Matthew 12

Sabati meda di nikaitena

(Mk 2.23–28; Lk 6.1–5)

1Mina ituari Iesu ma ini usi dina venesa Sabati medari witi muro idari nana diyadi. Ina yaku rauna resi witi di ada koma resi irigi kora reyadi.#Deut 23.25 2Idu Pharisee vene mina vegasa ina rofu niyadi, “Neide, yi usi dina vene bi beika Sabati medari una rofu bi tabu mina rededi!”

3Idu ina rofu niyo, “Ya bi bura de veyadi beika David ini amiyesa yaku reyadi mirona medari rauna reyadiri?#1 Sam 21.1–6 4Ye Sei di yava ideri dui resi Sei rofu mana beredi irisi ini vene ka maro. Ago gira yaku nido bi tabu mina beredi irigedi—Sei ma amiye utari naivo vene yaku maka iridedi.#Lev 24.9 5O ya bi bura de veyadi ago gira di bukari ye Sabati medari Sei nivakena yavari Sei ma amiye utari naivo vene yaku mina meda di ago gira bi ukero vau rededi idu vegu no yokoi de nufa?#Num 28.9–10 6Idu ya nida, Sei nivakena yava kana de, ina bi isivaga iniye bi mini. 7Idu mina ago di ini adina ya diba niyagadu vonisi, bi ‘Na bi iriyeduka ura reida, ma ori sisika rena bi de,’ ye ya bi vegu no nufa de amiye nifafana de rei tavoi reyaidu;#Hos 6.6; Mt 9.13 8adina Amiye di mida#12.8 Bura bedakai ka ka nufa. bi Sabati meda di Varika amiye.”

Vana kevo amiye

(Mk 3.1–6; Lk 6.6–11)

9Ye mina sanari feresi ini usa usa yavari dui reyo, 10ma minari vana kevo amiye yokoi amegamo. Ini no dada nisi tourage regika nikaiteyadi, “Gauka moi buni rina Sabati medari bi ago gira rofu bi tabu ba ide?”

11Kamini niyo, “Ya kaere yi mamoe yokoi maka nufa Sabati medari kono rubari keto rei nego vonisi, bi moi yakugiya ba ide?#Lk 14.5 12Ye amiye di isivaga bi tora, idu mamoe di isivaga bi keika. Mina resi Sabati medari vegu buni rena ago gira dada bi buni.” 13Resi mina amiye rofu niyo, “Yi vana ae roto ri.”

Ma ini vana ae roto risi dudusa dairi buni niyo, ini berou vana kana. 14Idu Pharisee vene feresi sina ago Iesu umuyegi nirorotari reyadi.

Sei di auba reyo naivo amiye

15Idu Iesu ini nirorotari rena amutegasa mina sana feresi diyo ma amiye tau gade ina usi boyadi ma ini gauka tau gade moi buni rigamo; 16resi ago gira maro bi amiye ga niyagane ina bi kaere. 17Mina bi moi rama aeyaine beika Sei di ago niyo amiye Isaiah yaku niyo:

18“Mina bi nai naivo amiye, kaere bi auba reyaka;#Is 42.1–4

ina uka maida, kaere bi ina rofu ada reida.

Nai Vima bi ina fafau aegida,

ma ina yaku vegu rorobo tutubena idana vene tau rofu nirausi rego.

19Ina bi kayamo de rego, o raka de nigo,

ma yokoi yaku ini goroka taoni idari de neidego.

20Ina yaku doi yau niyo bi ubaki de rego.

Ma ita iko keika ka de ukafego,

bogo vegu rorobo mina moi rama rigo;

21ma tutubena idana vene yaku ini roka rofu uka mokena aegedi.”

Iesu ma Beelzebul

(Mk 3.20–30; Lk 11.14–23)

22Mina usi vima no nufa amiye yokoi kaere bi babo ma ne taufa afei baeyadi ma Iesu yaku moi buni riyo, ye gagani vesi ago niyo. 23Amiye tau gade tururu resi niyadi, “Aiyo, mina bi David di tutubena Keriso, kaere tua resifa ba ide?”

24Idu Pharisee vene mina neidegasa niyadi, “Mina amiye bi vima no di ourefeidena amiye Beelzebul#12.24 Beelzebul; bura bedakai Beelzebub nufa. di vava dudu maka vima no meki redo.”#Mt 9.34; 10.25

25Idu mina vene di mokena vesi ina rofu niyo, “Gagani uta okusi iniye iniye berou berou are resi ruda rego vonisi, bi berou berou keto rego. Ma taoni o rubu iniye iniye uta okusi iniye iniye berou berou are resi ruda rego vonisi, bi berou berou keto rego. 26Ye Satani ini vima nosa iniye iniye meki regedi vonisi, bi iniye okusi ruda regedi. Ye gokai resi ini ourefeidena amena sana bi are rego? 27Ma na yaku vima no Beelzebul di vava dudu meki reida vonisi, bi yi vene bi kaere di vava dudu meki rededi? Mina dada ini beika rededi yaku yi ago bi rama de vo nidedi! 28Idu Sei di Vima di vava dudu vima no meki reida vonisi, bi Sei di ourefeidena amena sana bi ya vene rofu deyo mini.

