Kufita 10

Wahala mɛɛjɔsia - kɛtɛngbo ŋa

1Si anyii nŋu, Aɔ̃ Lafɛ̃ɛ í sɔ̃ Moizi má í ni, koo bi Faraɔ̃, domi amui ǹ jɔ̀ idɔi nŋu do akaweɛ ŋau í le, ku ba n jɔ̀ a yɛ nyindam ŋa si anini nŋa. 2Nɔ bɛɛbɛi aa yɔkɔ i sisia amaɛ ŋa do tɔkuɛ ŋa bɛi ǹ yaako inɛi Ezibiti ŋa do si bɛi ǹ jɔ̀ à yɛ nyindam ŋa si ilɛ nŋa. Nɔ aa mà ŋa iyi amui ǹ jɛ Aɔ̃ Lafɛ̃ɛ.

3Ŋɔi Moizi do Arɔ̃ɔ à koo bi Faraɔ̃ à sɔ̃ɔ à ni, Aɔ̃ Lafɛ̃ɛi inɛi Ebɛɛ ŋa í ni, hee waati yoomai aa kɔ̀ ku kaye araɛ si wajui nŋu. Í ni i jɔ̀ inɛi nŋu ŋa a nɛ ku ba a koo a tɔɔ nŋu. 4Bii ì kɔ̀ ku jɔ̀ inɛi nŋu ŋau a nɛ, ala nŋu á jɔ̀ kɛtɛngbo ŋa a naa si gbugbãai ilɛɛ fei. 5Kɛtɛngbo ŋau, aa bii gbugbãai ilɛu feii hee inɛ ŋa a kaa yɛ ilɛu má mɔm. Si amaajɛ iyi í gbɛ̃ ŋau, andi iyi kutai ijĩ í jɔ̀ nŋɛu aŋai aa jɔɔ. Aŋai aa kpa jĩi ŋa iyi à wa si iko nŋɛ ŋa fei. 6Aa na a maa kɔ̃i si inɔ kpasɛ̃ɛ ŋa do si inɔ kpasɛ̃i akaweɛ ŋa do ti inɛi Ezibiti ŋa fei. Bala nŋɛ ŋa a kù yɛ mii dimi bɛɛbɛ hai waati iyi à wa si andunyau ihɛ̃ hee ku baa nnyi.

Iyi Moizi í fɔ bɛɛbɛ í tã, ŋɔi í fita hai bi Faraɔ̃. 7Akawei Faraɔ̃ ŋau à sɔ̃ɔ à ni, hee waati yoomai inɛɛu ihɛ̃ á leekĩò wahala ŋa ku naa nwa wa. Jɔ̀ inɛ ŋau a nɛ a koo a tɔɔ Aɔ̃ Lafɛ̃ɛ nŋa. I kù yɛ iyi ilɛ nwa wa ku mbɛ?

8Ŋɔi à kpe Moizi do Arɔ̃ɔ à nyi wa bi Faraɔ̃ má. Nɔ í sɔ̃ ŋa í ni, i koo i nɛ, i koo i tɔɔ Aɔ̃ Lafɛ̃ɛ nŋɛ ŋa. Nɔ í bee ŋa í ni, yoo ŋai aa nɛò.

9Ŋɔi Moizi í jɛaa í ni, hai awaasũ do mɔkɔ ngbo ŋa fei, inɛmɔkɔ do inaabo ŋa, hee do angudã nwa ŋa do iwo nwa ŋa do kɛtɛ nwa ŋa, awa feii aa ka nɛ, domi bi ti awa jingaui iyi aa káa cea Aɔ̃ Lafɛ̃ɛ.

10Ŋɔi Faraɔ̃ í jɛaa do yaako í ni, Aɔ̃ Lafɛ̃ɛ ku wɛɛ do iŋɛ. Ì waa tamaa an jɔ̀ i nɛ ŋa, iŋɛ do abo nŋɛ ŋa do ama nŋɛ ŋa ajɔi? Lasabu laalɔi ì nɛ ŋa kãm kãm. 11Aawo. I nɛ̀, iŋɛ inɛmɔkɔ ŋa, i koo i tɔɔ Aɔ̃ Lafɛ̃ɛ nŋɛ, domi iyi bɛi ì tɔɔm ŋa.

Nɔ à lele ŋa hai bi Faraɔ̃.

12Nɔ Aɔ̃ Lafɛ̃ɛ í sɔ̃ Moizi má í ni, tɛ awɔɛ si ilɛi Ezibiti ku ba kɛtɛngbo ŋa a naa si ilɛu nɔ a jɛ mii iyi kutai ijĩu í jɔ̀ fei.

