MAK 10

Bowr ktlo Mlei thu Jisu do Purchu

1Ungta Jisu ngi mmun ava ma thida Jordon kheel da Judia paamkowl tha vang da, ungbi Mhin mii knempok mthuw kurtuwl nowl thungta, veikhat nowlli Mma nopa kpurchuk pṭhun da.

2Ungta Mma hinni kthleng Pharisi rekki mdo pirsin naanni paukhewl lamda, “Nowlam va innpu ngi mnumei bowr ktlo pthii mrot mo?” 3Jisu ngi arthawng da, “Mousi va talu pau atreen pik inda?” 4Mmaanni theda, “Mousi va mii ava ngi bowr mdo tlot na ki mlei kjit thii donle, mdo kinṭhen ṭhi kro ra dida.” 5Pdainu Jisu ngi mhin inni theda, “Mleija naan plung ril mapchai reen leiji mma ngi hava pauva reen da mdo kjit. 6Pdainu kapṭhang mupṭhun daat le, ‘Isowr va psel leh snu seem da.’ 7Hava ngi mlei kurthuwk da pselli mpah leh mnuh ma thi donle mnumei tu ma am vee ra, 8ungu knii ava khdaat kurthuwk ra, ‘Mleija mmaan ve ava knii ngi am bong lamme, daksaa khdaatti ka am.’ 9Ava ngi mlei kurthuwk da, Isowr do punlom dok mii ava ku mii khat lee ngi kṭhen ro nime.”

10Ungta inn thung tha siikhu rekki hava mlei thung ngi Mhin pau khewl lamda. 11Ungbi Mma ngi mhin inni theda, “Ku mii khatti mnumei bowr tlo pthii thisora snu khat mlo bi, mma ngi mnumei leen losang mṭhia. 12Anto hep daatti numeiji mi innpu bowr tlo pthii thisora psel khathin inn mnee bi mma rukku mi innpu leen losang mṭhia.”

Jisu ngi Kmo sisi rek Phowl Kṭha mdo Parlaan

13Ungta Jisu ngi mdo kmei pik nlamra mii rekki kmo rek ava Mhin ṭhi paphaak lamda, ungbi siikhu rekki rai lamda. 14Pdainu Jisu ngi ava mdee thungta plung kpur ri, mhin inni theda, “Kmo rek va mhai phaa chdaat lamso, khaan maan, mleija Isowr Kruwngpaam ava hanto lu hep daat thung ngi ka am. 15Kinditti Neiji ahin thaanni kthea, ku mii khatti Isowr Kruwngpaam ava hava nao khat heppi marlaan chaak ma bi, lut chip pchaang nime.” 16Ungta Mma ngi kmo rekka mbaanni kdom da, mleen thaanni mkhut khiing da, phowl kṭha parlaan chlam da.

Suwangpa Khat

17Ungta Jisu ngi ksun ra mkurlo slii arlaanni, pselpa miilai khatti va chen da, mdu sukki pkhuppi tirdiil da Mhin theda, “Kṭha Chukpu, neiji talu tlo da kṭuw knai kma ki rinkhu ava pha chnik di?” 18Ungbi Jisu ngi mhin theda, “Talu leiji kṭha diti ado tu own da? Isowr kma donle kṭha ku khat lee amme. 19Nang ngi paureen rekka ado dee; ‘Mii eayou ma, losang ṭhi ma, pru ma, kindit kma sakhi ri pik ma, huwng chma, anuh leh apah akjat cha.’” 20Ungbi mma ngi Mhin theda, “Chukpu, keksee daat ki hava mkheng nga kdo pṭoi chaak.” 21Ungta Jisu ngi wonksa lang lang ngi suw rim thida theda, “Do khat ado tlot ra kvaat daatta; vang, ado thloi ajur thira sra rek hin apii cha, ava ngi parwaan ki asumbuwr kurthuwk ra; ungu arva,Kdil aṭoi cha.” 22Ava mdo the leiji kurnung da, alrou knempok mdo thloi leiji plung kja lang lang ngi vang sun da.

23Ungta Jisu ngi mdil kinle da siikhu rek suw thida mhin inni theda, “Suwang rekki Isowr Kruwngpaam mthlun nraanna tija thung ngi kparsa chdaatta.” 24Ungbi mpauna rekki siikhu rekka ngak chlam da. Pdainu Jisu ngi mhin inni the nowl da, “Kmo rek, Isowr Kruwngpaam tuthlun nrang nga tija thung ngi kparsa chdaatta! 25Suwang khatti Isowr Kruwngpaam mthlun rang hin va, ut khatti prou khur thu mlu ngi ko ol sii ra.” 26Ungta siikhu rekka kdung reenni ngak chlam da, Mhin the lam da, “Ava mkurthuttu mdo ktlan na ku rang da?” 27Jisu ngi suw rim lamthida theda, “Ava lua dulti mii hinva kurthuwk nime, pdainu Isowr hin pme, do mkheng nga Isowr hinva kurthuwk lu.” 28Pitor ri Mhin kthe pṭhunda, “Asuw neenni do mkheng ma pthiin thinu, Nah dil kdo ṭoi chaak in.” 29Jisu ngi theda, “Kinditti, Neiji ahin thaanni kthea, ku mii khat lee ngi Nei ktum,ungu kṭha pauna tummi, mi innlou, mcher mṭah, mnuh mpah, mnaole, mdit mata mpaam kma pthii mapchaanma bi, 30karvang ra kum thu mma ngi suwkthuw mphaak thu mi inn rek, mcher mṭah, ungu mnuh mpah, ungta mnaole, mpaam tu kilṭhi ngi arjaa khat ktopommi suwkthuw kphaak ṭhi lamra; ungu karvang ra kum thung ngi kṭuw knai kma ki rinkhu karlaang ra. 31Pdainu ru kri ki mii knempok ava dil knau ra,ungu dil knau ava ngi ru kri ra.”

