MAK 16

Kring Karheel

1Ungu sabath nit mvee dok thungta, Magdaleni Mery leh Jeems nuh Mery ungu Salomi, mmaanni mdo pbul chaak raan reidii mikrim kdi lang lang ren lamda. 2Ungta mmaanni hapta ki mnii khat na thok, jiingsun kpanma ngi, kniw mthuw ser ser leh thlaan tha va lamda. 3Ungu mmaanni khat leh khatti hanto the lamda, “Thlaan thurngot lung nga ku ngi mi kpurlu pik chraan da?” 4Ungta mmaanni thlaan mhan sut in thungta, mleija lung ava kpurlup dok da. 5Ungu mmaanni thlaan thung ngi mvan luwn thungta, dona kpowl dang ngi kirsim tartlaang nao mchang ktong tha kukong daat dei lamda; ungbi ngak chlam da. 6Ungta Mma ngi mhin thaanni theda, “Ngak maan, khros leen mdo pthoi yown Nasareth ki Jisu kthlaam in pti. Mma kardel dok, hava thung ngi Mma ame; mmaan do pi ii na mun ava asuwn. 7Pdainu vang inra, msiikhu rek leh Pitor hin Mma ava mdu inni Galil tha kvang nga adi inra athe pik chaan; Mma ngi mdo the dok heppi, ava tha naanni tdee pha chnaan di.” 8Ungbi mmaanni thlaan thungki kurlou lamda vang lamda; mleija mmaanna kunchun lamda ngak chlam da; ungta mṭit lei inni ku mii khat lee hin pau khat lee song lamme.

Jisu ngi Magdaleni Mery hin maktardet

9Tunva hapta ki mnii khat na thok jiingsun kpanma ngi mrin kardel mpha thu, tarnam tikheu mdo rei pthii pik, Magdaleni Mery hin ru kri ver ri ktardet da. 10Ungbi kurnung karbaang da kṭap mma miiṭhi rek hin vang da song chda. 11Pdainu snu mdak katti kring karheel dok, ungu kdee chaak pi dida mthe kpha thu rin chlamme.

Siikhu rek Knii hin Jisu ngi Maktardet

12Hava dil tha Mma ngi mrungchen kartleiji knii rek hin ktardet da, mleija mmaanna mkhuwpaam thuwnni chet meek lamda. 13Ungbi mmaanni mdil in kinle lamda mmiiṭhi rek hin song lamda, pdainu mmaanni rin chlamme.

Jisu ngi Sowm lei Khat rek hin Maktardet

14Ava dil tha sowm lei khat rekki tebol be ngi mu kon daat arlaan inni Mma ngi mhin inni ktardet da; muplung ril in kapchai ungu mdo rin de maan leiji Mma ngi rai chlam da, mleija mrin kardel dok dil tha, mmaanni kdei rek pauson ava rin chlamme. 15Ungta Mma ngi mhin inni theda, “Dultipaam mkheng thu echet inra, dulti mii rek mkheng hin kṭha paumin aparyaam in. 16Ku mii khatti rin chda baptis mtlot bi, ava kaktlan pik ra, pdainu krin kma mii ava mraal kpii ra. 17Ungu krin cha mii rek hin va Nei kbii tinna ngi kthlop lamra: Nei kmiing ngi tarnam rek krei pthii lamra; plei ren ni kpau lamra; 18mmaanni pruwl rek chom da, ungu diyo na doi knee kurthuwk lam joso, sul kurnul lam nime; mmaanni kukoi rek leen mkhut kikhiing lamra, ungta mii rek kapdam lamra.”

Jisu ngi Parwaan tha Mhunkal

19Ava dilli Mukpu Jisua, mmaan hin pau msaam dok dil thang ngi, parwaan tha hungkal chda, ungu Isowr chang ktong tha ku ong da. 20Ungta mmaanni mmun ktai thu chet lamda paryaam lamda, mmaan thung ngi Mukpu ngi nong mtlot khim khai thu, paumin ava titinna rekki tipnet pik lamda. Amen.

Currently Selected:

MAK 16: LAMKBSI

Highlight

Copy