13Moizi í tɛ goloɛu si ilɛu nɔ Aɔ̃ Lafɛ̃ɛ í jɔ̀ fufu í ce hai ikpa nunui daakɔ si ilɛi Ezibiti ajɔ nŋu dasã do idũ fei. Iyi iju í má, fufui nunui daakɔu í naaò kɛtɛngbo ŋa wa si ilɛu. 14Kɛtɛngbo ŋau à fangaa si ilɛu fei nɔ à de bii fei, à kpɔ hee í caa. A kù yɛ dimiɛ tako wo nɔ a kaa yɛ dimiɛ má ajɔ kãma. 15À bii gbugbãai ilɛu fei nɔ ilɛu fei í baa í dũ. À jɛ mii iyi kutai ijĩu í jɔ̀ fei, hai amaajɛi ilɛ ŋa hee do isoi jĩi ŋa fei, nɔ wua baa akã kù gbe si jĩi ŋau hee má jɛ si iko ŋau.

16Gbakã Faraɔ̃ í kpe Moizi do Arɔ̃ɔ nɔ í ni, ǹ ce kurara bi Aɔ̃ Lafɛ̃ɛ nŋɛ do bi tu ŋɛ. 17Ǹ wa n tɔɔ ŋɛ, i ceem suurui kuraram si tuubau ihɛ̃ má ŋa, nɔ i tɔɔ Aɔ̃ Lafɛ̃ɛ nŋɛ má ku ba wahala nla ku kpa inɛu ihɛ̃ ku jĩim.

18Ŋɔi Moizi í fita hai bi Faraɔ̃ nɔ wa tɔɔ Aɔ̃ Lafɛ̃ɛ. 19Aɔ̃ Lafɛ̃ɛ í jɔ̀ fufu nla gɔ í ce wa hai ikpa nunui alɛ, í gbangaa kɛtɛngbo ŋau fei í nɛò nɔ í koo í nyɔ ŋa si Tenkui Njee, kɛtɛngbo baa akã kù gbe si ilɛi Ezibiti má. 20Do nŋu fei, Aɔ̃ Lafɛ̃ɛ í jɔ̀ idɔi Faraɔ̃ í kɔ̀ wa le, nɔ í kɔ̀ ku jɔ̀ inɛi Izirɛli ŋau a nɛ.

Wahala mɛɛsãsia - ilu kuku

21Aɔ̃ Lafɛ̃ɛ í sɔ̃ Moizi má í ni, tɛ awɔɛ ikpa lelei Aɔ̃ nɔ ilu kuku nla nla ku ce si ilɛi Ezibiti.

22Ŋɔi Moizi í tɛ awɔɛ ikpa lelei Aɔ̃, nɔ ilu kuku nla nla iyi a kù yɛ dimiɛ ajɔ gɔ í ce si ilɛi Ezibiti fei zakai ajɔ mɛɛta. 23Si ajɔ mɛɛtau inɛi Ezibiti ŋa a ci ya yɛ njɛ hee inɛ kãma ci ya tɛkɛɛ hai tengi bii í wa. Amma inya kumá í wa tengi bii inɛi Izirɛli ŋa à wa. 24Nɔ Faraɔ̃ í kpe Moizi í ni, i koo i tɔɔ Aɔ̃ Lafɛ̃ɛ nŋɛ do nyaanze nŋɛ ŋa fei, í gbe angudã nŋɛ ŋa do iwo nŋɛ ŋa do kɛtɛ nŋɛ ŋa iyi aa gbe ihɛ̃. 25-26Amma Moizi í jɛaa í ni, aawo. Tilasii i jɔ̀ ka nɛ do mɛɛmu nwa ŋa fei ku ba káa cea Aɔ̃ Lafɛ̃ɛ nwa kuwee iyi à ya jo si ina fei sãa sãa do kuwee mmu gɔ ŋa má. Mɛɛmu nwa baa akã kaa gbe ihɛ̃, domi si bɛi aa ka nya ka cea Aɔ̃ Lafɛ̃ɛ nwa kuwee. Nɔ bii kù jɛ à to bɛ sisi a kaa ka mà iyi aa ka cica ka na Aɔ̃ Lafɛ̃ɛ.

27Aɔ̃ Lafɛ̃ɛ í jɔ̀ idɔi Faraɔ̃ í kɔ̀ wa le, nɔ kù bi ku jɔ̀ ŋa a nɛ. 28Faraɔ̃ í sɔ̃ Moizi í ni, fita hai bi tom. Mu araɛ, maà naa si wajum má, domi ajɔ iyi ì naa si wajum bɛi, aa kui. 29Ŋɔi Moizi í jɛaa í ni, to, si bɛi ì fɔ, n kaa n naa bi tɛɛ má.

Currently Selected:

Kufita 10: MKL

Highlight

Copy