa kpe mɔcɔ sinteɛ ŋa

(Cɔ Matie 4:18-22; Maaku 1:16-20)

1Ajɔ nŋu gɔ Jesu wa leekĩ kɔkɔi tenku iyi à ya kpe Zenezarɛti, nɔ zamaa nla gɔ wa manteɛ ku ba a gbɔ idei Ilaaɔ̃. 2Nɔ í yɛ akɔi inyi minji itĩi tenkuu bɛ. Amma sɔɔkɔ ŋau à fita à waa wiɛ taao nŋa ŋa. 3Nɔ Jesu í lɔ inɔ akɔi inyi akã. Akɔi inyi iyi í lɔ siu ti Simɔɔi. Nɔ í kpe Simɔɔ í tɔɔɛ í ni ku na ku sɛkɛɛò akɔu hai itĩi inyiu keeke. Ŋɔi í buba si inɔi akɔu, wa kɔ zamaau si cio.

4Iyi í fɔ ideɛ í tã nɔ í sɔ̃ Simɔɔ í ni, bɔò akɔu si bua, nɔ i le taao nŋɛ ŋa si inyiu i mu cɛ̃ɛ ŋa. 5Ŋɔi Simɔɔ í sɔ̃ɔ í ni, Mɛɛtu, à ce icɛ do idũ fei a kù mu ngɔgɔ. Amma si bɛi awɔi ì fɔ, an dasi taao ŋau inɔ inyi.

6Ŋɔi à dasi taao nŋa ŋau inɔ inyi. Iyi à dasi ŋɔi à mu cɛ̃ɛ bututu hee taao nŋa ŋau à waa bi a ga. 7Nɔ à kpe kpaasi nŋa ŋa iyi à wa si akɔ minjisiau do awɔ a naa a sobi ŋa. Iyi aŋa mɔ à naa nɔ akɔ minjiu fei í kɔ̃ do cɛ̃ɛ hee wa bi ku mi. 8Iyi Simɔɔ Piɛɛ í yɛ mii nɔu í ce bɛɛbɛ ŋɔi í koo í gulɛ si wajui Jesu í ni, Lafɛ̃ɛ, tɛkɛɛ hai bi tom, domi amu ilu dulum nii. 9Í fɔ bɛɛbɛi si na iyi í jɔ̀ njo í muu, nŋu do kpaasiɛ ŋau fei na cɛ̃ɛ nkpɔ nkpɔ iyi à muu. 10Bɛɛbɛ mɔi njo í mu kpaasi minjiɛ ŋa, Zaaki do Zãa amai Zebedee ŋau. Amma Jesu í sɔ̃ Simɔɔ í ni, maà jɔ̀ njo ku muɛ. Bɛbɛi inɛ ŋa iyi aa toom ŋai aa ya maa dɛdɛ. 11Ŋɔi à bɔò akɔi inyiu ice nɔ à jɔ̀ fei ndɛɛ à waa too Jesu.

Jesu í jɔ̀ dintɛ gɔ í ba iri

(Cɔ Matie 8:1-4; Maaku 1:40-45)

12Si anyii nŋu Jesu í wa si ilu gɔ bɛ, nɔ mɔkɔ gɔ í naa bi tɛɛ. Mɔkɔu wa ce bɔ̃ɔi dintɛ ntɔ ntɔ. Iyi í yɛ Jesu ŋɔi í naa í sɛɛbata si wajuɛ í tɔɔɛ suuru í ni, Lafɛ̃ɛ, bii ì bi, aa yɔkɔ i jɔ̀ n ba iri n jɛ inɛ iyi í maaju. 13Ŋɔi Jesu í yɔ awɔɛ í luu nɔ í ni, ǹ bi. Ba iri nɔ i jɛ inɛ kumaaju. Bɛ gbakã bɔ̃ɔi dintɛu í nya. 14Ŋɔi Jesu í sɔ̃ɔ í ni ku maà sɔ̃ inɛ kãma ideu bɛ, amma koo nyisi araɛ bi woo weei Ilaaɔ̃u. Nɔ í ni ku ce kuwee iyi Moizi í jilɛu. Kuweeu bɛi á nyisi inɛ ŋa iyi í jɛ inɛ iyi í maaju bɛbɛi. 15Do nŋu fei, iriɛ í fangaa wa kɔ̃ɔsi, nɔ zamaa nla nla í ya maa tɔtɔɔ bi tɛɛ ku ba a gbɔ ideɛ nɔ ku ba a ba iri si bɔ̃ɔ nŋa ŋa. 16Amma Jesu í ya bɔ gbabuai nŋu akã koo ce kutɔɔ.

Jesu í jɔ̀ wɛɛgɛ gɔ í ba iri

(Cɔ Matie 9:1-8; Maaku 2:1-12)

