Woo bɛ ŋa 19

Pɔlu í bɔ Efɛɛzu

1Waati iyi Apolo í wa Kɔrɛnti Pɔlu í too kpãa iyi wa bɔ ikpa iri kuta ŋau nɔ í to Efɛɛzu. Ŋɔi í ba inɛ gɔ ŋa iyi à waa too kpãai Jesu bɛ. 2Ŋɔi í bee ŋa í ni, i kù ba Hundei Ilaaɔ̃ titã hai waati iyi ì dasi naanɛ ŋa? Ŋɔi à jɛaa à ni, aawo. A kù gbɔ mà Hundei Ilaaɔ̃ í wɛɛ mɔm. 3Ŋɔi Pɔlu í bee ŋa má í ni, debɛi, inyi ku dasi yoomai à ce nŋɛ. Ŋɔi à jɛaa à ni, inyi ku dasii Zãai. 4Ŋɔi Pɔlu í sɔ̃ ŋa í ni, inɛ ŋa iyi à kpaasi idɔ, aŋai Zãa í dasi inyi. Nɔ Zãa í ya sɔ̃ inɛ ŋai ku ni a dasi Jesu naanɛ, nŋu iyi á na ku naa si anyii nŋu. 5Iyi à gbɔ idei Pɔluu ŋɔi à ce inyi ku dasi do irii Lafɛ̃ɛ Jesu. 6Ŋɔi Pɔlu í le nŋa awɔ si iri nɔ Hundei Ilaaɔ̃ í naa si ŋa ŋɔi à waa fɔ ide do fee mmu ŋa nɔ à ce walii. 7Inɛ ŋau à to zakai aŋa maateeji.

8Si anyii nŋu, Pɔlu í bɔ ile bii Zuifu ŋa à ya ce kutɔtɔɔu wa waazo idei bommai Ilaaɔ̃ do naanɛ nɔ í ce bɛɛbɛ zakai cukpa mɛɛta, nɔ aŋaò ŋa à wasi ku busi njɛ nɔ í wasi ku lɛlɛ ŋa ku ba a dasi naanɛ. 9Amma inɛ gɔ ŋa à lele idɔ nŋa à kɔ̀ ku dasi naanɛ, nɔ à nyi à waa fɔ ide laalɔ má si kpãai idei Lafɛ̃ɛ si wajui inɛi igbɛ ŋau. Na ŋɔi í jɔ̀ Pɔlu í tɛkɛɛ hai bi tu ŋa, nŋu do inɛ ŋa iyi à waa too kpãai Jesuu. Í ya maa kɔ ŋa si cio ajɔ fei si ile cioi inɛ gɔ iyi à ya kpe Tianusi. 10Bɛɛbɛi í ce adɔ̃ minji hee inɛ ŋa iyi à wa ilɛi Azii fei, hai Zuifu ŋa do hai jɛ Zuifu ŋa, à gbɔò idei Lafɛ̃ɛ Jesu.

