Woo bɛ ŋa 21

Pɔlu í bɔ Zeruzalɛmu*

1Iyi à tɔɔ ŋa sukudɔ̃ ŋɔi awaò Pɔlu à koo à lɔ akɔi inyi à nɛ suusuu à bɔ gũngũm gɔ iyi à ya kpe Kosi, iju kumáɛ nɔ à to gũngũm mmu gɔ iyi à ya kpe Rodu. Hai bɛ má nɔ à bɔ Patara. 2Bɛi à ba akɔi inyi iyi wa bɔ ikpa ilɛi Fenisi nɔ à lɔ à nɛ. 3Ŋɔi à yɛ gũngũm gɔ iyi à ya kpe Kitimu, à daleɛ do ikpa awɔ canga nɔ à bɔ ikpa ilɛi Siri. Ŋɔi à to Tii bii akɔi inyiu á kita asoɛ. 4Ilu bɛi à yɛ inɛ gɔ ŋa iyi à waa too kpãai Jesu nɔ à ce ajɔ mɛɛje bi tu ŋa bɛ. Ŋɔi Hundei Ilaaɔ̃ í jɔ̀ à sɔ̃ Pɔlu à ni ku maà bɔ Zeruzalɛmu. 5Amma iyi ajɔi kunɛ nwa í to à nyi bi akɔu má. Aŋa fei do abo nŋa ŋa do ama nŋa ŋa à naa à leekĩ nwa hai iluu. Awa fei à gulɛ itĩi tenkuu nɔ à ce kutɔɔ. 6Iyi à tɔɔ njɛ sukudɔ̃ à tã awa à lɔ akɔi inyiu à nɛ, ŋɔi aŋa mɔ à nɛ à nyi kpasɛ̃ nŋa ŋa.

7Hai Tii à dasi kpãa má nɔ à to Tolemasi. Bɛi à kita hai si akɔi inyiu nɔ à koo à ce kpaasi woo dasi Jesu naanɛ ŋa fɔɔ nɔ à sũ bɛ idũ akã. 8Iju kumáɛ nɔ à nɛ à bɔ Sezaree. Nɔ à koo à sɔ kpasɛ̃i Filipu woo waazou, nŋu iyi wa jɛ inɛ akãi amanɛ mɛɛje ŋa iyi à cica wo si ilui Zeruzalɛmuu. 9Mɔkɔu í nɛ mudɛ̃ɛ mɛɛ gɔ ŋa iyi a kù mà mɔkɔ, walii ŋai. 10Iyi à ce ajɔ minji bɛ walii gɔ iyi à ya kpe Agabusi í naa bɛ hai ilɛi Zudee. 11Í naa bi tu wa nɔ í so santiikii Pɔlu í dĩò isɛɛ ŋa do awɔɛ ŋa nɔ í ni, ide iyi Hundei Ilaaɔ̃ wa fɔ wee. Inɛ iyi í nɛ santiikiu ihɛ̃ bɛ ihɛ̃i Zuifu ŋa iyi à wa Zeruzalɛmu aa dũu nɔ a daa dimi mmu ŋa si awɔ. 12Iyi awa do inɛi Sezaree ŋa iyi à wa bɛ à gbɔ ideu, ŋɔi à wasi ku tɔɔ Pɔlu ku maà bɔ Zeruzalɛmu má. 13Amma í ni, na mii í ce ì waa kpata bɛɛbɛ ŋa ì waa ganji wɔɔkɔm ŋa. Ǹ tã sɔɔlu n ku na irii icɛi Lafɛ̃ɛ Jesu Zeruzalɛmu bɛ, kù jɛ ku dĩ nŋu akã. 14Iyi à yɛ kù gbɔ ide nwa, à coko nɔ à ni, Aɔ̃ Lafɛ̃ɛ ku ce idɔɔbiɛ.

15Si anyii nŋu nɔ à dede à ce sɔɔlu à waa bɔ Zeruzalɛmu. 16Ŋɔi si inɔi inɛ ŋa iyi à waa too kpãai Jesu ŋau, inɛ gɔ ŋa à dede hai Sezaree bɛ à si wa, nɔ à bɔò wa hee kpasɛ̃i Nasɔ̃ɔ inɛi Kitimu bii aa ka sɔu. Mɔkɔu í dasi Jesu naanɛ í kpɛ.

