Woo bɛ ŋa 25

Pɔlu í so kiitiɛ í daa ilaalu nlai Romu si awɔ

1Iyi Fesitu í to wa Sezaree, si ajɔ mɛɛsiaɛ í bɔ Zeruzalɛmu. 2Ŋɔi inɛ ngboi woo weei Ilaaɔ̃ ŋau do Zuifu inɛ ngbo ŋau à koo à má Pɔlu ide bi Fesitu. 3Nɔ à waa tɔɔɛ suuru ntɔ ntɔ ku ba kú jɔ̀ Pɔlu ku naa Zeruzalɛmu. À waa bi Pɔlu ku naa Zeruzalɛmui si na iyi í jɔ̀ à dĩ zamba nŋa aŋa a ba a kpaa kpãa. 4Amma Fesitu í jɛ nŋa í ni Pɔlu í wa ile piisɔ̃ɔi Sezaree nɔ nŋu takai nŋu kaa kpɛtɛ ku nyi bɛ. 5Na nŋu, í ni a jɔ̀ nŋu do inɛ ngbo nŋa ŋa a koo bɛ nɔ bii í jɛ í ce taale gɔi a fɔ.

6Fesitu kù re ajɔ mɛɛjɔ walakɔ ajɔ mɛɛwa si inɔ nŋa nɔ í nyi Sezaree má. Iju kumáɛ nɔ í bɔ ile bi ku ce kiiti nɔ í ni a naaò Pɔlu wa. 7Iyi Pɔlu í to wa ŋɔi Zuifu ŋa iyi à naa hai Zeruzalɛmu à kaakoɛ à waa máa ide laalɔ kugaabu nkpɔ nkpɔ amma nkãma kù wɛɛ iyi wa nyisi iyi ide nŋau ntɔi. 8Ŋɔi Pɔlu wa kɔò araɛ í ni, n kù ce kurara gɔ si woodai Zuifu ŋa hee má jɛ si kpasɛ̃i Ilaaɔ̃ hee má jɛ bi ilaalu nlai Romu. 9Amma Fesitu wa bi nŋu ku nɛ bɛɛrɛ bi Zuifu ŋau. Na ŋɔi í jɔ̀ í bee Pɔlu í ni, ì bi i bɔ Zeruzalɛmu a ceɛ kiiti si wajum na irii ideu ihɛ̃? 10Ŋɔi Pɔlu í ni, aawo. Bi ku kiitii ilaalu nlai Romui ǹ wa ihɛ̃, ihɛ̃i á sĩa a kiitim. N kù cea Zuifu ŋa kurara kãma, nɔ awɔ takaɛ ì waa nɛ kumàsiɛ sãa sãa. 11Bii ǹ ce kurara walakɔ daa gɔ iyi í to a kpam n kaa n kɔ̀. Amma ide ŋa iyi à waa yɛ taalem siu ihɛ̃, bii kù jɛ ntɔ inɛ gɔ kaa yɔkɔ ku dasim awɔ. Na nŋu, ǹ so kiitim ǹ daa ilaalu nlau takaɛ si awɔ. 12Iyi Fesitu do inɛɛ ŋa à busi njɛ à tã, ŋɔi í sɔ̃ Pɔlu í ni, si bɛi ì so kiitiɛ ì daa ilaalu nlau si awɔ, bi tɛɛi aa bɔ.

À bɔò Pɔlu si wajui Agiripa do Berenisi

13Iyi waati í lɔ keeke má, ŋɔi ilaalu Agiripa do wecĩɛ Berenisi à naa Sezaree Fesitu ku ce fɔɔ. 14Si bɛi à waa kpɛ bɛ ŋɔi Fesitu í sɔ̃ ilaaluu idei Pɔlu í ni, inɛ gɔ í wa ihɛ̃, Felisi í jɔ̀ à dasiɛ piisɔ̃ɔ. 15Iyi ǹ bɔ Zeruzalɛmu ŋɔi inɛ ngboi woo weei Ilaaɔ̃ ŋau do inɛ ngboi Zuifu ŋau à naaò ideɛ wa bi tom. Nɔ à tɔɔm n yɛ taaleɛ ku ba aŋa a kpaa. 16Amma ǹ jɛ nŋa ǹ ni inɛi Romu ŋa a ci ya jɔ̀ a kpa inɛ bii kù jɛ à kiitiɛ. À ya muaa waatii nŋu do woo yɛ taaleɛ ŋau a fɔ ide titã gɛlɛò gɛlɛ. 17Ŋɔi aŋa fei à naa ilu ihɛ̃. Si bɛi n kù bi ku kpɛ má, ŋɔi iju kumáɛ ǹ kpe ŋa bi ku ce kiiti nɔ ǹ ni a gbã Pɔlu wa. 18Ŋɔi woo yɛ taaleɛ ŋau à dede siɛ amma a kù yɛ taaleɛ si ide laalɔ gɔ bɛi ǹ wa n tamaau. 19Idei kutɔɔi aŋa taka nŋai à waa ce si kakɔɔ, do idei mɔkɔ gɔ iyi í ku à ya kpoo Jesu. Amma Pɔlu í ni dim dim mɔkɔu í wɛɛ. 20Amu ǹ biti bɛirei an kiiti ideu ihɛ̃. Na ŋɔi í jɔ̀ ǹ bee Pɔlu bii í bi n koo n ceaa kiitii ideu Zeruzalɛmu. 21Amma í so kiitiɛu í na ilaalu nlau. Nɔ ǹ ni a dasiɛ piisɔ̃ɔ má titã hee n maa n jɔ̀ a kooòɛ bi tɛɛ. 22Ŋɔi Agiripa í sɔ̃ Fesitu í ni, amu takam ǹ bi n gbɔ ide hai si gɛlɛi mɔkɔu. Ŋɔi Fesitu í ni, ala aa gbɔɔ.

23Ŋɔi iju kumáɛ Agiripa do Berenisi à naa bi ku ce kiitiu do jirima jiida, ŋɔi inɛ ngboi sooge ŋa do ilu bɛɛrɛi ilu ŋau à too ŋa wa. Ŋɔi Fesitu í ni a naaò Pɔlu wa, nɔ à naaɛ wa. 24Iyi Pɔlu í to wa ŋɔi Fesitu í ni, to, awɔ ilaalu Agiripa do iŋɛ iyi ì wa ihɛ̃ fei ŋa, Pɔluu wee. Na iriɛi Zuifu ŋau fei à naa bi tom waati iyi ǹ bɔ Zeruzalɛmu, nɔ à nyi wa bi tom ihɛ̃ má, à waa la à ni kù sĩa a jɔ̀ɔ si hunde. 25Amu n kù yɛ siɛ taale kãma iyi í to a kpaa. Amma si bɛi nŋu takaɛ í so kiitiu í daa ilaalu nlau si awɔ ŋɔi í ce ǹ ni an jɔ̀ a kooɛ bi tɛɛ. 26Do nŋu fei, n kù yɛ siɛ ide baa icu akã iyi an ceaò ilaalu nlau tia. Na ŋɔi í jɔ̀ ǹ naaɛ wa si wajui iŋɛ fei. Iyi í re mɔm ǹ naaɛ wai si wajui awɔ ilaalu Agiripa, i cɔ yaasei ideu ku ba n ba iyi an kɔ. 27Kù nɛɛm yaase n jɔ̀ a kooa inɛi piisɔ̃ɔ gɔ nɔ n kù sisiaa taale gɔ iyi í ce.

Currently Selected:

Woo bɛ ŋa 25: MKL

Highlight

Copy