Mark 12

Waini meko muro nari rena vene di mokena ago

(Mt 21.33–46; Lk 20.9–19)

1Kamini mokena ago nigi kora reyo: “Amiye yokoi bi waini meko di muro varisi kota mina buru risi waini meko etei rina di kono ruba goesi ota rina vene di fata risi muro nari rena vene be ini nanaka moigika nimasi yava ika oto diyo.#Is 5.1–2 2Mina usi butu rena di meda okiyori, bi ini moimai rei tavoi redo amiye yokoi muro nari rena vene rofu nifeideyo, ma waini meko vareyo, mina bi butu reyainedi. 3Idu bi mina moimai rei tavoi redo amiye moi gira resi ubobo resi vana notoka nifeideyadi. 4Kamini dudusa ini moimai rei tavoi redo amiye yokoi ina vene rofu nifeideyo, idu#12.4 Bura bedakai ka fore makusi nufa. ini ada usi ni moi maena reyadi. 5Dudusa yokoi nifeideyo, idu bi umuyeyadi. Ina bi besa ma nifeideyo, idu bedakai bi uyadi ma bedakai bi umuyeyadi. 6Ye inasa bi yokoi maka amegamo, ini uka mado mida. Ina bi gabi koukou nifeidesi niyo, ‘Nai mida bi matagini regedi.’ 7Idu muro nari rededi vene yaku iniye iniye niyadi, ‘Mina bi muro biyaguna amiye nigo. Nesi umuyenadi, ma beika baika ini baba ferego bi uni nigo!’ 8Ye moi gira resi umuyesi waini meko di muro etofarori makuyadi.

9“Ye waini meko di muro biyaguna amiye bi gokai beika be rego? Ina bi baesi muro nari rededi vene umuyesi muro bi bouna vene mago. 10Ya bi Sei di agori mina bura veyadi ba?#Ps 118.22–23

‘Yava akuna vene moi kekevata uyadi fore

bi yava moi gira redo fore iniye niyo.

11Mina bi Varika amiye yaku reyo;

ma uni nemokori bi buni vayavaya!’ ”

12Ma ina moi gira regika ida maina reyadi, adina diba niyadi mina mokena ago ina vene fafau niyo. Idu amiye tau gade rofu ori reyadi, dada feresi diyadi.

Takesi fei rena di nikaitena

(Mt 22.15–22; Lk 20.19–26)

13Gabi Pharisee ma Herod di eta rofu vene bedakai nifeideyadi, ini ago nigori, eru regedi. 14Ye baesi niyadi, “Oteimana amiye, una una diba ya bi sina rama maka nisa amiye. Ya bi amiye rofu de ori reisa, ini adina bi amiye gokai kana bi de mokeisa, idu sina rama dudu maka, Sei di ida oteimaisa. Caesar rofu takesi fore fei rena bi uni ago gira rofu rorobo ba ide? Fei bi regifa ba ide?”

15Idu bi sena ini ofarosi sina vei diba resi nikaiteyo, “Beika resi nai uka maina regika nivededi? Siriva fore yokoi na rofu moi baefo kumo vegida.”

16Ma fore moi baeyadi, ma nikaiteyo, “Mina bi kaere di roka?”

Ye nikabai reyadi, “Caesar di.”

17Kamini niyo, “Beika Caesar di, bi Caesar mafa, ma beika Sei di, bi Sei mafa.”

Ma ini ago rofu tururu reyadi.

Muyenari dadi rae rena di nikaitena

(Mt 22.23–33; Lk 20.27–40)

18Kamini Sadducee vene be, kaere niyadi dadi rae rena bi koina, bi Iesu rofu baeyadi.#Acts 23.8 19Resi nikaitegasa niyadi, “Oteimana amiye, Moses yaku una rofu bura reyo bi: ‘Amiye kaere ini dubuini muyesi ini rema ferego, idu mida bi koina, mina amiye bi ini obu mesi ini dubuini di mida moiyainedi.’#Deut 25.5 20Yokaru bi dubuiyaka 7 amegamadi. Ourena bi rema meyo, idu muyeyo, mida yokoi de. 21Ini usi vata niyo amiye ka makai mesi muyeyo, mida yokoi de. Ye mina usi amiye ka makai reyo. 22Mina vegu yokoi maka mina dubuiyaka 7 tau noibanu rofu vata niyo—ina tau noibanu mida de muyeyadi. Gabi koukou mina rema ka muyeyo. 23Ye dadi rae renari, ina bi kaere di rema nigo, adina bi amiye 7 tau noibanu yaku meyadi?”

