MAK 9

1Ungta Mma ngi mhin inni theda, “Kinditti, Neiji ahin thaanni kthea, hava thu krip daat mii angṭhe va Isowr Kruwngpaam mi rutan tu kilṭhi ngi kurjung ra ava mdee du khim khai kdiyou pha nime.”

Jisu Rungchen karthleng

2Ungta nii truk diltha Jisu ngi Pitor leh Jeems ungu Johon ṭhi da mthi naanni lown kparthaang leen hang lamda. Ungta mmaiṭhuwm inni mrungchen karthleng da, 3mdona naak ava kepleu dang ngi powl da,ava hep lulu ngi dultipaam thu ku mii khat lee ngi arsu pchaang nime. 4Ava thu Elija ngi Mousi tu Mhin ni ktardet da Jisu tu pausaam lamda. 5Ungbi Pitor ri Jisu hin theda, “Chukpu, hava thu ta am daat inna kṭha a; nenni buw inn kdum sa inche, Nah ado ra khat,Mousi do ra khat, ungta Elijah do ra khat.” 6Mleija kdung reenni mṭit leiji mdo the ra dei pindi chme. 7Ungta armeiji jiil dok lamda, armei thung ki krowl khatti theda, “Hava Nei kwonsat lo Kchapa; Mhin aryaa in!” 8Ungbi mmaanni kinle teng lamda khuw msut ploi in thungta, Jisu kma donle ku mii khat lee dei lamme.

9Ungta mmaanni lown leen ki murjun ṭum slii arlaan ni Jisu ngi mhin inni pau pṭum da, “Mii Chapa ngi kdiyou thungki mrin karheel du khim khai, hava ado dee inna ku mii khat lee hin song maan.” 10Ava leiji mlei ava mmaanni bin pthii daat lamda, kdiyou thungki kardel mdo ditta tak mdo the nda kdingi karkhewl lamda. 11Ungta mmaanni Mhin paukhewl chlam da, “Talu leiji Nowlam chukpu rek va Elijah ava trin kma kurjung rang pi mdo dit inda?” 12Ungbi Mma ngi mhin inni theda, “Elijah ava do mkheng kparmang ra ru kri ver ri kurjung dok; ungu tak heppi Mii Chapa ava mdo kjit rek thungva do knempok thung ngi suwk thuwk don, bun rai donle, mraal kpii lam ra dida mdo kjit da? 13Pdainu akthe pik inna,ru kri ver ri Elijah ava kurjung dok, ungu mmaanni mdo tlot nuwm inna mhin mtlot dok in, kikjitti mma mlei thung ngi mdo kjit dok ava heppi kthuwk dok.”

Jisu ngi Pthla Ktobor Luna Pselnao Khat mdo Pdam

14Ungu mmaanni siikhu rek mjun phaak in thungta, mii knempok kurtuwl ava ngi klop dok lamda, Nowlam chukpu rek tu karteen slii dei lamda. 15Ungu kurtuwl mii mkheng ngi Mma mdee khot in thungta, kdung ngi ngak chlam da, ungbi mmaanni Mhin va chen lamda, arvui chlam da. 16Ungta Mma ngi mhin inni paukhewl lamda, “Ado karteen psuk inna talu da?” 17Ungbi kurtuwl mii rek thungki khatti Mhin arthawng da, “Chukpu, kchapa ava mthung ngi mpau kthuwk kma pthla lut da, Nah hin karhai ṭhi chaak na; 18ungta mma ava mdo ṭhi na ktai thu ptluw da, mhaa kril da, muhuwn thlut da, mner ṭen pursowm kchok da; ungbi Nah asiikhu rekki mdo trei pthii pik nlam ra kthe chaak na pchaang chlam mda.” 19Ungbi Mma ngi mhin inni theda, “O krin dei kma charuwl rek, tak hep pang ksotti Neiva aṭhi ni kaan da? Nei kihin arvan ṭhiin!” 20Ungbi mmaanni pselnao ava Mhin ṭhi paphaak lamda. Pthla ngi Jisu mdee thungta, tun kat daatti pselnao ava dul deen nda var pthii da, ungbi mner tha muhuwn thlut da. 21Ungta Jisu ngi nao ava pah hin khewl da, “Hava tja roi ksotta?” Ungbi mma ngi the da, “Mmot daat ki kupṭhun.” 22Mma ava maknem thung ngi dii leh mei thu ke ea krep rang ngi duwl kchok da; pdainu Nang ngi atlot pchaan rangta, wonsat mhai lo chaan ra mhai bom chaan.” 23Ungbi Jisu ngi mhin theda, “Nang ngi arot bi krin cha mii hin va do mkheng nga kurthuwk lu.” 24Tun kat daatti nao pah ava owng da ṭap da, “Neiva krin chaakka; kdo rin chaak de ma thung ngi mhai bom cha,” dida theda. 25Ungu Jisu ngi kurtuwl mii rek arva kchen kurkuk mdee thungta, hanto theda, “Kyeng ktokhoi pthla nang, Neiji pau kreenna, mma thungki arvang thuwk dok, mma thung ngi alu nowl ro nime,” dida pthla ktobor rai da. 26Ungta keu da nao ava kdung mtono dok dil tha, arvan thuwk da, ungbi nao ava kdiyou lulu ngi am chda, ava leiji mii knem pokki theda, “Nao ava kdiyou kcha a.” 27Pdainu Jisu ngi mkhut tha kjowng da tip prip da, ungbi han rip da. 28Ungu Jisu ngi inn thu mvan lu thungta, msiikhu rekki tup prutti Mhin paukhewl chlam da, “Talu leiji neen va rei pthii pchaang maan ring da?” 29Ungbi Mma ngi mhin inni theda, “Hava lua kṭhil cha kma donle do khat lee ngi rei pthii pchaang me.”

