Woo bɛ ŋa 16

Timɔtee í too Pɔlu do Silasi

1Ŋɔi Pɔlu do Silasi à to Dɛɛbu. Si anyiɛ nɔ à bɔ Lisiti. Wee inɛ gɔ í wa bɛ wa too kpãai Jesu. À ya kpoo Timɔtee. Iyeɛ Zuifu woo dasi Jesu naanɛi, amma baaɛ Gɛrɛkii. 2Kpaasi woo dasi naanɛ ŋa iyi à wa Lisiti do Ikonimu à ya maa fɔ jiida ku jɛɛ. 3Pɔlu í bi Timɔtee ku too nŋu nɔ í gbã í nɛɛ. Amma ku bɛi ku gbã ku nɛɛ í dasiɛ bangoi na Zuifu ŋa iyi à wa bɛu domi aŋa fei à mà iyi baaɛ Gɛrɛkii. 4Nɔ à bɔ ilu do ilu ŋa à sɔ̃ woo dasi Jesu naanɛ ŋau mii ŋa iyi woo bɛ ŋau do inɛ ngboi igbɛi Jesu ŋa iyi à wa Zeruzalɛmu à jilɛ nɔ à ni a jirima ŋa. 5Ŋɔi naanɛi woo dasi Jesu naanɛ ŋau í teese í kɔ̃ɔsi nɔ akpɔ nŋa mɔ í ya maa kɔ̃ɔsii ajɔ fei.

Pɔlu í ce kuyɛ Torasi

6Hundei Ilaaɔ̃ í ganji Pɔlu ŋa a waazo idei Ilaaɔ̃ si ilɛi Azii, ŋɔi í jɔ̀ à too do ikpa ilɛi Firizi do ti Galati. 7Iyi à to ilɛi Mizi ŋɔi à waa bi a bɔ ilɛi Bitini, amma Hundei Jesu í kɔ̀ nŋa. 8Ŋɔi í jɔ̀ à too do ilɛi Mizi à bɔ ilu iyi à ya kpe Torasi. 9Ŋɔi Pɔlu í ce kuyɛ idũ. Si kuyɛɛu í yɛ inɛi Masedɔni gɔ wa leekĩ nɔ wa tɔɔ nŋu ku naa Masedɔni ku na ku sobi aŋa. 10Si bɛi í ce kuyɛu ŋɔi gbakã awa à waa dɛ kpãa ku ba ka bɔ Masedɔni domi à mà iyi Ilaaɔ̃ í bi kaa waazo nŋa laabaau jiidau.

Lidi í dasi naanɛ Filipi

11Hai Torasi bɛi awa à lɔ akɔi inyi nɔ gbakã à bɔ gũngũm gɔ iyi à ya kpe Samɔtasi. Iju kumáɛ nɔ à bɔ Neapolisi. 12Hai bɛ do kutɛi à nɛ à bɔ Filipi, ilu nlai Masedɔni nɔ à ce ajɔ minji bɛ. Wee inɛi Romu ŋai à nɛ iluu. 13Si ajɔi kusĩmi ŋɔi à fita hai ilu bɛ à bɔ itĩi ido gɔ, à bɔ ku cɔ mà tengi bii à ya ce kutɔɔ í wa bɛ. Ŋɔi à koo à yɛ tengi bii inɛ ŋa à ya ce kutɔɔ nɔ à buba à ce faaji do inaabo gɔ ŋa iyi à tɔtɔɔ bɛ. 14Abo gɔ í wa bɛ à ya kpoo Lidi, inɛi Tiatiii, í ya ta acɔi fia nkpɔ nɔ í ya maa jirima Ilaaɔ̃. Iyi à waa ba ŋa ide ku fɔ nɔ wa de itĩ, nɔ Lafɛ̃ɛ í cĩ idɔɛ ku ba ku gbɔ ide iyi Pɔlu wa fɔ. 15Abou do inɛi kpasɛ̃ɛ ŋa fei à ce inyi ku dasi nɔ í tɔɔ wa í ni, bii ì mà iyi ǹ dasi naanɛ ntɔ ntɔ ŋai i naa wa i naa i ce baa ajɔ minji kpasɛ̃m ŋa. Nɔ í mante wa hee à jɛ́ nɔ à bɔ kpasɛ̃ɛ.