17Ajɔ nŋu gɔ Jesu wa kɔ inɛ ŋa si cio. Wee Farisi do woo kɔ inɛ ŋa si wooda gɔ ŋa à waa buba bɛ. À naai hai Zeruzalɛmu do hai ilu ŋa iyi à wa ilɛi Zudee do ilɛi Galilee fei. Nɔ inɛ ŋa à waa yɛ gbugbãi Aɔ̃ Lafɛ̃ɛ waati iyi Jesu í jɔ̀ bɔ̃ɔ ŋa à waa ba iriu. 18Ŋɔi inɛ gɔ ŋa mɔ à naa bɛ à waa so wɛɛgɛ gɔ wa si makɛɛ. Nɔ à waa dɛdɛ bɛi aa ce a lɔòɛ ile a koo a jilɔɔ si wajui Jesu. 19Amma a kù ba do bii aa lɔòɛ na irii zamaau, ŋɔi à koo à gũ antaii ileu, à luu nɔ à kitaɛ do makɛɛu si aninii zamaau si wajui Jesu. 20Iyi Jesu í yɛ naanɛ nŋa ŋɔi í sɔ̃ wɛɛgɛu í ni, mɔkɔɔyi, ǹ kpa idei dulum dɛɛ. 21Woo kɔ inɛ ŋa si wooda do Farisi ŋa à wasi ku bee ara nŋa ide à waa ni, yooi inɛɛu ihɛ̃ í jɛ iyi wa bu Ilaaɔ̃. Yooi á yɔkɔ ku kpa idei dulum dii inɛ gɔ bii kù jɛ Ilaaɔ̃ nŋu akã. 22Amma Jesu í mà lasabui idɔ nŋa, ŋɔi í bee ŋa í ni, na mii í jɔ̀ ì waa ce dimii lasabu bɛɛbɛ si idɔ nŋɛ ŋa. 23Yoomai í faala í re, inɛ ku sɔ̃ inɛ gɔ ku ni ǹ kpa idei dulum dɛɛ, walakɔ ku ni ku dede ku nɛ. 24Amma ǹ bi i mà ŋa iyi amu Amai Amanɛ ǹ nɛ gbugbã n kpa idei dulum dii inɛ ŋa si andunya.

Iyi í fɔ bɛɛbɛ í tã ŋɔi í sɔ̃ wɛɛgɛu í ni, dede i so makɛɛɛ i bɔ kpasɛ̃. 25Ŋɔi gbakã wɛɛgɛu í dede si waju nŋa, í so makɛɛ iyi wa sũ siu, nɔ wa nɛ kpasɛ̃ wa saabuò Ilaaɔ̃. 26Ŋɔi aŋa fei à biti à waa saabu Ilaaɔ̃. Njo í bɛi wa mu ŋa à waa ni, à yɛ mii maamaake nnyi.

Jesu í kpe Levii

(Cɔ Matie 9:9-13; Maaku 2:13-17)

27Si anyii nŋu, Jesu í fita wa nɛ si inɔ ilu. Nɔ í yɛ woo gba fiai lɛmpoo gɔ à ya kpoo Levii, wa buba ile bi ku ce icɛɛ, nɔ Jesu í sɔ̃ɔ í ni, toom wa. 28Ŋɔi Levii í dede, í jɔ̀ mii ndɛɛ fei í tooɛ.

29Si anyiɛ, í cea Jesu jingau nla gɔ si kpasɛ̃ɛ. Woo gba fiai lɛmpoo bututu do inɛ gɔ ŋa mɔ à waa ba ŋa ku jɛ. 30Wee Farisi gɔ ŋa à wa bɛ do Farisi mmu gɔ ŋa iyi à jɛ woo kɔ inɛ ŋa si wooda ŋa. Aŋai à waa gbagba si mɔcɔi Jesu ŋau à waa ni, na mii í ce ì jɛ ì waa mɔ ŋa do woo gba fiai lɛmpoo do inɛ laalɔ ŋa. 31Iyi Jesu í gbɔ bɛɛbɛ ŋɔi í jɛ nŋa í ni, ilu baani ŋa a kù nɛ bukaatai ilu iwɔ bii kù jɛ bɔ̃ɔ ŋa. 32Bɛɛbɛ mɔi n kù naa ku kpe inɛ dee dee ŋa, amma ilu dulum ŋai ǹ naa ku kpe a kpaasi idɔ nŋa.

Jesu wa fɔ idei anu ku dĩ

(Cɔ Matie 9:14-17; Maaku 2:18-22)

33Ŋɔi inɛ ŋau à bee Jesu má à ni, bɛirei í ce mɔcɔi Zãa woo dasi inyiu do ti Farisi ŋa à ya dĩ anu a maa ceò kutɔɔ, nɔ wee mɔcɔɛ ŋa a ci ya dĩ anu. À ya maa jɛi nɔ a maa mɔ. 34Ŋɔi Jesu í bee ŋa í ni, aa yɔkɔ i jɔ̀ kpaasii mɔkɔ titɔ̃ ŋa a dĩ anu si waati iyi mɔkɔ titɔ̃u í wa inɔ nŋa? 35Amma ajɔ wa naa iyi aa nya mɔkɔ titɔ̃u hai si inɔ nŋa. Waati bɛɛbɛi aa dĩ anu. 36Ŋɔi í kpa nŋa mɔnda gɔ í ni, a ci ya ga ibɔ titɔ̃ a sɔò ibɔ ngbo. Bii ì ce bɛɛbɛ, ì bɛjɛ ibɔ titɔ̃u mbɛ nɔ jaaɛ titɔ̃u á wɛɛi ikã kaa ce si ibɔ ngbou. 37Inɛ gɔ ci ya nɔ kù dasi vɛ̃ɛ titɔ̃ iyi wa gba si bɔgɔ bata ngbo ŋa. Bii í ce bɛɛbɛ, vɛ̃ɛu á jɔ̀ bɔgɔ ŋau a ga, vɛ̃ɛu ku nikã nɔ bɔgɔ ŋau a bɛjɛ. 38Amma à ya dasi vɛ̃ɛ titɔ̃i si bɔgɔ titɔ̃ ŋa. 39Nɔ inɛ gɔ kù wɛɛ iyi á mɔ vɛ̃ɛ nwo nɔ ku bi vɛ̃ɛ titɔ̃ má, domi á ni nwou í cea nŋu.

Currently Selected:

Luku 5: MKL

Highlight

Copy