MAK 7

Alraangki Mii do Purchu

1Tunva Pharisi rek leh Jerusalem ki kthleng Nowlam chukpu rek angṭhe ngi Mhin mthuw kurtuwl in thungta, 2siikhu rek angṭhe ngi mkhut in kbuwr ri, mleija khut kulṭhu kma then mmaal in dei lamda. 3Mleija Pharisi rek leh Jehudia rek va cho du ki kver rek nopa pṭoi lam da, mkhut in kulṭhu kma then cha kchok lamme; 4ungu mmaanni bajaar ki mthlun in mpha thu, mdak saa in mkirtleu du khim khai then cha kchok lamme; ungu nopa knem pok mmaanni mdo pṭoi in ruk ka am,tong rek, uwm rek, ungu thleengkam mdo kno kcho lu in. 5Ungbi Pharisi rek leh Nowlam chukpu rekki Mhin khewl lamda, “Talu leiji asiikhu rek va kver rek nopa kupṭoi kma, khut kbuwr ri then mdo chaak in da?” 6Ungbi Jisu ngi mhin inni theda, “Kṭha a, hava Isaijah ngi ṭha tlot ktlo naan mlei thung ngi mdo kjit ava lulu:

‘Hava mii rekki mner duwn daat inni makjat lamda, pdainu muplung ril inna Nei kihin ki kdung lam karlat kcha a.’ 7Mmaanni luw mdo tbuk lam ava do sii me, mleija Isowr Nowlam kurthuwk daat joso dulti mii do tlot kupṭoiji purchuk lamda. 8Naan ni Isowr paureen ma pthiin tinu mii nopa tlot ava arpom mer in tinu.”

9Ungta Jisu ngi mhin inni theda, “Isowr paureen kipthleiji, naanni mo ol nra nopa ava arpom inti nu. 10Mleija Mousi ngi theda, ‘Apah leh anuh akjat cha;’ ungu mpah leh mnuh hin kṭha kma kpau mii ava kdiyou ra.’ 11Pdainu naanva, ‘Ku mii khatti mpah mdit mata mnuh hin, nei kihin ki ado phaak chaak ra ava korban’ (mlei ava Isowr hin kpiik dok) kdi ngi theen tinu. 12Ava mkurthut bi naan va mma ngi mpah leh mnuh nong mdo tlot ra prot maan ti. 13Naanni ado kjown daat in nopa ava ngi Isowr pauna leek inti, tutlot mara do knem pok tlo in tinu.”

Do Khatti Mii mdo Tpabuwr

14Ungu Jisu ngi mii rek Mhin ni own lam thida theda, “Mhai aryaa in, akheng inni,ungu adei pindi chaan. 15Miilai thung ngi duwn ki jung klut do ava ngi mii ava kchou me; pdainu mii ava thungki arhan kthuwkki miilai ava mdo kchou kre.” 16Mdo aryaak nra knaa kthloi ku mii khatti aryaa chaso. 17Ungta Mma ngi mii rek ma thida inn thu mvan lu thungta, msiikhu rekki paupurtol mlei thu Mhin khewl chlam da. 18Ungbi Mma ngi mhin inni theda, “Ava mkurthuttu naan rukka kdei pindi kma pa in pti mo? Miilai thung ngi duwn ki jung klut ava ngi mii kchou me tdit naanni dei maan ti mo? 19Jung klut ava plung ki rang pme poi thungki rang kurthuwk ungu karthleng kcha lu pme mo?” (Then mkheng nga kartleu dok dida Mma ngi theda.) 20Ungta Jisu ngi theda, “Mii khat thungki arhan kthuwk ava ngi mii mdo kchou kre. 21Mleija miilai plung thung ki arhan kthuwk ava kṭha kma jesang, nala tartlaang kturkui, kupru, mii ke eayou, losang kṭhi, 22hangmal, ṭhat ma nong ktlo, plei knei, ko ok kma, khei kthe, ku huwng cha, kpohok, mong kokto, 23ṭha kma hava mkheng nga plung ril thungki arhan kthuwk jesang, ava ngi mii mdo kchou kre.”

Snu Khat do Rin chaak

24Ungta Mma ngi mun ava thungki kurlou da, Tyr leh Sidon paamkowl tha vang da. Ungta Mma ngi inn khat thu lut da, ku mii khat lee ktardet nuwm me; anto daat joso kurdowl pchaang me. 25Pdainu mchanu kmo suwn pthla ktobor ri ram mdo tparvee snu miilai khat ava ngi aryaa da Mhin thleng teng da, mkhu ther ri luwbuk chda. 26Tunva snu ava Syrophosia thung ngi kṭou Grik mii, mma ngi mchanu thungki tarnam mdo rei pthii pik nra Mhin ktham chda. 27Ungbi Jisu ngi mhin theda, “Ru kri reeppi kmo rek maal dok lam so, mleija kmo rek thenpen lou da ui rek kip pthii pik ava ro me.” 28Pdainu mma ngi arthawng da, “Oji, Mukpu, anto daat joso ui rek ruk va tebol tu n ki kmo rek bu ptlaak mdo chom chaak ma!” 29Ungbi Jisu ngi snu ava hin theda, “Hava ado the pa daat so, a inn tha vang kinle, achanu thungki tarnam ma ksun kcha a.” 30Ungu mma ngi mi inn tha mvan thungta, mchanua ki iip daatti van pha da, mthungki tarnam ruk sun chda.

Jisu ngi Knaa kbeeng Paukaklak mdo Pdam

31Ava dilli Jisua Tyr paamkowl ki mdil kinle da, Sidon ki ngi Galil truwn chet thlengda Dikapoli paamkowl tha vang da. 32Ungta mmaanni knaa kbeeng mpau kaklak miilai khat Mhin ṭhi paphaak lamda, mleen mkhut mdo khiin pik chaak nra Mhin ktham chlam da. 33Ungbi mii rek arlakki ṭhi ptliing thida, mkhut chelli maknaa thun da, maplei pthot da kmei pik da; 34parwaan hansuw da,tdaal ṭen thida, “Epha phatta,” mlei ava “Kparvang,” dida theda. 35Ungbi maknaa ava kparvang da,miplei kurkol da, mma ngi ktarnaal deekki pau da. 36Ungta ku mii khat lee hin mdo the thut ma nra Jisu ngi mhin pau pṭum da; mhin inni kheel set setti pau mupṭum le kheel sii ngi paryaam lamda. 37Ungu kheel sii ngi mnga chaak in thungta mmaanni the lamda, “Do mkheng kṭha deekki mtlot ta; knaa kbeeng ngi maryaakka, mpau kthuwk kma mpapau pchaanna.!”

Currently Selected:

MAK 7: LAMKBSI

Highlight

Copy