Pɔlu í bɔ Zaaki ku cɔ

17Iyi à to Zeruzalɛmu bɛ ŋɔi kpaasi woo dasi Jesu naanɛ ŋa à gba wa do inɔ didɔ̃. 18Iju kumáɛ ŋɔi awaò Pɔlu ŋa à bɔ bi Zaaki nɔ inɛ ngboi igbɛi Jesu ŋau fei à tɔtɔɔ bɛ. 19Ŋɔi Pɔlu í ce ŋa fɔɔ nɔ í sisi nŋa mii ŋa iyi Ilaaɔ̃ í ce akã akã si gãmɛi hai jɛ Zuifu ŋa na icɛ iyi nŋu í ce. 20Iyi à gbɔ ideɛ ŋɔi à saabu Ilaaɔ̃. Ŋɔi à sɔ̃ Pɔlu à ni, kpaasi nwa, ì gbɔɔ? Zuifu nkpɔ nkpɔi í dasi Jesu naanɛ nɔ aŋa fei à waa too woodai Moizi do himma. 21Amma inɛ ŋa à máɛ ide à ni ì waa sɔ̃ Zuifu ŋa iyi à wa bi dimi mmu ŋa a jɔ̀ woodai Moiziu do dedembai bala nwa ŋa, nɔ a maà ya dasi ama nŋa ŋa bango. 22Debɛi, bɛirei aa ka ce. Kù nɛ sika kãma inɛ ŋa aa mà iyi ì to wa ilu ihɛ̃. 23Na nŋu, ce iyi aa ka sɔ̃ɛ. Amanɛ mɛɛ gɔ ŋa à wa ihɛ̃ iyi à cea Ilaaɔ̃ kuwã#21:23 à cea Ilaaɔ̃ kuwã Si waati bɛɛbɛ, bii inɛ í cea Ilaaɔ̃ kuwã, kù nɛ kpãai ku wa iriɛ. Amma bii kuwãu í kɔ̃, waati nŋu á wa iriɛi, nɔ ku ce kuwee ŋa.. 24Kooò ŋa nɔ iŋɛ fei i ce buki iyi á jɔ̀ i maaju ŋa, nɔ i sã fiai iri ku wa nŋa. Nŋui á jɔ̀ inɛ fei ku mà mii iyi à gbɔ na iriɛu kù jɛ ntɔ, amma aa yɛ iyi awɔ takaɛ ì waa too woodai Moizi. 25Iyi í jɛ ti dimi mmu woo dasi Jesu naanɛ ŋa, awa à kɔ tia à samba nŋa si na iyi í jɔ̀ à yɔɔ iyi í sĩa ka jilɛ nŋa wooda ka ni a maà ya jɛ ijɛi kuwee#21:25 a maà ya jɛ ijɛi kuwee Woo dasi Jesu naanɛ ŋa à nɛ kpãai a jɛ ijɛi kuwee iyi à cea Ilaaɔ̃, amma a kù nɛ kpãa a jɛ ijɛi kuwee iyi à cea iwɛ̃ ŋa. nɔ a maà ya jɛi njɛi iŋa nɔ a maà ya ŋɔ iŋai mɛɛmu ŋa iyi a kù saka nɔ a maà ya tɔtɔɔ sɛ̃ɛ hai ce abɔdɔ̃. 26Iju kumáɛ nɔ Pɔlu í kooò inɛ ŋau nɔ à ce buki iyi á jɔ̀ a maaju. Si anyiɛ Pɔlu í lɔ bantumai kpasɛ̃i Ilaaɔ̃ í koo í sɔ̃ woo weei Ilaaɔ̃ ŋau ajɔ iyi bukii inɛ mɛɛ ŋau á kɔ̃ a bɛi a ce nŋa kuwee akã akã.

