John 1

Vegu amena di ago

1Senagi beika baika rina koderi, Ago bi sena amegamo; mina Ago bi Sei sa, ma mina Ago bi Sei. 2Ini adinari gutuna ina bi Sei sa amegamo. 3Beika baika tau bi ina dudu vata niyadi; beika yokoi ini fufuta rofu bi de vata niyadi idu ina rofu maka. 4Mina ago ideri bi vegu; ye mina vegu bi amiye di vabara. 5Mina vabara yaku mukunari gagani kikido, ma mukuna yaku de ukafeyo.

6Sei yaku amiye yokoi nifeideyo, ini roka bi John Baptist.#Mt 3.1; Mk 1.4; Lk 3.1–2 7Ina deyo bi mina vabara di beika veyo kana mina niokugika, ye tau gade mina ago neidesi mokena vari gira aeyaganedi. 8Iniye bi mina vabara de, idu bi mina vabara sina nigika deyo. 9Mina bi rama vabara—mina yaku kono tora noibanuri desi amiye tau vakoi moi vabara redo.

10Sei yaku mina Ago dudu kono riyo, ye mina Ago bi konori, idu amiye yaku bi de vei mama reyadi. 11Iniye di gaganiri deyo, idu iniye di vene yaku faiva de niyadi. 12Idu amiye tau gade kaere faiva nisi ini roka fafau mokena vari gira aeyadi, bi Sei di mida mida nigi di vava maro. 13Sei di mida mida niyadi, una vata nisifa kana de, ma baba ura redo vata nigedi kana de, idu Sei iniye rofu vata niyadi.

14Ma mina Ago bi amiye iniye nisi uni fogori amegamo. Ini vabara bi veyafa; mina vabara bi Baba rofu ini Mida yokoi maka fafau deyo kana, ma ini Baba bi buni tora gade ma rama iniye yaku vata baeyo.

15John Baptist yaku niokugasa raka niyo, “Na yaku nigamaka amiye bi mini, resi niyaka, ‘Kaere na usi baedo, bi na kana de; bi isivaga iniye, na vata nina koderi ina bi amegamo dada.’ ”

16Kamini una tau vakoi Ini vabara tora gutuna uni buni tora gade moi tanu resi moiyafa. 17Sei yaku ini ago gira bi Moses dudu maro; idu buni tora gade ma rama bi Iesu Keriso dudu deyo. 18Yokoi yaku Sei vena de, de iniye, idu ini Baba di eta rofu amedo amiye yaku una fafau Sei#1.18 Sei; bura bedakai Mida nufa. yokoi maka moi ogau riyo.

John Baptist di nirausi rena ago

(Mt 3.1–12; Mk 1.1–8; Lk 3.1–20)

19Ye Jew vene di ourefeidena vene yaku Sei ma amiye utari naivo vene ma Levi rubu di vene be Jerusalem gutuna nifeideyadi, ma John Baptist nikaiteyadi, “Ya bi kaere?”

20Ma John bi nisui de resi niogau regasa niyo: “Na bi Keriso de.”

21Ye nikaiteyadi, “Makai ye ya bi kaere? Ya bi Elijah ba?”#Deut 18.15, 18; Mal 4.5

Ma nikabai reyo, “Ide.”

Ma nikaiteyadi, “Ya bi mina Sei di ago nido amiye#1.21 mina Sei di ago nido amiye: Amiye kaere Keriso di dena moi ogau nigo. ba?”

Kamini nikabai reyo, “Ide.”

22Ye dudusa niyadi, “Makai ye ya bi kaere? Ya yaku beika una nigiya, mina moi dairi bogifa una nifeideyadi vene rofu: Ye ya kaya rofu bi beika nigiya?”

23Kamini niyo:#Is 40.3

“Sei di ago niyo amiye roka Isaiah niyo kana, na bi ‘amiye yokoi di goroka gagani autu sanari raka nida:

Varika amiye di ida moi rorobo rifa!’ ”

24Pharisee di nifeidena vene yaku 25nikaiteyadi, “Ya bi Keriso, o Elijah, o mina Sei di ago nido amiye de vonisi, ye beika resi babatiso reisa?”

26Ma nikabai reyo, “Na yaku koru dudu babatiso reida, idu yi fogori are redo amiye yokoi bi ya ya toto. 27Ina bi na usi baego, idu na bi rorobo de ini yuka ro di maena younegida.”

28Mina vegu tau gade bi Jordan koru di meda dadido eta rofu Bethany#1.28 Bethany; bura bedakai Bethabara nufa. ri vata niyadi; mina sanari John yaku babatiso regamo.

