Matthew 25

Rema ofi 10 di mokena ago

1“Kamini Sei di ourefeidena amena sana omari bi rema ofi 10 kaere bi ini keroko moisi rema mego amiye baku regika neyadi mina kana.#Lk 12.35 2Ye 5 bi mokena keika rema, ma 5 bi mokena tora rema. 3Adina mokena keika rema ini keroko moiyadiri, bi diga yokoi inasa de moiyadi, 4idu mokena tora rema bi ini keroko diga siuasa moiyadi. 5Ye rema mego amiye bi evade de baeyo dada, ina tau vakoi ne ota resi vareyadi.

6“Urusa tobou niyori, amiye yokoi raka niyo, ‘Rema mego amiye bi mini! Ina baku regika defa!’ 7Kamini rema vene dadisi ini keroko dogo reyadi. 8Idu ada de rema yaku mokena tora rema rofu niyadi, ‘Yi diga be una mafa, uni keroko bi vai tutumui didedi dada.’ 9Idu mokena tora rema nikabai resi niyadi, ‘Ide, yasa rau rena egere de, ye ya bi sero rededi vene rofu disi voi refa.’ 10Kamini diga voi regi diyadi, usi, rema mego amiye okiyo. Ye mina dogo reyadi rema yaku inasa mena irakuna yavari dui reyadi ma ida biri riyadi.

11“Mina usi mokena keika rema vene ka baesi niyadi, ‘Varika amiye, ida vena una rofu moi eke!’#Lk 13.25 12Idu nikabai resi niyo, ‘Rama ya nida, na na toto ya.’

13“Mina dada nari refa, adina ya ya toto mina meda o mina meda nemoko#25.13 mina meda o mina meda nemoko; bura bedakai Amiye di mida dego meda o meda nemoko nufa. bi.

Moimai rei tavoi rededi vene regode di mokena ago

(Lk 19.11–27)

14“Adina Sei di ourefeidena amena sana omari bi amiye yokoi yava ika oto dina kana, kaere bi ini moimai rei tavoi rededi vene raka nisi ini gugura nari regika maro. 15Yokoi bi talent 5 masi yokoi bi talent remanu masi yokoi bi talent yokoi maka maro, ini gokai moimai rededi ida dudu. Mina usi feresi diyo. 16Amiye kaere yaku 5 moiyo bi besa tau niyaine sanari aeyo, ye 5 dudusa moiyo. 17Ma amiye kaere remanu moiyo ka ouresi amiye yaku reyo kana resi remanu fafau moiyo. 18Idu amiye kaere yokoi maka moiyo bi moi desi kono goesi ini varika amiye di fore sui rigika guri aeyo.

19“Ari doba tora niyori, mina moimai rei tavoi rededi vene di varika amiye okisi ini fore moiyadi mina moi rorobo rigi reyo kana. 20Ye talent 5 moiyo amiye yaku bi okisi besa 5 moi baesi niyo, ‘Varika amiye, ya bi talent 5 na maro; ve na bi 5 fafau dudusa riyaka.’ 21Ma niyo, ‘Rei mona reyo; ya bi nai vana rama moimai rei tavoi reisa amiye buni! Beika keika ya maraka bi nari rei mona reyo dada, beika tau nari reyainedi ya magida. Baesi yi varika amiyesa ada regasa amebi!’

22“Ma remanu moiyo amiye ka baesi niyo, ‘Varika amiye, ya yaku remanu na maro; bi dudusa remanu riyaka mini.’ 23Ma niyo, ‘Rei mona reyo; ya bi nai vana rama rena moimai rei tavoi reisa amiye buni! Beika keika ya maraka bi nari rei mona reyo mini; na yaku beika tau ourefeideyainedi ya magida. Baesi yi varika amiyesa ada regasa amebi!’

24“Mina usi yokoi maka moiyo amiye ka baesi niyo, ‘Varika amiye, na na diba ya bi amiye gira; varina de reyo sanari goe goe reisa ma yo makuna de reyo mina iruku butu reisa. 25Mina ori resi moi desi kono goesi sui rigika guri aeyaka. Ye yi bi yomini.’

