Kusintii Andunya 17

Bango ku dasii í jɛ sɛɛdai akabuui Ilaaɔ̃

1Iyi Aburamu í nɛ adɔ̃ cinɛò fɛɛwa do mɛɛsã ŋɔi Aɔ̃ Lafɛ̃ɛ í naa bi tɛɛ í ni, amui ǹ jɛ Ilaaɔ̃ ilu gbugbã fei. Jɛ kuwɛɛɛ si wajum ku ba i maà nɛ taale kãma. 2An dĩ akabuu do awɔ nɔ n jɔ̀ dimiɛ ku kpɔ jiida jiida. 3Ŋɔi Aburamu í sɛɛbata í kɔmba iriɛ ilɛ ŋɔi Ilaaɔ̃ í baa ide ku fɔ í ni, 4akabuum wee iyi ǹ wa n dĩ do awɔ, awɔi an ce baai inɛi ilɛ nkpɔ nkpɔ. 5A kaa kpeɛ Aburamu #17:5 Aburamu Yaasei iriu í jɛ baa ilu jirima. má, í gbe Aburahamu #17:5 Aburahamu Yaasei iriu í jɛ baai inɛ nkpɔ nkpɔ., domi awɔi an ce balai inɛi ilɛ nkpɔ nkpɔ. 6An jɔ̀ dimiɛ ku kpɔ hee ku jɛ dimi ikã ikã nkpɔ nkpɔ bii fei. Si ŋai ilaalu ŋa aa fita.

7An dĩ akabuum do awɔ do tɔkuɛ ŋa fei, nɔ n jɛ Lafɛ̃ɛɛ do Lafɛ̃ɛi dimiɛ si anyiɛ. Akabuum á maa wɛɛi hee do ajɔ fei. 8Hai awɔ do dimiɛ ŋa iyi aa naa si anyiɛ an na ŋa ilɛ bii ì wa si nsɛi ì waa jɛ inɛ njoo. Ilɛi Kanaã fei á jɛ tu ŋa do ajɔ fei nɔ n jɛ Lafɛ̃ɛ nŋa.

9Nɔ Ilaaɔ̃ í sɔ̃ Aburahamu má í ni, mu akabuum nɔu, awɔ do tɔkuɛ ŋa hee do ajɔ fei. 10Akabuum nɔu wee iyi ǹ jilɛ si gãmɛi amu do awɔ, iyi aa mu ŋa awɔ do tɔkuɛ ŋa si anyiɛ. Inɛmɔkɔ fei ku ce bango si inɔ nŋɛ. 11I ce bango ŋa nɔ ku jɛ sɛɛdai akabuu iyi í wa si aninii awaɛ ŋa. 12Andi mii iyi í jɛ ama inɛmɔkɔ fei i ya dasiɛ bango ŋa bii à ce ajɔ mɛɛjɔ, kù jɛ inɛ ŋa iyi à bí si kpasɛ̃ nŋɛ nŋu akã, amma hee do inɛ ŋa iyi ì ra do fia bi inɛ njoo ŋa, inɛ ŋa iyi à jɛ dimi mmu si inɔ nŋɛ. 13Inɛ ŋa iyi à bí si kpasɛ̃ nŋɛ do inɛ ŋa iyi ì ra do fia ŋa aŋa fei i dasi ŋa bango ku ba sɛɛdai akabuum nɔu ku wa si ara nŋɛ do ajɔ fei. 14Ama inɛmɔkɔ iyi a kù dasiɛ bango i leleɛ hai inɔi dimiɛ ŋa, domi í bɛjɛ akabuum nii mbɛ.

15Ilaaɔ̃ í sɔ̃ Aburahamu í ni, maà kpe aboɛu Sarai má. Bɛbɛi aa ya kpooi Sara. 16An weea ku ba ku bíɛɛ ama inɛmɔkɔ. Na saabui kuweem nɔu á jɛ iyei dimi nkpɔ. Hai bi tɛɛi ilaalu nkpɔ á fita.

17Ŋɔi Aburahamu í sɛɛbata si wajuɛ í kɔmba iriɛ nɔ wa nyaanyi, domi í fɔ si idɔɛ í ni, inɛ iyi í nɛ adɔ̃ cĩɔ nŋui aa maa bía ama má? Sara mɔ wee í nɛ adɔ̃ cinɛò fɛɛwa, nŋui á bí má? 18Ŋɔi í sɔ̃ Ilaaɔ̃ í ni, jɔ̀ isɛɛnɛi Isimaɛli ku sĩaɛ si nɔ ku jɛ tubum.

19Nɔ Ilaaɔ̃ í ni, aawo. Kãm kãm, aboɛ Sara á bíɛ ama inɛmɔkɔ nɔ i sɔɔ Izaaki. Do nŋui an nyi n dĩ akabuum má iyi kaa tã si dimiɛ baa ajɔ kãma. 20Si gãmɛi idei Isimaɛli, ǹ gbɔ kutɔɔɛ. Wee nsɛi an weeaa. Á bí ku kpɔ jiida jiida. Nŋui á jɛ baai amanlu maateeji, nɔ an coo ilu zamaa jiida. 21Amma akabuum nɔu, do Izaakii an dũu, ama iyi Sara á bíɛ adɔ̃ gɔ suku bɛi. 22Iyi Ilaaɔ̃ í ba Aburahamu ide ku fɔ í tã ŋɔi í nɛ lele.

23Ŋɔi Aburahamu í so Isimaɛli amaɛ do aru ŋa iyi à bí si kpasɛ̃ɛu fei do inɛ ŋa iyi í ra do fiau, andi inɛmɔkɔ iyi í wa si kpasɛ̃u fei de. Nɔ í dasi aŋa fei bango si ajɔ nŋu bɛ si bɛi Ilaaɔ̃ í sɔ̃ɔu. 24Aburahamu takaɛ í nɛ adɔ̃ cĩɔ akã kù wa si waati iyi í bu bango. 25Isimaɛli amaɛu mɔ í nɛ adɔ̃ mɛɛwa do mɛɛta waati iyi í lɔ bangou. 26Ajɔ akãu bɛi Aburahamu do amaɛ fei à lɔ bango. 27Andi inɛmɔkɔi kpasɛ̃ɛ ŋa fei, inɛ ŋa iyi à bí si kpasɛ̃ɛ do inɛ ŋa iyi í ra do fia bi inɛ mmu ŋa, aŋaò ŋa fei ajɔ akãi à dasi ŋa bango.

Currently Selected:

Kusintii Andunya 17: MKL

Highlight

Copy