Sei di Mamoe mida

29Ari uveyori John yaku Iesu ina rofu baedo ma vesi niyo, “Sei di Mamoe mida#1.29 Sei di Mamoe mida: Jew vene di vegu dada Sei ini vegu no koite makugi bi mamoe mida ori sisika regamadi. Mamoe mida di dava bi Sei di nemokori ina vene moi ruaka reyo. Iesu ini roka “Sei di mamoe mida” vo niyadi, adina bi uni vegu no koite makugi ini amena vegu maro. mini, kaere yaku kono tora noibanu vene di vegu no erufudo! 30Na yaku nigamaka amiye bi mini, resi niyaka, ‘Amiye yokoi na usi baedo, bi na kana de; bi isivaga iniye, na vata nina koderi ina bi amegamo dada.’ 31Ye na kaya na toto ina, idu na baeyaka bi koru dudu babatiso regamaka bi Israel vene rofu ina niokugika.”

32Ma John bi ini beika veyo mina niokuyo: “Vima bi pune erena kana oma gutuna desi ina fafau rou riyo mina veyaka. 33Na kaya na toto ina, idu Sei, kaere yaku koru dudu babatiso regi na nifeideyo, bi na rofu niyo, ‘Vima vegiya ma amiye yokoi desi fafau amego; mina bi kaere Vima kikifa dudu babatiso rego.’ 34Ma na bi vesi niokuyaka ina bi Sei di mida.”

Iesu di ouresi usi dina vene

35Ari uveyori John bi mironari ini usi dina amiye remanusa dudusa are regamadiri, 36Iesu nana rei bae boyo ma vesi niyo, “Sei di Mamoe mida mini!”

37Kamini ini usi dina vene remanu mina neidesi Iesu usi boyadi. 38Iesu kero resi ina usi baeyadi mina vesi nikaiteyo, “Ya bi beika maina rededi?”

Ma nikabai reyadi, “Rabbi (ini adina bi ‘Oteimana amiye’), ya bi goinari ameisa?”

39Nikabai reyo, “Baesi ma ya kaya vegedi.” Ye inasa bosi ini amedo sana vesi mina medari ameyadi, meda nemoko bi 4:00 kana uriyenauri dada.

40Ina vene kaere John ago niyo mina neidesi Iesu usi boyadi yokoi bi Andrew, Simon Peter di dubuini. 41Kamini ini dubuini Simon siko baku resi niyo, “Una bi Keriso (ini adina bi ‘Auba reyo amiye’) baku reyafa.” 42Resi Iesu rofu afei boyo.

Ma vesi niyo, “Ye ya bi Simon, John#1.42 John; bura bedakai Jonah nufa. di mida, idu bi yi roka Cephas (ini adina bi Peter o ‘fore’) nigedi.”

Iesu yaku Philip ma Nathanael raka niyo

43Ari uveyori Iesu Galilee bogika mokeyo. Philip baku resi niyo, “Na usi bae!” 44(Philip bi Bethsaida taoni amiye, Peter ma Andrew yaku amededi taoni.) 45Philip yaku Nathanael baku resi niyo, “Una bi Moses yaku ago girari ma Sei di ago niyadi vene ka bura reyadi dada di amiye baku reyafa. Ina bi Iesu Nazareth amiye, Joseph di mida.”

46Ye Nathanael yaku niyo, “Beika buni Nazareth gutuna baego?”

Ma nikabai reyo, “Baesi ve.”

47Nathanael baeyori, Iesu yaku vesi niyo, “Mina bi rama iniye Israel amiye; ini ideri bi ofa sina yokoi de!”

48Ma nikaiteyo, “Gokai ida dudu na vei mama reyo?”

Ma nikabai reyo, “Philip ya raka nina koderi, ya bi fuka yabo gabireri na bi sena ya veyaka.”

49Ma nikabai reyo, “Oteimana amiye, ya bi Sei di mida; ya bi Israel di Kini!”

50Ma niyo, “Ya bi fuka yabo gabireri ya vesi nida, dada mokena vari gira aesa ba? Beika baika tora besa vegiya!” 51Resi niyo, “Rama iniye ya nida:#1.51 Bura bedakai ka gabi nufa. oma bi ekego ma Sei di naivo naivo vima bi Amiye di mida fafau dega bogasa rebigedi kana vegedi.”#Gen 28.12

Currently Selected:

John 1: kqc

Highlight

Copy