Kufita 6
6
1Aɔ̃ Lafɛ̃ɛ í sɔ̃ Moizi í ni, aa yɛ bɛi an cea Faraɔ̃ bɛi. Do gbugbãm nii an tilasiɛ ku jɔ̀ inɛ ŋau a nɛ bɛbɛi. Á lele ŋa mɔm nii hai si ilɛɛ.
Ilaaɔ̃ í sɔ̃ Moizi í ni nŋu á nya inɛi Izirɛli ŋa
2Ilaaɔ̃ í ba Moizi ide ku fɔ má í ni, amui ǹ jɛ Aɔ̃ Lafɛ̃ɛ. 3Tako wo, waati iyi ǹ naa si Aburahamu do Izaaki do Zakɔbu ǹ jɔ̀ à mà iyi ǹ jɛ Ilaaɔ̃ ilu gbugbã, amma a kù mà mà irim nii í jɛ Aɔ̃ Lafɛ̃ɛ. 4Ǹ jilɛ akabuum nii awaò ŋa ku ba n mu nŋa ilɛi Kanaã, ilɛ bii à buba wo bɛi inɛ njoo ŋa. 5Ntɔ ntɔ ǹ gbɔ weeweai inɛi Izirɛli ŋa iyi inɛi Ezibiti ŋa à mu aru, nɔ ǹ ye gigii akabuu iyi ǹ dĩ si gãmɛ nŋa. 6Na nŋu, koo sɔ̃ inɛi Izirɛli ŋa i ni amui ǹ jɛ Aɔ̃ Lafɛ̃ɛ. An nya ŋa hai si icɛ kugaabu ŋa iyi inɛi Ezibiti ŋa à dasi ŋa nɔ n nya ŋa má hai si aru ku jɛ. Nɔ do gbugbãm an dasi inɛi Ezibiti ŋa wahala nla nla ku ba n ya inɛi Izirɛli ŋa. 7An so ŋa a jɛ inɛm ŋa nɔ n jɛ Ilaaɔ̃ Lafɛ̃ɛ nŋa. Aa mà iyi amui ǹ jɛ Aɔ̃ Lafɛ̃ɛ, Lafɛ̃ɛ nŋa, amu iyi ǹ nya ŋa hai si icɛ kugaabu ŋa iyi inɛi Ezibiti ŋa à kã nŋa. 8An jɔ̀ i lɔ ŋa si ilɛ iyi ǹ ce kuwã do kugbasi n na Aburahamu do Izaaki do Zakɔbu. Amu Aɔ̃ Lafɛ̃ɛ, an na ŋa ku jɛ tubu nŋa. 9Ŋɔi Moizi í koo í sɔ̃ inɛi Izirɛli ŋa ideu fei. Amma icɛi aru kugaabu iyi à waa ce í jɔ̀ inɔ nŋa í fɔ nɔ a kù gbɔ ideu.
10Aɔ̃ Lafɛ̃ɛ í ba Moizi ide ku fɔ í ni, 11koo sɔ̃ Faraɔ̃ ilaalui Ezibiti ku jɔ̀ inɛi Izirɛli ŋa a nɛ hai si ilɛɛ.
12Ŋɔi Moizi í jɛa Aɔ̃ Lafɛ̃ɛ í ni, bii baa inɛi Izirɛli ŋa taka nŋa a kù gbɔ idem, bɛirei Faraɔ̃ á ce ku gbɔ idem, amu iyi ide ku fɔm í ya gaabu.
13Si anyiɛ ŋɔi Aɔ̃ Lafɛ̃ɛ í ba Moizi do Arɔ̃ɔ ide ku fɔ í na ŋa wooda ŋa si gãmɛi inɛi Izirɛli ŋa do Faraɔ̃ ilaalui Ezibitiu, ku ba inɛi Izirɛli ŋa a ba a fita hai si ilɛi Ezibiti.
