Kufita 4

Ilaaɔ̃ í nyisi Moizi gbugbãɛ

1Ŋɔi Moizi í jɛ í ni, inɛ ŋau a kaa dasim naanɛ, nɔ a kaa gbɔ idem má. Aa ni Aɔ̃ Lafɛ̃ɛ kãma kù naa sim.

2Ŋɔi Aɔ̃ Lafɛ̃ɛ í beeɛ í ni, mii ì waa mu si awɔɛ bɛ. Nɔ í jɛaa í ni, goloi.

3Ŋɔi Aɔ̃ Lafɛ̃ɛ í ni, nyɔɔ ilɛ. Nɔ í nyɔɔ, ŋɔi í kpɔò njo. Ŋɔi Moizi wa sa hai si wajuɛ. 4Ŋɔi Aɔ̃ Lafɛ̃ɛ í sɔ̃ɔ í ni, yɔ awɔ i mu akpaamuɛ. Nɔ í yɔ awɔ í muu nɔ njou í baa í kpɔò golou si awɔɛ má. 5Nɔ Aɔ̃ Lafɛ̃ɛ í ni, nŋu bɛi aa ce ku ba a dasi naanɛ iyi amu Aɔ̃ Lafɛ̃ɛi bala nŋa ŋa, ǹ naa siɛ, amu iyi ǹ jɛ Lafɛ̃ɛi Aburahamu, do Izaaki, do Zakɔbu.

6Ŋɔi í nyi í sɔ̃ɔ má í ni, lesi awɔɛ si gɛndɛɛ, nɔ í lesi awɔɛ si gɛndɛɛ, ŋɔi iyi í na í nyaa, bɔ̃ɔi dintɛ í bii awɔɛu fei. Awɔu í bɔ waasu. 7Nɔ Aɔ̃ Lafɛ̃ɛ í ni, sindo awɔɛ si gɛndɛɛ má nɔ í sindo awɔɛu si gɛndɛɛ. Iyi í na í nyaa nɔ í baa dee dee bɛi í wɛɛ wo. 8Ilaaɔ̃ í ni, bii a kù naanɛɛ nɔ a kù gbɔ idei sɛɛda sinteu, aa dasi idei sɛɛdai minjisiau naanɛ. 9Bii a kù dasi baa sɛɛda minji ŋau bɛ naanɛ nɔ a kù gbɔ ideɛ, bu inyii idoi Nili nɔ i dikã ilɛ. Inyi iyi aa bu hai si idoi Niliu á baa ku kpɔò njɛi si ilɛ bɛ.

Ilaaɔ̃ í cica Arɔ̃ɔ ku jɛ sobii Moizi

10Moizi í sɔ̃ Aɔ̃ Lafɛ̃ɛ í ni, Lafɛ̃ɛ, n kù jɛ inɛ iyi ide ku fɔ í faalaa, domi gɛlɛm í wo si ide ku fɔ, nɔ iyi bɛi kù jɛ ana, kù jɛ ajuɛ, kù nɔ kù jɛ baa hai waati iyi ì waa ba amu woo ce icɛɛ ide ku fɔ.

11Nɔ Aɔ̃ Lafɛ̃ɛ í beeɛ í ni, yooi í ce gɛlɛi amanɛ. Nɔ yooi í ya jɔ̀ amanɛ ci ya fɔ ide walakɔ ku dekĩ. Yooi í ya jɔ̀ amanɛ ku yɛ ilu walakɔ ku fɛɛju. Kù jɛ amu Aɔ̃ Lafɛ̃ɛ? 12Na nŋu, koo. Amui an wɛɛ do awɔ bii ì waa fɔ ide, nɔ amui an sɔ̃ɛ ide iyi ì nɛ ku fɔ.

13Amma Moizi í ni, Lafɛ̃ɛm, cica inɛ mmu gɔ i bɔɔ.

14Ŋɔi idɔɔkɔ̃i Aɔ̃ Lafɛ̃ɛ í dede si Moizi. Nɔ í ni, n kù wa n yɛ Arɔ̃ɔ igbãɛ, inɛi Leviiui? Ǹ mà iyi ide ku fɔ í faalaa. Wee í wa kpãa wa mɔm, wa naa bi tɛɛ. Bii í yɛɛ á nɛ inɔ didɔ̃. 15Aa baa ide ku fɔ nɔ i sɔ̃ɔ ide ŋa iyi á fɔ. Nɔ amui an wɛɛ do iŋɛ minji fei bii ì waa fɔ ide ŋa nɔ an sɔ̃ ŋɛ si mii iyi ì nɛ ku ce ŋa. 16Nŋui á fɔɛ ide bi inɛ ŋau, nɔ do yaase bɛɛbɛ ku jɛ bɛi gɛlɛɛ. Nɔ awɔ takaɛi aa sɔ̃ɔ ide ŋa iyi á fɔ, bɛi amu takam ǹ ya n ce do walii ŋa. 17Golou ihɛ̃i aa so i maa mu si awɔɛ, nɔ do nŋui aa ceò sɛɛda ŋau.