Idei ama inɛmɔkɔi Seva ŋa

11Ilaaɔ̃ í mua Pɔlu gbugbã ku ceò maamaake nla ŋa. 12Na ŋɔi í jɔ̀ jaaɛ iyi í lu araɛ fei, bii à so à lea bɔ̃ɔ ŋa si ara à ya ba irii. Inɛ ŋa mɔ iyi à nɛ inɛi inɔɔko ŋa, bii à lu ŋaò, inɛi inɔɔko ŋau à ya fitai. 13-14Zuifu gɔ ŋa à ya maa dabii bii fei a maa nya inɛi inɔɔkoi inɛ ŋa. Si inɔ nŋa gɔgɔ nŋa ŋa à dasi idɔ a kpe irii Lafɛ̃ɛ Jesu a nyaò inɛi inɔɔkoi inɛ gɔ ŋa. Zuifu inɛ ngboi woo weei Ilaaɔ̃ gɔ iyi à ya kpe Seva, ama inɛmɔkɔ mɛɛjeɛ ŋai à waa bi a ce bɛɛbɛ. Ajɔ nŋu gɔ à sɔ̃ inɛi inɔɔkoi inɛ gɔ à ni, do irii Jesu iyi Pɔlu wa waazou, fita. 15Amma inɛi inɔɔkoi inɛɛu í ni, ǹ mà Jesu nɔ ǹ mà Pɔlu, amma yooi iŋɛ mɔ ì jɛ. 16Ŋɔi mɔkɔ iyi í nɛ inɛi inɔɔkou í fo í bata ŋa nɔ í kãmia ŋa í cã ŋa í mɛɛ ŋa ntɔ ntɔ hee aŋa fei à sa hai kpasɛ̃ɛ basĩ. 17Ŋɔi inɛi Efɛɛzu ŋa hai Zuifu do Gɛrɛki ŋa fei à gbɔ ideu, nɔ njo í mu ŋa, nɔ irii Lafɛ̃ɛ Jesu í nɛ bɛɛrɛ ntɔ ntɔ. 18Ŋɔi woo dasi Jesu naanɛ nkpɔ í naa í tuuba si bantuma. À fɔ mii iyi aŋa à ya ce wo. 19Inɛ ŋa iyi à ya tako a maa ce dobu dobu wo aŋa nkpɔ nkpɔi à naaò tia nŋa ŋa iyi à ya maa ceò dobu dobuu wa à naa à joo si wajui zamaa. Inɛ gɔ í ce dooi fiai tia ŋau, nɔ à ba wee jiaɛ í to zakai kpɛkɛlɛi isɔ fũfũ dubu ciitaa#19:19 kpɛkɛlɛi isɔ fũfũ dubu ciitaa Fiai tia ŋau iyi à fãa à yɔkɔ ku to fia iyi aa sãa woo ce icɛ zakai adɔ̃ cijeò fɛɛwa si waati nŋa.. 20Bɛɛbɛi gbugbãi Aɔ̃ Lafɛ̃ɛ í jɔ̀ idei Jesu wa fangaa bii fei do gbugbã.

Ijai Efɛɛzu

21Iyi nŋu ŋau í ce í tã, ŋɔi Pɔlu í dasi idɔ nŋu ku too do ilɛi Masedɔni do si ilɛi Gɛrɛsi nŋu ku bɔ Zeruzalɛmu. Í ni bii nŋu í to bɛ, tilasii nŋu ku bɔ Romu mɔ. 22Ŋɔi í bɛ Timɔtee do Erasitu, aŋa iyi à waa sobiɛ si icɛu ikpa Masedɔni, amma nŋu takaɛ í kpɛ keeke má ilɛi Azii bɛ.

23Waati bɛɛbɛ wahala nla gɔ í dede Efɛɛzu bɛ na kpãai idei Jesu. 24Gbɛdɛ woo cã isɔ fũfũ gɔ í wa bɛ à ya kpoo Demɛtiusi. Í ya ce mii ŋa iyi à jɔ ilei iwɛ̃ nŋa Aritemi#19:24 iwɛ̃ nŋa Aritemi Iwɛ̃u ihɛ̃ inaaboi.. Nɔ woo ce icɛ dimi bɛɛbɛ ŋa fei à ya ba si amanii jiida. 25Ŋɔi í tɔtɔɔ woo ce icɛ ŋa do gbɛdɛ mmuɛ gɔ ŋa má í ni, i kù mà ŋa iyi si icɛu ihɛ̃i à waa ba si amani? 26Iŋɛ taka nŋɛ ì waa yɔɔ ŋa, ì nɔ ì waa gbɔ ŋa mii iyi Pɔlu wa ce. Wa ni kù jɛ iwɛ̃ ŋa iyi amanɛ ŋa à ce do awɔ nŋai aa tɔɔ. Nɔ í yɔkɔ í kãmia inɛ nkpɔ nkpɔ, kù nɔ kù jɛ baa Efɛɛzu ihɛ̃ nŋu akã, do si ilu nkpɔi ilɛi Azii feii. 27Á na ku jɔ̀ icɛ nwa ku ba iri sãmi. Si anyiɛ á nyi ku jɔ̀ a kaa saalu baa ilei iwɛ̃ nwa Aritemi, nɔ bɛɛrɛ nlaɛ á na ku tã, iwɛ̃ iyi inɛi Azii ŋa do inɛi andunya fei wa tɔɔ.