À mu Pɔlu kpasɛ̃i Ilaaɔ̃*

27Iyi ajɔ mɛɛjeu wa tã ŋɔi Zuifu ŋa iyi à naa hai ilɛi Azii à yɛ Pɔlu kpasɛ̃i Ilaaɔ̃ bɛ. Ŋɔi à dede idɔi zamaau fei nɔ à muu. 28À dɔ̃ anu à waa ni, iŋɛ inɛi Izirɛli ŋa, i faaba. Mɔkɔu ihɛ̃ í ya maa bɔ bii fei ku maa kɔ inɛ fei si cio ku maa fɔò taalei inɛi Izirɛli ŋa do woodai Moizi do kpasɛ̃i Ilaaɔ̃u ihɛ̃. Wee í naaò dimi mmu gɔ ŋa wa si kpasɛ̃u ihɛ̃ má, nɔ í dasi ile kumáu riisi. 29À fɔ bɛɛbɛi si na iyi í jɔ̀ à tako à yɛ Torofimu inɛi Efɛɛzuu, nŋu do Pɔlu si iluu, nɔ à tamaa bɛi Pɔlu í naaɛ wa kpasɛ̃i Ilaaɔ̃ bɛi. 30Nɔ inɛ ŋa à cã bii bii si iluu fei. Ŋɔi inɛ ŋa à sɛi à wasi ku naa hai bii fei, nɔ à mu Pɔlu à faa à fitaɛ wa hai bantumai kpasɛ̃u. Bɛ gbakã à cĩmbo gambo ŋau. 31Waati iyi à waa bi a kpaa ŋɔi inɛ ngboi igũi Romu í gbɔ iyi hoya hoya í dede si ilui Zeruzalɛmu fei. 32Ŋɔi gbakã í so sooge gɔ ŋa do inɛ ngboi sooge gɔ ŋa má nɔ í sɛi í bɔò ŋa bi zamaau. Iyi zamaau í yɛ nŋu do sooge ŋau, ŋɔi à jɔ̀ Pɔlu ku cã. 33Ŋɔi inɛ ngboi igũu í bɔ bi Pɔlu í muu nɔ í ni a dũu do sesee minji. Nɔ í bee ŋa í ni, yooi. Mii í ce. 34Amma si zamaau inɛ gɔ ŋa à waa la do ide akã, inɛ gɔ ŋa mɔ do ide mmu hee í jɔ̀ inɛ ngboi igũu kù yɔkɔ ku mà ntɔi ideu na wakatau. Na ŋɔi í ce í ni a bɔò Pɔlu bii kuwai sooge ŋa. 35Iyi à toò Pɔlu hai bii à ya gũ a lɔò inɔ ileu, ŋɔi sooge ŋau à soo lele na kugaabui zamaau, 36domi inɛ ŋau fei à waa too ŋa à waa laò à waa ni, i kpaa.

Pɔlu wa kɔò araɛ

37Si bɛi à waa bi a lɔò Pɔlu inɔ ileu, ŋɔi í bee inɛ ngboi igũu í ni, aa yɔɔdaam n fɔ ide gɔ? Ŋɔi inɛ ngbou í beeɛ í ni, asee ì waa gbɔ Gɛrɛki mɔm? 38Debɛi, i kù jɛ inɛi Ezibiti iyi si ajɔ gbeejiu ihɛ̃ í bi ku kɛkɛ ilaaluu nɔ í tɔtɔɔ woo kpa inɛ ŋa aŋa dubu mɛɛ í bɔò ŋa si gbabuau? 39Ŋɔi Pɔlu í jɛaa í ni, amu Zuifui. Amu amaalui si ilu gɔ iyi í nya iri. À bím nii Taasi si ilɛi Silisi. Ǹ wa n tɔɔɛi, jɔ̀ n ba inɛ ŋau ide ku fɔ. 40Nɔ inɛ ngboi igũu í muaa kpãa. Ŋɔi Pɔlu wa leekĩ bi ku gũ ku lɔò inɔ ileu í ni zamaau ku coko do awɔ. Ŋɔi aŋa fei à coko cau. Nɔ Pɔlu wa sɔ̃ ŋa ide do feei Ebɛɛ.

Currently Selected:

Woo bɛ ŋa 21: MKL

Highlight

Copy