Balai Moizi do Arɔ̃ɔ ŋa
14Irii ilu kpasɛ̃i inɛi Izirɛli ŋa wee. Rubɛ̃ɛi í jɛ ama sintei Izirɛli. Irii amaɛ ŋa mɔ wee. Enɔku do Palu do Esirɔ̃ɔ do Kaami. Inɛ bɛ ŋai à jɛ dimii Rubɛ̃ɛ.
15Irii amai Simeɔ̃ ŋa wee. Yemuɛli do Yamɛɛ do Ohadi do Yakɛ̃ɛ do Sohaa do Saulu, nŋu iyi iyeɛ í jɛ inɛi Kanaã. Inɛ bɛ ŋai à jɛ dimii Simeɔ̃.
16Irii amai Levii ŋa wee do tɔkuɛ ŋa. Levii í nɛ ama mɛɛta, Gɛɛsɔ̃ɔ do Kehati do Merari. Adɔ̃i Levii í wɛɛi cifaò fɛɛwa do mɛɛje (137). 17Irii amai Gɛɛsɔ̃ɔ ŋa wee. Libuni do Simei do dimi nŋa ŋa. 18Irii amai Kehati ŋa wee. Amuramu do Yisehaa do Eborɔ̃ɔ do Uziɛli. Adɔ̃i Kehati í wɛɛi cifaò fɛɛwa do mɛɛta (133). 19Irii amai Merari ŋa wee. Mali do Musi. Inɛ bɛ ŋai à jɛ dimii Levii ŋa, hai amaɛ ŋa do tɔkuɛ ŋa.
20Amuramu í so dasɔ̃ɔɛ í ce abo. Aboui à ya kpe Yokebɛdi. Nɔ í bíaa Arɔ̃ɔ do Moizi. Adɔ̃i Amuramu í wɛɛi cifaò fɛɛwa do mɛɛje (137).
21Irii amai Yisehaa ŋa wee. Kore do Nefɛgi do Zikiri. 22Irii amai Uziɛli ŋa wee. Misaɛli do Elisafãa do Sitiri.
23Arɔ̃ɔ í so Eliseba ama inaaboi Aminadabu í ce abo. Aboɛui í jɛ wecĩi Nasɔ̃ɔ, nɔ abou í bíaa Nadabu do Abihu do Eleazaa do Itamaa.
24Irii amai Kore ŋa wee. Asiru do Elikana do Abiasafu. Inɛ bɛ ŋai à jɛ dimii Kore.
25Eleazaa amai Arɔ̃ɔ, í so abo si inɔi ama inaaboi Putiɛli ŋa nɔ í bía Fineɛzi. Irii inɛ ŋa iyi à kau bɛ aŋai à jɛ inɛ ngboi dimii Levii.
26Arɔ̃ɔ do Moizii Aɔ̃ Lafɛ̃ɛ í sɔ̃ í ni, i nya inɛi Izirɛli ŋa hai ilɛi Ezibiti i fitaò ŋa ŋa tuuba tuuba bɛi sooge ŋa. 27Aŋai à ba Faraɔ̃ ilaalui Ezibiti ide ku fɔ ku ba ku jɔ̀ a fitaò inɛi Izirɛli ŋa hai si ilɛɛ.
Aɔ̃ Lafɛ̃ɛ í ye Moizi do Arɔ̃ɔ gigii kuwãɛu má
28Ajɔ iyi Aɔ̃ Lafɛ̃ɛ í ba Moizi ide ku fɔ si ilɛi Ezibitiu, 29í sɔ̃ɔ í ni, amui ǹ jɛ Aɔ̃ Lafɛ̃ɛ. Koo sɔ̃ Faraɔ̃ ilaaluu bɛi ǹ sɔ̃ɛ fei.
30Amma Moizi í jɛaa í ni, ide ku fɔ í ya gaabum. Bɛirei Faraɔ̃ á ce ku gbɔ idem.
Currently Selected:
Kufita 6: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