Jisu ngi Mdiyo nra Mlei thu mdo The

30Ungta mmaanni mmun ava thungki Galil vang klaan lamda, ungu Mma ngi ku mii khat lee hin ktardet nuwmme. 31Mleija Mma ngi siikhu rek hin hanto purchuk da theda, “Mii Chapa ava mii rek khut thung ngi kparlaan pthii ra, mmaanni ki ae you ra, ungta mdiyo dok le nii kdum dil tha kring kardel nowl ra.” 32Pdainu mmaanva talu mdo the nda tdit dei pindi chlamme; ungu Mhin mdo khewl raan ruk ṭi lamda.

Ku ngi Klin sii

33Ungta mmaanni Kaparnahum vang thlung lamda, inn thu ma am daat arlaan inni Mma ngi khewl lamda, “Naanni lam tha ado karteen psuk inna talu da?”

34Pdainu mmaanni rim kdi am lamda, mleija ku ngi klin sii kdingi mmaanni lam tha karteen psuk lam da. 35Ungta Mma ngi ku ong thida,sowm lei knii ownda; mhin inni theda, “Ku mii khatti ru mrit nuwm bi, mma ava mkheng thungki dil knau sii ungu mkheng ki sra owr kurthuwk ra.” 36Ungta Mma ngi nao khat lou da, marlak inni thii da; kdom da mbaanni arpom thida, mhin inni theda, 37“Nei kmiing ngi ku mii khatti hanto lu nao marlaan chaak bi, Nei mdo tarlaan chaak; ungu Nei mkarlaang cha miia Nei mdo tarlaan ava pme, pdainu Nei mju ksii Isowr mdo arlaan chaak.”

Nen Mikahal kma ava Nen Ntum

38Johon ni Mhin theda, “Chukpu, Nah amiing ngi tarnam rek krei pthii miilai khat neenni dei innu, ungbi nen ndil kṭoi kma pa kdi ngi, pdown pthiinnu.” 39Pdainu Jisu ngi theda, “Mma ava pdown maan, mleija Nei kmiing ngi nong klin klin ktlo rek mmaanni, dil tha kbei sekki Nei kleen kṭha kma kpau lamra. 40Mleija nen mi kahal kma mii ava nen ntum. 41Kinditti Neiji ahin thaanni kthea, naanni Khrista miing ado hur lei inni, ku mii khatti ado neek raan dii tong khat pang akpii kchaan ma am bi, mma ava mnah kpinlet pik ra.”

Kepthleemmi Pnu Ktla

42“Ku mii khatti Nei mikrin chrek hava kmo sisi rek lam arkam da pnu thu maptlaak bi, chakri lung klin lang lang mlowl psuk da truwn thung ngi tvar pthii ava ngi kursuk sii ra. 43Ungu akhut khat inni pnu akaptla raan mkurthut ta, areen buk pthiin, mleija kdiyou liit kma sim thu knii ngi alu raan kchang nga khdaatti rinkhu ado phaak inni kursuk ra. 44Mmaan kchaa pden ava tden thung pre diyou me, ungta mei kṭuwng ava ruk diyou me. 45Ungta akhu inni pnu akaptla raan mkurthut ta, areen buk pthiin, mleija khu knii ngi sim thu atlaak raan kchang nga, kseek ki rinkhu ado phaak in ava ngi kur suk ra. 46Mmaan kchaa pden ava tden thung pre diyou me, ungta mei kṭuwng ava ruk diyou me. 47Ungu amik inni pnu akaptla raan mkurthutta, akhor pthiin, mleija mik knii kthloiji sim thu atlaak raan kchang nga, mik khdaat thloi da Isowr Kruwngpaam kthlung ngi kur suk sii ra. 48Mmun ava thungva pden diyou me, ungu mei ruk diyou me. 49Mleija mii khim khaija mei thung ngi pti ka al heppi ka al chra. 50Ptia kṭha; pdainu ma al ava mmaan chaakku tak heppi ka al nowl rang? Adak in thung ngi pti apa al in, ungu kdaaiji khat leh khat ji am in.”

Currently Selected:

MAK 9: LAMKBSI

Highlight

Copy