Moizi í nyi ilɛi Ezibiti

18Nɔ Moizi í nɛ hai bɛ. Iyi í to bi Zetoro anaɛu í sɔ̃ɔ í ni, ǹ wa n tɔɔɛi, jɔ̀ n nɛ n koo n ba inɛm ŋa iyi à wa ilɛi Ezibiti ku ba n koo n cɔ mà a wɛɛ hee nsɛi má. Nɔ Zetoro í sɔ̃ Moizi í ni, koo do laakai ku sũ.

19Hai waati iyi Moizi í wa Madiãa bɛ Aɔ̃ Lafɛ̃ɛ í sɔ̃ɔ í ni, dede i dasi kpãa i nyi ilɛi Ezibiti, domi inɛ ŋa iyi à tako à waa dɛ ku kpaɛ ŋau fei à ku. 20Ŋɔi Moizi í so aboɛ do amaɛ ŋa í lesi ŋa si gbankɛlɛ ŋa nɔ í sinda wa nyi ikpa ilɛi Ezibiti. Nɔ í so golo iyi Ilaaɔ̃ í ni ku sou.

21Nɔ Aɔ̃ Lafɛ̃ɛ í sɔ̃ Moizi má í ni, to, nsɛi si bɛi ì dasi kpãa ì waa nɛ, ye gigii nyinda ŋa iyi ǹ daɛ si awɔu fei nɔ i coo si wajui Faraɔ̃. Amma amui an jɔ̀ idɔɛ ku le, nɔ kaa jɔ̀ inɛ ŋau a nɛ. 22Nɔ i sɔ̃ɔ i ni, Aɔ̃ Lafɛ̃ɛ í ni inɛi Izirɛli ŋa à yɛi bɛi ama yemmai nŋu. 23Na nŋu, jɔ̀ inɛi Izirɛli ŋau a nɛ, aŋa iyi à jɛ amaɛu, ku ba a koo a tɔɔɛ. Nɔ bii ì kɔ̀, nŋu á kpa ama yemmai awɔ takaɛ.

24Si isɛɛnɛ nŋau iyi à to inya gɔ bii à waa sũ idũ Aɔ̃ Lafɛ̃ɛ í naa si Moizi wa bi ku kpaa. 25Ŋɔi Sefora aboɛ í so kuta ku dɔ̃ anu gɔ í bu jɔnfɔlɔi amaɛ í luò inɛmɔkɔi Moizi takaɛ nɔ í ni, bi tom awɔi ì jɛ mɔkɔi njɛ. 26Nɔ Ilaaɔ̃ í jɔ̀ɔ. Na irii bangou bɛi í jɔ̀ abou wa kpoo mɔkɔi njɛ.

27Ajɔ nŋu gɔ Aɔ̃ Lafɛ̃ɛ í sɔ̃ Arɔ̃ɔ í ni, dede i koo i ko Moizi si gbaau. Nɔ Arɔ̃ɔ í dede í koo, í koo í ko Moizi iri kutai Ilaaɔ̃, nɔ à ce njɛ fɔɔ do inɔ didɔ̃ nla nla. 28Ŋɔi Moizi í sɔ̃ɔ ide iyi Aɔ̃ Lafɛ̃ɛ í bɛ nŋu do wa fei, do maamaake ŋa iyi í na nŋu ku ce fei. 29Moizi do Arɔ̃ɔ à dasi kpãa à waa nɛ.

[Iyi à to ilɛi Ezibiti] ŋɔi à koo à tɔtɔɔ inɛ ngboi inɛi Izirɛli ŋa fei. 30Nɔ Arɔ̃ɔ í fɔ ide ŋa iyi Aɔ̃ Lafɛ̃ɛ í sɔ̃ Moizi fei, nɔ í ce maamaake ŋau fei si wajui inɛ ŋau. 31Ŋɔi inɛ ŋau à dasi naanɛ. Nɔ à gbɔ iyi Aɔ̃ Lafɛ̃ɛ wa naa ku faaba aŋa nɔ wa yɛ ijuukpãi aŋa. Nɔ à gulɛ à waa tɔɔɛ.

Currently Selected:

Kufita 4: MKL

Highlight

Copy