29“O gokai dudu amiye yokoi yaku amiye yeiva di yava dui resi ini gugura fore duma rego? Makai siko bi mina amiye yeiva ukita rigo kumo ini gugura fore duma rego.

30“Amiye kaere nasa de, bi na rofu de; ma kaere nasa butu de rido, bi rerevaida nido.#Mk 9.40 31Mina dada ya vene rofu nida, amiye di vegu no tau ma Sei di roka moi no rina ago tau koite makugo, idu Vima kikifa ini roka moi no rigo, bi de koite makugo. 32Ma kaere amiye yaku Amiye di mida rofu ago no nigo, ini vegu no koite makugo, idu kaere yaku Vima kikifa rofu ago no nigo, gua o meda baegediri, ka de koite makugo.#Lk 12.10

Yabo ma ini meko

(Lk 6.43–45)

33“Yabo buni, bi ini meko buni nigedi, o yabo no, bi ini meko no nigedi; yabo ini meko dudu vei mama regedi.#Mt 7.20; Lk 6.44 34Ya aruma di mida mida—gokai ida dudu ya bi uka no vene, ma ya yaku ago buni be nigedi? Adina beika uka ideri vata baedo, bi vena yaku nido mini.#Mt 3.7; 15.18; 23.33; Lk 3.7; 6.45 35Amiye buni yaku ini ukari beika mokedo bi buni dada, vegu buni moi baedo, ma amiye no yaku ini ukari beika mokedo bi no dada, vegu no moi baedo.

36“Ya nida Sei di kota rena medari amiye bi ini ago tavoi tavoi tau niyadi mina nirorotari reyainedi. 37Adina yi ago dudu yi vegu bi rorobo nigo o nifafana rego.”

Rebe rofu niguba rena

(Mk 8.11–13; Lk 11.29–32)

38Mina usi ago gira oteimana vene ma Pharisee vene be yaku Iesu nikabai resi niyadi, “Oteimana amiye, una ura resifa ya bi una rofu rebe yokoi regiya.”#Mt 16.1; Lk 11.16

39Idu nikabai resi niyo, “Vegu no resi mokena vari gira de aesi gua amededi vene yaku rebe nikaitededi; rebe yokoi de mago, idu Sei di ago niyo amiye Jonah rofu vata niyo rebe mina maka maro.#Mt 16.4 40Adina Jonah bi meda regode ma urusa regode oyena tora di uka ideri ameyo kana, ye Amiye di mida ka bi meda regode ma urusa regode kono di uka ideri amego.#Jon 1.17 41Nineveh vene Sei di kota rena medari, gua amededi venesa, are resi ini beika reyadi vegu nifafana regedi, adina bi Jonah yaku Sei di ago nirausi reyori, vegu no feresi moi etagae riyadi. Ma vefa, amiye yokoi Jonah ebu reyo bi mini!#Jon 3.5 42Meda baedo rama eta rofu di kuini bi Sei di kota rena medari gua amededi venesa edadisi beika reyadi vegu mina nifafana rego, adina bi gagani maikeri gutuna kini Solomon di mokena tora neidegi baeyo. Ye vefa, amiye yokoi kaere Solomon ebu reyo bi mini!#1 Kgs 10.1–10; 2 Chr 9.1–12

Vima no di dairina

(Lk 11.24–26)

43“Ye vima no yaku amiye yokoi ferei yakusi bi koru de gaganiri ameinu rena sana maina rego. Yokoi baku rena de resi 44iniye kamini nigo, ‘Nai yava ferei yakuyaka minari dairigida.’ Dairisi mina yava baku rego, bi sena gudare resi ae dogo reyadi ma notoka amedo. 45Resi bi disi vima no 7 inasa iniye ini no ebu reyadi afei minari baesi amegedi. Ye mina amiye di amena gua bi no iniye iniye sena kana de. Mina ye gua ari vegu no rededi vene bi makai.”

Iesu di nono ma ini dubuiyaka

(Mk 3.31–35; Lk 8.19–21)

46Ye amiye tau gade rofu ago niyori, ini nono ma ini dubuiyaka baesi etofaro are resi bi inasa ago nigedi ura reyadi. 47Ye amiye yokoi ina rofu niyo, “Ve kumo, yi nono ma yi dubuiyaka bi etofaro are resi ini ura bi yasa ago nigedi.”#12.47 Bura bedakai nanaka 47 nufa de.

48Kamini nikabai resi niyo, “Kaere bi nai nono ma kaere bi nai dubuiyaka?” 49Resi ini usi dina vene rofu vana imiyou resi niyo, “Ve kumo, mina vene bi nai nono ma nai dubuiyaka! 50Adina kaere nai Baba omari amedo amiye di mokenari rego, bi nai dubuini, nai tobaini ma nai nono.”

Currently Selected:

Matthew 12: kqc

Highlight

Copy