Kusintii Andunya 20

Kububai Aburahamu si ilui Geraa

1Ajɔ nŋu gɔ Aburahamu í bɔ ikpa awɔ cangai kpãai inunu si ilɛi Negɛbu í koo í buba si afei ilui Kadɛsi do Suu. Si anyii nŋu í koo í ce ajɔ minji si ilui Geraa. 2Nɔ í sɔ̃ inɛi ilu ŋau í ni Sara wecĩi nŋui. Iyi Abimelɛki ilaalui Geraau í gbɔ bɛɛbɛ, ŋɔi í soo í dasi kpasɛ̃. 3Amma idũ Ilaaɔ̃ í naa siɛ si ala í sɔ̃ɔ í ni, cɔ, aa ku mbɛ na irii abou bɛ iyi ì so, domi í nɛ mɔkɔ.

4Abimelɛki wee kù má baa kɔkɔi abou titã, nɔ í jɛ í ni, Lafɛ̃ɛ, amu do inɛm ŋa a kù ce nkãma. Do nŋu fei, aa kpa wai? 5Kù jɛ nŋui í sɔ̃m í ni wecĩi nŋui? Nɔ abou mɔ takaɛ í sɔ̃m í ni, wecĩm nii. Lasabui idɔm í jɛ dee dee nɔ n kù ce taale kãma.

6Ilaaɔ̃ í sɔ̃ɔ má si alau í ni, ǹ mà iyi lasabui idɔɛ í jɛ dee dee. Amui ǹ ganjiɛ dulum ku ce si wajum. Na ŋɔi í ce n kù jɛ i luu. 7Amma nsɛi, sindoa mɔkɔu aboɛ, domi waliii wa jɛ. Á ceɛ kutɔɔ nɔ i maa wɛɛ. Amma bii i kù sindoaa aboɛ, jɔ̀ i mà iyi aa na i kui, awɔ do inɛɛ ŋa fei.

8Iyi iju í má daadaakɔ Abimelɛki í dede, í kpe inɛi anyiɛ ŋa, nɔ í sisi nŋa ideu fei. Ŋɔi zigii inɛ ŋau í da, njo í mu ŋa ntɔ ntɔ. 9Ŋɔi Abimelɛki í kpe Aburahamu mɔ, í beeɛ í ni, bɛirei ì ce nwa bɛ. Taale mii ǹ ceɛ, iyi ì naa amu do inɛi bommam ŋa dulum nla nla bɛ ihɛ̃ wa. Kù sĩa i ce bɛi ì ceem nɔu bɛ. 10Ŋɔi í beeɛ má í ni, lasabu yoomai ì waa ce si idɔɛ í jɔ̀ ì ce bɛ ihɛ̃.

11Nɔ Aburahamu í jɛaa í ni, ǹ wa n lasabui si idɔm iyi kù nɛ sika inɛ kãma kù mà bɛɛrɛi Ilaaɔ̃ si ilɛu ihɛ̃. Nɔ ǹ wa n tamaa mà inɛ ŋa aa na a kpam nii na irii abom nɔu. 12Nɔ do nŋu fei, ntɔ ntɔ wecĩm nii. Awaò fei baa akãi, iye nwa ŋai à jɛ ikã ikã. Nŋui í jɔ̀ í yɔkɔ í jɛ abom. 13Si waati iyi Ilaaɔ̃ í kpem í ni n jɔ̀ idei baam, ŋɔi ǹ sɔ̃ Sara ǹ ni, faaba iyi aa ceem wee. Bii à waa bɔ fei i ya ni amu wecĩɛi.

14Iyi Aburahamu í fɔ bɛɛbɛ í tã, ŋɔi Abimelɛki í so angudã ŋa do kɛtɛ ŋa do woo ce icɛ inɛmɔkɔ ŋa do inaabo ŋa í na Aburahamu nɔ í sindoaa Sara aboɛu. 15Nɔ í ni, ilɛi ilum wee í wa wajuɛ. Buba bii á dɔ̃ɛ si.

16Nɔ í sɔ̃ Sara í ni, wee ǹ wa n na wecĩɛ kpɛkɛlɛ dubu. Iyi bɛi í jɛ fiai kuraram iyi ǹ sãɛ si wajui inɛi kpasɛ̃ɛ ŋa fei, nɔ ku nyisi iyi i kù nɛ taale kãma si ideu ihɛ̃.

17-18Wee Aɔ̃ Lafɛ̃ɛ í jɔ̀ inaaboi kpasɛ̃i Abimelɛki ŋa fei à baa à jɛ gbɛnda na irii Sara aboi Aburahamu. Ŋɔi Aburahamu í tɔɔ Ilaaɔ̃, nɔ Ilaaɔ̃ í jɔ̀ Abimelɛki í ba iri, nŋu do aboɛ do ama inaabo woo ce icɛɛ ŋa, nɔ aa yɔkɔ a bí má.

Currently Selected:

Kusintii Andunya 20: MKL

Highlight

Copy