Luke 17
17
Vegu no
(Mt 18.6–9, 21–22; Mk 9.42)
1Iesu yaku ini usi dina vene rofu niyo, “Vegu no fafau uka maina regika nivena vegu bi rama iniye vata nigo, idu mina vegu no fafau uka maina regika nivedo amiye bi ina rofu bi gokai no iniye iniye! 2Amiye yokoi yaku mina mida keika yokoi ourefeidego vonisi, ma vegu no rego, bi kaunava tora moigo. Buni bi witi utei rena di fore tora kuriri ukita resi davarari makugo. 3Mokena dudu ya kaya nari refa!#Mt 18.15
“Yi usika ourena vegu no#17.3 Bura bedakai ka ya rofu nufa. rego vonisi, bi ni kumo ga reyaine; ini vegu no feresi moi etagae rigo vonisi, ini vegu no erufu. 4Ya rofu vegu no meda yokoi makari uru 7 resi baegasa ya uru 7 nibigo, ‘Na bi vegu no feresi moi etagae riyaka,’ vo nibigo vonisi, bi ini vegu no reyo mina erufu.”
Mokena vari gira aena
5Varika amiye di nifeidena vene yaku ina rofu niyadi, “Uni mokena vari gira aena ya rofu moi tora ri.”
6Nikabai resi niyo, “Yi mokena vari gira aena bi mastadi di yoya keika iniye kana vonisi, bi yabo tora rofu nigedi, ‘Ya kaya daru noibanu rae resi moka daidai torari vari!’ Vo nigediri, yi ago neidego.
Moimai rei tavoi redo amiye di moimai
7“Ya yokoi yaku yi moimai rei tavoi redo amiye bi murori moimai rebigo, o mamoe vana rei vau resi yavari okigori, bi ina rofu nigiya, ‘Baesi amesi iruku iri,’ makai de nigiya. 8Ide mada! Ya bi nigiya, ‘Nai iruku feidesi varuka burefe risi nai koru vava naivo regiya bogo nai koru ma iruku iri vau regida mamo; gabi yi koru ma iruku irigiya.’ 9Mina moimai rei tavoi redo amiye yi ago neidego, idu ni buni tora gade de magiya. 10Mina dada, ya vene ka, niyadi kana rei vau regasa bi nigedi, ‘Una ka bi moimai rei tavoi resifa vene maka; ye uni moimai maka reyafa.’ ”
Iesu yaku amiye 10 moi buni riyo
11Iesu Jerusalem seira risi bogamori, bi Samaria ma Galilee taoni di kono utari boyo. 12Rautu yokoi dui reyori, refera vene 10 baku reyo, kaere bi maikeri are resi 13raka niyadi, “Iesu, Varika amiye, una iriyeduka re!”
14Ma vesi niyo, “Bofa kumo Sei ma amiye utari naivo vene ya veyagane.”#Lev 14.1–32
Idama bogamadiri, bi ini roaita moi ruaka riyo.#17.14 moi ruaka riyo: 5.12 baku re. 15Kamini amiye yokoi maka yaku ini roaita moi buni riyo mina vegasa bi dairi baesi goroka tora dudu Sei di roka moi odoro risi 16Iesu di yuka adinari keto resi buni tora gade maro. Mina amiye bi Samaria amiye. 17Kamini Iesu yaku niyo, “Amiye 10 moi ruaka riyaka. Ma mina amiye 9 bi goini? 18Beika resi mina Israel de amiye maka Sei di roka moi odoro rigi dairiyo?” 19Resi ina rofu niyo, “Dadisi bo. Yi mokena vari gira aena yaku ya moi buni riyo.”
Sei di ourefeidena amena sana gokai dego
(Mt 24.23–28, 36–44)
20Pharisee vene be yaku Iesu nikaitesi niyadi, “Sei di ourefeidena amena sana goivaka ogau nigo?” Nikabai resi niyo, “Sei di ourefeidena amena sana gokai dego bi ini rebe de vegedi. 21Yokoi yaku ka de nigo, ‘Vefa, ina bi yomini!’ o, ‘Ina bi yoroni!’; adina bi Sei yaku yi ideri ourefeidesi amedo.”
22Kamini Iesu yaku ini usi dina vene rofu niyo, “Amiye di mida di meda baegedi, ma ya yaku mina meda vegi ura regedi vo nigedi, idu de vegedi. 23Be vene yaku ya rofu nigedi, ‘Mironari ne rei vefa!’ o ‘Minari ne rei vefa!’ Idu bosi maina ga refa, 24Amiye di mida bi sui dudu de dego. Adina ini dena bi ayena yaku kamanika redori oma berou eta rofu vabara ni baedo berou rofu moido kana. 25Mina vata nina koderi, bi esika tau tora siko moigo, ma mina ari vene yaku ina rofu gedu magedi kumo. 26Kamini Noah di medari reyadi kana, Amiye di mida dena medari ka makai regedi.#Gen 6.5–8 27Ina vene bi iruku ma koru irigasa rumana ma rema megasa rei bogamadi boyo, mina medari Noah sisima ideri dui reyo mamo, bi abata yaku desi ina vene ukero vau reyo.#Gen 7.6–24 28Lot di medari ka makai kana, ina vene tau bi iruku ma koru irigasa voi voi regasa muro regasa yava rigasa rei bogamadi.#Gen 18.20—19.25 29Lot yaku Sodom ferei yakuyo medari, Sei yaku fore ita omari gutuna miya kana moi feidesi ina vene ukero vau reyo. 30Amiye di mida ogau nigo medari ka mina kana vegu vata nigo.
31“Mina medari, yava tebo odorori amiye bi ini yavari nesi gugura fore ga moi yakuyaine; ma murori amedo amiye ga dairiyaine.#Mt 24.17–18; Mk 13.15–16 32Lot di rema beika vegu ina rofu vata niyo mina mokefa!#Gen 19.26 33Kaere ini vegu moigika maina rego, bi de moigo, ma kaere ini vegu youfeidego, bi moigo.#Mt 10.39; 16.25; Mk 8.35; Lk 9.24; Jn 12.25 34Ya rofu nida, mina urusari, amiye remanu bi ekama yokoi makari varebigedi. Yokoi bi moi etagae risi yokoi bi ferego. 35Rema remanu vakoi fore dudu witi utei rebigedi; yokoi bi moi etagae risi yokoi bi ferego.”#17.35 Bura bedakai ka nanaka 36 nufa: 36 Amiye remanu vakoi gogo murori moimai rebigediri, yokoi bi moi etagae risi yokoi bi ferego (Mt 24.40 baku re).
37Kamini ini usi dina vene yaku nikaiteyadi, “Varika amiye, mina vegu bi goinari vata nigo?”
Ye nikabai reyo, “Muyena roaita amedo sanari bi gayo bora ka mina sanari egogo regedi.”
Currently Selected:
Luke 17: kqc
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
