Mark 13

Iesu yaku Sei nivakena yava di ukero vau rena di ago niyo

(Mt 24.1–2; Lk 21.5–6)

1Kamini Iesu Sei nivakena yava ferei diyori, ini usi dina amiye yokoi yaku niyo, “Oteimana amiye, ve kumo, mina fore bi buni iniye! Ma mina yava bi buni vayavaya!”

2Kamini nikabai reyo, “Mina yava tora tora veisa ba? Minari fore fafau fafau amededi gabi yokoi de amegedi; mina tau gade varadaugedi.”

Toe ma esika esika

(Mt 24.3–14; Lk 21.7–19)

3Kamini Iesu bi Olive yabo omunari Sei nivakena yava berou rofu amegamori, Peter, James, John ma Andrew yaku sui dudu ina rofu baeyadi. 4Resi nikaiteyadi, “Una ni, mina bi goivaka vata nigedi? Ma ini rebe bi gokai mina vau regedi?”

5Ma nigi kora reyo, “Nari rei mona refa; yokoi yaku ya eru ga reyaine. 6Amiye tau gade nai roka dudu baesi iniye nikake regedi, ‘Na bi Keriso,’ resi amiye tau gade eru regedi. 7Idu iya rena negau ma iya rena maike di sina neidegediri, mina yaku yi uka ga dadiyaine. Mina kana bi vata niyaine, idu ari metona bi baena kode. 8Adina gagani tora iniye iniye ma ourefeidena vene iniye iniye ruda regedi. Gagani bedakairi, bi kono yagayaga regedi ma adabo#13.8 Bura bedakai ka ma kerere nufa. ogau nigedi. Mina bi mida odina gera rena esika bae kora regedi kana.

9“Ye ya kaya nari rei mona refa. Kanisoro vene di vanari ya siri resi ini usa usa yavari ubobo regedi. Na dada ya moi gavana ma kini di nemokori are resi#13.9 are resi; bura bedakai afei boyadi ma nufa. ina rofu nai ago ninegau regedi.#Mt 10.17–20; Lk 12.11–12 10Ma gagani gagani tauri ago buni siko nirausi reyaine. 11Kamini kota regi ya afei bogediri, gokai ago nigedi bi mokena toe ga moifa. Idu, mina medari, beika ya mago, ya yaku nigedi, adina bi diya ya yaku sina nidedi, idu bi Vima kikifa yaku. 12Ma usika ourena yaku usika ourena muyena rofu siri rego, ma baba yaku ini mida rofu makai rego. Mida mida yaku ini nono baba rofu tourage regedi ma umuyegedi. 13Ma amiye tau gade yaku nai roka dada ya rofu gubuyo regedi, idu kaere are rei gira rego bogo ari metona baego mamo bi moi vegu rigo.#Mt 10.22

Vegu no iniye

(Mt 24.15–28; Lk 21.20–24)

14“Bura veisa amiye bi ada yora niyaine: Ye#13.14 Bura bedakai ka Sei di ago niyo amiye Daniel senagi niyo kana nufa. vegu no iniye redo amiye are ga reyaine sanari are rego vegediri, bi ya kaere Judea gaganiri, bi omuna rofu ori difa.#Dan 9.27; 11.31; 12.11 15Ma yava tebo odorori amiye bi nesi ini yava dui rei ga bosi ini gugura fore ga moi yakuyaine.#Lk 17.31 16Ma murori amedo amiye bi ini fafau varuka moigi ga dairiyaine. 17Idu mirona ituari, mina vegu no vata nigori, nono kaere bi rivo nufa ma nono ini mida susu irido ina fafau bi no iniye iniye! 18Idu usa usa nifo kumo mina bi avari ogau ga niyaine, 19ini adina mirona medari, bi no tora gade iniye, senagi senagi Sei yaku oma ma kono riyo, baeyo ma gua mina kana bi koina, gabi rofu di, mina kana bi dudusa ogau de nigo.#Dan 12.1; Rev 7.14 20Ye Varika amiye yaku mina vegu no di ari de moi tumu reyagadu, amiye yokoi moi vegu de riyagadu, idu ini auba reyo vene dada, mina ari moi tumu rego.

21“Kamini amiye yokoi yaku ya nigo vonisi, ‘Ve kumo, Keriso bi yomini!’ ma ‘Ve kumo, ina bi yomironi!’ ini ago rofu mokena vari gira ga aefa. 22Ini adina bi, Keriso ofa vene ma Sei di ago nidedi ofa vene ogau nisi rebe ma mokena vegu dudu, Sei di auba reyo vene ofa dudu eru regedi, vata nigo vonisi bi. 23Ye nari refa; na bi beika tau ogau nigedi bi ari dobau sena ya niyaka.

Amiye di mida di dena

(Mt 24.29–31; Lk 21.25–28)

24“Idu mirona ari ini toe nigo mamo gabi meda bi mukuna nigo ma eyo bi ini vabara de kikigo,#Is 13.10; Ezek 32.7; Joel 2.10, 31; 3.15; Rev 6.12 25iya bi omari gutuna yarei degedi, ma omari ini vava amededi, mina ka moi tururu regedi.#Is 34.4; Joel 2.10; Rev 6.13 26Mina usi amiye yaku Amiye di mida seuyari vava ma vabara tora nufa debigo bi vegedi.#Dan 7.13; Rev 1.7 27Ma ini naivo naivo vima nifeidego, ma ini auba reyo vene kono tora noibanu gutuna ma kono di berou berou noibanu gutuna oma berou berou noibanuri moi egogo regedi.

Fuka yabo di oteimana ago

(Mt 24.32–35; Lk 21.29–33)

28“Gua fuka yabo rofu mokefa. Ini bobo ruika fu nisi iye imu regori, ya bi diba nigedi amona bi bae negau nido. 29Mina dada, mina ogau nibigedi ma vegediri, bi ya ya diba ari bi negau nigi rego.#13.29 ari bi negau nigi rego; o ini dairina bi negau amego. 30Rama ya nida, gua ari amededi vene bi muyei vau regedi koderi, bogo mina beika baika tau gade vata nigedi mamo. 31Oma ma kono bi roro nigedi, idu nai ago bi roro de nigedi.

Amiye yokoi bi meda ma meda nemoko toto

(Mt 24.36–44)

32“Idu amiye yokoi mirona meda, o meda nemoko bi toto, omari di naivo naivo vima ka ina toto, Mida ka ina toto, idu Baba iniye maka ina diba.#Mt 24.36 33Ya vene bi nari rei mona refa! Adina ya ya toto ari metona baego bi. 34Mina bi amiye yokoi yava ika oto dina kana: Ini yava feresi ini moimai rei tavoi rededi vene vanari aesi ina yokoi yokoi ini moimai neinei mago. Ye yava ida vena nari rego amiye maka bi nioteimago, nemoko kikigasa amego.#Lk 12.36–38 35Mina dada nari gira refo, ini adina bi ya ya toto yava biyaguna amiye goivaka baego, bi uriyenauri, urusa tobori, kokoro koo- nigori, ba uriyaku gorogoro okigo. 36Evade maka okigori, varebigedi ga ya vei tau reyaine. 37Beika ya vene rofu ya nida, amiye tau rofu nigida: nemoko kikifo!”

Currently Selected:

Mark 13: kqc

Highlight

Copy