24Ma nikabai reyo, “Ya forovai rededi ba, Sei di ago ma ini vava ya ya toto dada? 25Adina muyena gutuna dadi rae regasa bi iniye iniye de megedi, idu omari naivo naivo vima kana nigedi. 26Idu muyena vene dadi rae regedi dada, ya Moses di bura renari bura veyadi ba ide? Vaigamo yabo di agori gokai Sei yaku niyo, ‘Na bi Abraham di Sei, Isaac di Sei ma Jacob di Sei.’#Ex 3.6 27Ina bi vegu ameibobina vene di Sei, diya muyena vene di Sei. Ya bi forovai tora reyadi!”

Ago gira tora iniye

(Mt 22.34–40)

28Ma ago gira oteimana amiye yokoi baesi bi ini nidodi regamadi ago neideyo. Ye Iesu yaku rama rorobo dudu ago magamo mina veyori, bi nikaiteyo, “Ago girari goina bi tora iniye?”#Lk 10.25–28

29Ma niyo, “Tora iniye bi yomini, ‘Neidefo Israel vene, Varika amiye uni Sei ina bi Varika amiye yokoi maka.#12.29 Varika amiye uni Sei ina bi Varika amiye yokoi maka; o Varika amiye bi uni Sei, Varika amiye maka.#Deut 6.4–5 30Ma yi uka meko noibanu, yi vima noibanu, yi mokena noibanu, ma yi yeiva tora noibanu dudu Varika amiye yi Sei uka magiya.’#12.30 Bura bedakai ka Mina bi ourena ago gira mini nufa. 31Ma mina usi bi yomini: ‘Ya kaya uka maisa kana, yi atafu amedo amiye uka magiya.’ Ago gira tora yokoi de, mina remanu maka.”#Lev 19.18

32Ago gira oteimana amiye Iesu rofu niyo, “Oteimana amiye ya bi rama niyo; ya bi rorobo iniye niyo, ‘Sei bi yokoi maka; sei bouna de, idu ina maka.’#Deut 4.35 33Ma yi uka meko noibanu, yi mokena noibanu,#12.33 Bura bedakai ka yi vima noibanu nufa. ma yi yeiva tora noibanu dudu Sei uka mana ma yi atafu amedo amiye uka mana, yaku aira ori kamu rena ma vibani ori sisika rena ebu rededi.”#Hos 6.6

34Kamini Iesu veyo ina bi ni mona mona iniye reyo ye niyo, “Ya bi Sei di ourefeidena amena sanari bi maike de ameisa.”

Ye amiye yokoi yaku dudusa nikaitegika de regamadi.

Keriso di nikaitena

(Mt 22.41–46; Lk 20.41–44)

35Kamini Iesu bi Sei nivakena yavari amiye oteimagasa nikaiteyo, “Gokai bi ago gira oteimana vene yaku nidedi Keriso bi David di tutubena? 36David iniye Vima kikifa di vava dudu niyo:#Ps 110.1

‘Varika amiye yaku nai Varika amiye rofu niyo:

Nai vana rama eta rofu ameinu re

bogo na yaku yi tuma vene yi yuka aena sana kana rigida mamo.’

37David iniye yaku ‘Varika amiye,’ vo niyo, ye gokai ida dudu ina bi ini tutubena?”

Iesu yaku ago gira oteimana vene fafau nidiba reyo

(Mt 23.1–36; Lk 20.45–47)

Amiye tau gade gade ada dudu ini ago neidegamadi. 38Ye ini oteimana ago bi yomini: “Vei mona refo ago gira oteimana vene rofu, kaere varuka doba dudu nana regika ma maketiri amiye yaku ago buni dudu matagini reyagane, 39ma usa usa yavari ma irakuna sanari amena sana ka buni torari ura rededi. 40Ina vene yaku obu vene di gugura ka duma resi ofa dudu usa usa doba nioteimadedi. Mina kana vene, ini kaunava bi tora iniye.”

Obu di fore maro

(Lk 21.1–4)

41Resi bi Sei nivakena yava di fore aena mauari berou eta rofu ameinu resi amiye ini fore aegamadi mina vegamo. Amiye gugura tau nufa bi fore tora aegamadi. 42Idu obu irava baesi bi fore keika keika remanu aeyo, di yeiva bi keika iniye. 43Ma ini usi dina vene nirutu resi niyo, “Rama ya nida, mina gugura de nufa obu irava bi tora iniye aeyo, ma mina amiye tau yaku aeyadi bi ebu reyo. 44Adina ina tau bi fore tora tora ini gugura tau fafau aeyadi, idu mina rema ini gugura nufa de bi, ini tora noibanu aeyo; mina bi ini fafau ameibogo gugura.”

Currently Selected:

Mark 12: kqc

Highlight

Copy