Inɔ piisɔ̃ɔi Filipi

16Ŋɔi ajɔ nŋu gɔ iyi awa à waa bɔ tengi bii à ya ce kutɔɔu, à ko ama inaabo woo ce icɛ gɔ iyi í nɛ inɛi inɔɔko. Bii inɛi inɔɔkou í dede siɛ í ya maa fɔ ide iyi á na ku cei. Nɔ lafɛ̃ɛɛ ŋa à waa ba fia jiida na iriɛ. 17Ŋɔi í too awa do Pɔlu wa la hee lele wa ni, inɛ ŋau ihɛ̃ woo ce icɛi Ilaaɔ̃ ilu gbugbã ŋai. À naa ku nyisi ŋɛ kpãai faabai. 18Bɛɛbɛi í ya maa fɔ ajɔ fei, hee ideu í caa si Pɔlu nɔ í sinda í sɔ̃ inɛi inɔɔkoɛu í ni, do irii Jesu Kirisi ǹ ni, fita. Bɛ gbakã í fita siɛ. 19Iyi lafɛ̃ɛɛ ŋa à mà iyi aŋa a kaa ba siɛ fia má, ŋɔi à mu Pɔlu do Silasi à tale ŋa à bɔò ŋa bantuma bi woo kiiti ŋa. 20À bɔò ŋa si wajui inɛ ngboi Romu ŋa à ni, inɛ ŋau ihɛ̃ à waa bɛjɛ ilu nwai. Zuifu ŋai, 21nɔ à wasi ku sisi ide gɔ ŋa iyi wooda nwa kù bi ka gbɔ hee ka tooɛ awa iyi à jɛ inɛi Romu ŋa. 22Ŋɔi idɔi zamaau í kɔ̃ si ŋa. Ŋɔi inɛ ngbo ŋau à bɔ ibɔi Pɔlu do Silasi do gbugbã nɔ à ni a cã ŋa do kpɔtɔɔ. 23Iyi à cã ŋa jiida jiida à tã ŋɔi à koo à cĩmbo ŋa ile piisɔ̃ɔ nɔ à sɔ̃ woo degbe piisɔ̃ɔu ku degbe ŋa ku sĩa. 24Iyi woo degbeu í gbɔ à sɔ̃ɔ bɛɛbɛ, ŋɔi í koo í dasi ŋa hee ilaawai ankãanyii piisɔ̃ɔu nɔ í da nŋa si gbɛɛgbɛɛkui jĩi.

25Zakai idũ laja ŋɔi Pɔlu do Silasi à waa ce kutɔɔ nɔ à kɔ̃ iri à waa saabuò Ilaaɔ̃. Nɔ inɛi piisɔ̃ɔ ŋa iyi à wa bɛu à waa de si ŋa itĩ. 26Ŋɔi gbakã ilɛ í yaya do gbugbã hee icui ile piisɔ̃ɔu í yaya. Ŋɔi gambo ŋau fei à cĩ nɔ sesee ŋa iyi à dĩò inɛi piisɔ̃ɔ ŋau fei à fũ à cuku. 27Ŋɔi gbakã woo degbeu í jĩ í ba gambo ŋau fei wa cĩ ŋɔi í tamaa bɛi inɛi piisɔ̃ɔ ŋau à sai. Ŋɔi í nya taakuba wa bi ku kpa araɛ. 28Amma Pɔlu í la hee lele í ni, maà cea araɛ laalɔ kãma. Awa fei à wa ihɛ̃. 29Ŋɔi woo degbeu í dɛ fitila í sɛi í lɔ hee ilaawa bii Pɔlu do Silasi à wau nɔ í gulɛ nŋa do kuyaya. 30Ŋɔi í fitaò ŋa wa waduude í ni, i suuru ŋa, mii an ce n baò faaba. 31Ŋɔi à sɔ̃ɔ à ni, dasi Jesu Lafɛ̃ɛ naanɛ aa ba faaba, awɔ do inɛi kpasɛ̃ɛ ŋa fei. 32Ŋɔi à waazoaa idei Lafɛ̃ɛ Jesu, nŋu do inɛi kpasɛ̃ɛ ŋau fei. 33Ŋɔi idũu bɛ woo degbeu í gbã ŋa í koo í wiɛ kumɛɛ nŋa ŋau. Nɔ nŋu do inɛɛ ŋa fei à ce inyi ku dasi gbakã. 34Ŋɔi í gbã Pɔlu do Silasi í bɔò ŋa lele bii ileɛ í wa nɔ í na ŋa ijɛ à jɛ. Nŋu do inɛɛ ŋa fei, inɔ nŋa í dɔ̃ do bɛi à dasi Ilaaɔ̃ naanɛ.

35Iyi iju í má ŋɔi inɛ ngboi Romu ŋa à bɛ polisi ŋa a koo a sɔ̃ woo degbeu ku jɔ̀ inɛ ŋau. 36Ŋɔi woo degbeu í sɔ̃ Pɔlu ideu í ni, inɛ ngbo ŋa à ni n jɔ̀ ŋɛ. Na nŋu, i fita i nɛ nŋɛ sɛ̃ɛ. 37Amma Pɔlu í sɔ̃ polisi ŋau í ni, aawo. À cã wa si bantuma hai a kù ce nwa kiiti, awa mɔ iyi à jɛ inɛi Romu ŋa nɔ à cĩmbo wa si ile piisɔ̃ɔ. Nɔ nsɛi à bi a nya wa do asii? Kù jɛ bɛɛbɛi à ya ce. Í gbe aŋa taka nŋai a naa a nya wa. 38Ŋɔi polisi ŋau à koo à sɔ̃ inɛ ngboi Romu ŋau. Iyi à gbɔ Pɔlu do Silasi inɛi Romu ŋai ŋɔi zigi nŋa í da ntɔ ntɔ. 39Ŋɔi à koo à tɔɔ ŋa suuru nɔ à nya ŋa hai ile piisɔ̃ɔu à bɛi à tɔɔ ŋa a fita hai inɔ iluu. 40Iyi Pɔlu do Silasi à fita hai ile piisɔ̃ɔu ŋɔi à bɔ kpasɛ̃i Lidi. Iyi à koo à yɛ kpaasi woo dasi naanɛ ŋau à mu nŋa gbugbã, à bɛi à nɛ.

Currently Selected:

Woo bɛ ŋa 16: MKL

Highlight

Copy