28Iyi à gbɔ ideu ŋɔi idɔ nŋa í kɔ̃, nɔ à wasi ku dɔ̃ anu hee lele à waa ni, iwɛ̃ nwa Aritemi nwa í la. 29Ŋɔi hoya hoya í dede si iluu fei nɔ do anu akã inɛ ŋa à fo à bata Gayusi do Aritaaki à mu ŋa à bɔò ŋa bii à ya cɛiu. Inɛ ŋau inɛi Masedɔni ŋai, aŋai à waa si Pɔlu si isɛɛnɛu. Nɔ inɛ nkpɔ í sɛi í bɔ bɛ. 30Pɔlu wa bi ku bɔ bi zamaau amma kpaasi woo too kpãai Jesu ŋau à kɔ̀. 31Nɔ hee do akawei ilɛi bɛ ŋa gɔgɔ ŋa iyi à jɛ kpaasiɛ ŋau aŋa mɔ à bɛ ama wa à ni a koo a tɔɔɛ suuru ku maà naa ile bɛ. 32Ile bɛi aŋa fei à waa dɔ̃ anu à wasi ku fɔ ide nŋa ikã ikã. Inɛ nkpɔ nŋa kù mà na mii í ce à tɔtɔɔ bɛ mɔm. 33Ŋɔi Zuifu gɔ ŋa à sisia Alesandu yaasei ideu nɔ à tale siɛ wajui zamaau. Ŋɔi Alesandu í ni a coko do awɔ nɔ wa bi ku sɔ̃ ŋa ideu do yaaseɛ. 34Amma waati iyi à mà iyi nŋu mɔ Zuifui, aŋa fei à wasi ku dɔ̃ anu hee zakai isɔ minji à waa ni, iwɛ̃ nwa Aritemi í la.

35Si anyiɛ ŋɔi woo kɔ tiai ilu nŋau í jɔ̀ à coko nɔ í ni, iŋɛ inɛi Efɛɛzu ŋa, yooi kù mà iyi ilu nwai ilei Aritemi ilu bɛɛrɛu í wa, awai à nɔ à waa ceaa icɛ. Nɔ ì mà ŋa hai lelei mii iyi í jɔɔu í cuku wa. 36Inɛ gɔ kaa yɔkɔ ku jã ideu. Na nŋu, i mu ara nŋɛ ŋa i maà ce ngɔgɔ do saasa. 37Inɛ ŋa iyi ì naaò wa nsɛi ŋau ihɛ̃ ŋa a kù ce ilei mii ndii ilei iwɛ̃ nwa ŋa a kù nɔ a kù fɔ laalɔɛ. 38Na nŋu, bii Demɛtiusi do gbɛdɛ ŋa iyi à wa bi tɛɛ ŋau à nɛ ide gɔ do inɛ gɔi à jilɛ ajɔ ŋa iyi à ya ce kiiti do woo ce kiiti ŋa, i jɔ̀ ŋa a ce ide nŋa bɛ. 39Nɔ bii ì nɛ ide gɔ si antaiɛ má ŋa, aa yɔkɔ i wũaɛ bi inɛ ngboi woo ce kiiti ŋa. 40Aa yɔkɔ a yɛ taale nwa a ni awai à dede ija si idei nnyiu ihɛ̃ domi kù nɛ yaase. Bɛi à bee wa yaasei ideu a kaa ka ba iyi aa ka fɔ mɔm.

Iyi í fɔ bɛɛbɛ í tã ŋɔi í jɔ̀ zamaau í fangaa.#19:40 Iyi í fɔ bɛɛbɛ í tã ŋɔi í jɔ̀ zamaau í fangaa Si kukɔ gɔ ŋa ide ŋau à wa si isɛɛde 41.

Currently Selected:

Woo bɛ ŋa 19: MKL

Highlight

Copy