26“Idu nikabai resi niyo, ‘Ya bi amei tavoi resi moimai rei tavoi reisa amiye no! Ye ya diba niyo na bi varina de reyaka sanari goe goe reida ma yo makuna de reyaka mina iruku butu rida. 27Makai bi, nai fore bi banika vene di vanari moi aeyagadu ma na dairi baeyagaduri, bi dudusa bae moiyagadu, banika yaku fore keika fafau aeyagadu minasa. 28Mina dada ini talent yokoi maka moisi 10 nufa amiye rofu mafa. 29Adina kaere ini beika baika nufa bi besa tau gade moi tanu mago. Idu kaere ina bi de iniye iniye nufa, ka ina rofu keika iniye amedo bi moi dairigo.#Mt 13.12; Mk 4.25; Lk 8.18 30Ye mina amei tavoi rena moimai rei tavoi redo amiye bi etofaro mukunari maku nefo; mironari bi isaka nina ma gade giko nina sana.’#Mt 8.12; 22.13; Lk 13.28

Metona ari di kota rena

31“Ma Amiye di mida ini naivo naivo vima#25.31 Bura bedakai ka kikifa nufa. tausa ini vabara nufa degori, ina bi ini vabara di ourefeidena amena fata fafau ameinu rego.#Mt 16.27; 19.28 32Gagani gagani vene tau bi ini budari moi egogo regedi, ma ina yaku mina amiye moi berou berou aego, mamoe dogo amiye yaku mamoe ma gouti redo kana. 33Ye mamoe ini vana rama rofu aego ma gouti ini vana enana rofu. 34Mina usi Kini yaku ini vana rama vene rofu nigo, ‘Baefa, nai Baba yaku buni tora gade ya vene ya maro; Sei di ourefeidena amena sana di gugura moifa, goina bi oma ma kono rigamori ya dogo reyo. 35Ini adina rauna reyakari, iruku na maro ma iriyaka, koru vaiyakari, koru na maro ma iriyaka; okina amiye kana okiyakari, na moi dui reyo, 36faisara niyakari, varuka na maro; gauka reyakari, na egoru reyo, diburari ameyakari, baesi na veyo.’

37“Kamini mokena rorobo vene yaku nikabai resi nigedi, ‘Varika amiye, goivaka rauna reyo ma ya vesi iruku ya marafa, o koru vaiyo ma koru ya marafa? 38Goivaka okina amiye kana okiyo ma ya vesi moi dui reyafa, o faisara niyo ma varuka ya marafa? 39Ma goivaka gauka reyo ma ya veyafa o dibura ameyo ma ya vegi dui reyafa?’ 40Ye Kini yaku nikabai rego, ‘Rama iniye ya nida, nai usika ourena yokoi roka de amiye rofu reyadi kana, ya bi na rofu reyadi mini!’

41“Mina usi ini vana enana vene rofu nigo, ‘Na rofu etagae rifa, ya kaere Sei bi nikiraini reyo; Bodaka ma ini naivo naivo vima rofu dogo reyo di toga toga vaido ita mokari nefa! 42Ini adina rauna reyakari, iruku be de na maradi, koru vaiyakari, koru be de na maradi; 43okina amiye kana okiyakari, de na moi dui reyadi, faisara niyakari, varuka be de na maradi; gaukari ma diburari ameyakari, de na egoru reyadi.’

44“Kamini ina vene ka nikabai resi nigedi, ‘Varika amiye, goivaka rauna reyo, o koru vaiyo, o okina amiye kana, o faisara niyo, o gauka, o diburari ameyo ma vesi de ya moi aedeyafa?’ 45Ma nikabai rego, ‘Rama iniye ya nida, nai usika ourena yokoi roka de amiye rofu de reyadi kana, ya bi na rofu de reyadi.’ 46Ye mina vene toga toga esika esika moina sanari digedi, idu mokena rorobo vene bi toga toga ameibobina vegu di sanari digedi.”#Dan 12.2

Currently Selected:

Matthew 25: kqc

Highlight

Copy