Jisu ngi Mdiyo nrang ki Mlei thu Mvei Kdum na mdo Thethut

32Ungta Jerusalem hun kpha ra, lam tha mche slii arlaan inni, Jisua mdu bet inni ru rida hang da, ungbi siikhu rekka ngak chlam da, ungta mdil in kṭoi rekka ṭi chlam da. Jisu ngi sowm lei knii rek ṭhi nowl da, Mma leenni kthuwk ra mlei thung ngi mhin inni kthe pṭhun da. 33Mma ngi theda, “Asuw in, nenna Jerusalem tha kahang slii in min, ungta Mii Chapa ava thiimpu kinreel rek leh Nowlam chukpu rek hin kparlaan pthii ra; mmaanni mdiyo nra mraal kpii lamra, ungu ktlok chati rek hin kparlaan pthii lamra. 34Ungta mmaanni pnii chaak donle ke eayou ra, pdainu nii kdum diltha kring kardel ra.”

35Ungta Jebidi chapa rek Jeems leh Johon ni Mma pha lamda, Mhin the lamda, “Chukpu, ahin kdo ṭhil chaak in khim khai mtlot pik naan di kdingi kngei inna.” 36Ungbi Mma ngi mhin inni theda, “Neiji ado ktlot pik raan talu angei inna?” 37Ungta mmaanni Mhin the lamda, “Nah alaarnee ngi khatti achang tha ungu khatti alee tha, kuk ong mhai rot pik chaan.” 38Pdainu Jisu ngi mhin inni theda, “Naanni talu kṭhil inna tdit dei pindi chmaan ti. Neiji kdo neek na tong ava nee pchaang da, mdit mata Neiji baptis kdo tlot na thu baptis tlo pchaang naan mo?” 39Ungta mmaanni Mhin the lamda, “Neenva pchaang ni kaan di.” Ungbi Jisu ngi mhin inni theda, “Nei kdo neek na tong thu nee pchaang naan di,Neiji baptis kdo tlot na thu tlo pchaang naan di. 40Pdainu kchang leh klee tha ku kong rang nga Nei kdo rot ra ava pme, pdainu mma mma tummi mdo purchuwl pik ava kurthuwk ra.” 41Ungta miilai sowm rekki ava maryaak in thungta, Jeems leh Johon leen kdung ngi plung pthit lamda. 42Ungu Jisu ngi Mhin own lam thida theda, “Ktlok chati rekka naanni ado dee in, ungu kpaal na kver rekki mmaan leen rutan mkheng mdo thloi in, ungu nong klin kpuw rekki rutan mdo pinret. 43Pdainu naan arlak va anto lua kurthuwk me; naan arlakki klin ra kngei mii ava mkheng ki sra owr kurthuwk ra. 44Ungta naan arlakki ru kri nuwm mii ava mkheng ki suwk kurthuwk ra. 45Mleija Mii Chapa rukka mii sok lo psuk ra kurjung pme, pdainu sok klou ra, ungu Mma rinkhu ngi mii knempok mdo ktlan nra kpii chra kurjung.”

Jisu ngi Bartholomio Mik Ktot mdo Pdam

46Ungta mmaanni Jerikho arvang lamda; Mma ngi msiikhu rek leh kurtuwl mii mluwngpa tu kilṭhi ngi Jerikho thungki mkunsun in thungta, Timaju chapa Bartholomio tdit mmik ktot ava then kṭhil chra lam siirri ku ongda. 47Nasareth ki Jisu tdit mma ngi maryaak thungta, “Devid, Chapa Jisu, Aplungnee mhai tdet cha!” dida ṭap da kthe pṭhun da. 48Ungbi mii maknem mi rim kdi jiam dida rai chda; pdainu kheel set setti owng da ṭap da, “Devid Chapa, Aplungnee mhai tdet cha!” 49Ungbi Jisu ngi rip da theda, “Va own in,ungu mmaanni mik ktot ava own lamda; plung apnet ra; erip, Jisu ngi ato ownna,” kdingi the pik lamda. 50Ungta mma ngi mbuw hiil var pthii thida Jisu hin arva chen da. 51Ungta Jisu ngi mhin khewl da, “Nah atummi tak ado ktlot pik ra angeija?” Ungbi mik ktot ava ngi theda, “Chukpu, khuw tdeera kngei chaakka.” 52Ungbi Jisu ngi mhin theda, “Alam tha vang; ado rin chaakki kdam im pti.” ungta tun kat daatti mma ngi khuw deida, lam thung ngi Jisu dil ṭoi chda.

Currently Selected:

MAK 10: LAMKBSI

Highlight

Copy