MATHI 21

Kapchaang riimmi Jerusalem Mhanlu

1Ungta mmaanni Jerusalem nai lamda ungu kruwn lown tha Bethphas marvan in thungta, Jisu ngi msiikhu rek knii haisii lamda, 2mhin inni theda, “Adu suk inki khuw ava thung ngi va in, ungta skowlraam khat msuwn tu pha khot naan di, aparthlet inra Nei kihinni arvan ṭhiin. 3Ku mii khatti ati khewl luwng inta, ‘Mukpu ngi kriingda, ungu Mma ngi kbei sekki arhai ksii pinle ra,’ adi inra athe pik in.” 4Kthuwk nong ava khulpu ngi mdo the dok ava mkurkhum nra kurthuwk.

5“Sijon chanu hin athe pik, Asuw,

nang ki Kruwng ava nah hinni kurjung nga;

Mma ava plung kparneemmi skowlraam khatsuwn leenni klhleng nga.”

6Jisu ngi mdo parseel pik lam ava heppi siikhu rekki va lamda tlo lamda; 7mmaanni skowlraam leh msuwn ava arvan ṭhi lamda, ungta mleen dona phat lamda, ava leenni Mma ava ko ong da. 8Lam thung ngi mii maknem va buw phat lamda, ungta angṭhe rek va ding baak pra lamda lam thung ngi phat chlam da. 9Ungta mdu mdil kṭoi kurtuwl mii rekki owng lamda, “Hosana, Devid Chapa! Mukpu miing ngi kurjung Mma ava msuwkṭha! Kparthaang sii ngi Hosana!” 10Ungu Mma ngi Jerusalem mlu thungta, khuwpii mkheng ngi kdung vawng klummi owng lamda, “Hava ku da?” 11Ungta kurtuwl mii rekki the lamda, “Hava Galil ki Nasareth thungki Khulpu Jisu.”

Luwbuk Inn thu Jisu Mhan

12Ungta Jisu ngi Isowr luwbuk Inn thung ngi lut da ungta luwbuk Inn thung ngi do kren rek leh kjur rek ava Mma ngi rei pthiida. 13Mma ngi mhin inni theda, “Ava mdo kjit dok, ‘Nei Ki inn ava tiṭhil chaak na Inn ra;’ pdainu naanva namtrom rek khur apurthut pthiinna.”

14Ungta luwbuk Inn thu Mma hin tha kyeng rek leh mik ktot rek arva lamda, ungu Mma ngi pdam pik lamda. 15Pdainu thiimpu kinreel rek leh Nowlam chukpu rekki Mma ngi tnga na nong mdo tlot, ungta luwbuk Inn thu kmo rek ko owng ngi “Hosana Devid Chapa!” kdingi mu own in ava mdee in thungta; mmaanni kdung ngi plung pthit lamda; 16ungta Mhin the lamda, “Hava le ngi talu mthea, Nangva aryaakka?” Ungbi Jisu ngi mhin inni theda, “Oji”; ‘Nao kdowng rek leh arnuw kjown rek nerri kpanpaak ki mkinreel ava athuw ṭhia,’ dida mdo the ava pa maan timo? 17Ungta ma pthii lam thida, Mma ngi khuwpii ava thungki thuwk da, Bethania tha kipriik ra vang da.

Jisu ngi Kduwt Ding Pauhur mdo Buk

18Jiingsun kpanma ngi Mma ngi khuwpii tha mdil mkinlet thungta, mpoi thamda. 19Ungu lam siir ri kduwt ding khat mdee thungta,Mma ngi vapha da, ungbi marna daat kma donle Mma ngi do khat lee pha chme. Ungta Mma ngi theda, “Athei chui purnowl liit mso!” Ungta kduwt ding ava tun kat daatti ṭong chda. 20Siikhu rekki ava mdee in thungta kngak cha ngi the lamda, “Tun kat daattu kduwt ding ava tak heppi kṭong chdaat da?” 21Ungbi Jisu ngi mhin inni arthawngda, “Kinditti, Neiji ahin thaanni kthea, naanni plung kinṭheek liit kma arin chaak inbi, kduwt leen daatti naanni tlo ni maan ti, pdainu hava lown hin rukva, ‘Kurphui ra truwn thung ngi tla cha,’ dida athe inbi ava kurthuwk ra. 22Ungta naanni ado ṭhil chaak in khim khaija arin chaak inbi naanni arlaang chnaan di.”

Jisu Rutan Mlei thu Pau mdo Khewl

23Ungta Mma ngi luwbuk Inn thu lut da mpurchu slii daat arlaanni, thiimpu kinreel rek leh mii rekki kver rek Mhin arhang lamda, the lamda, “Hava lea talu rutanni Nang va ado lot, ungu hava rutanna ku ngi atpiik da?” 24Jisu ngi mhin inni arthawng da, “Nei rukku pau khat aju khewl chaanni; naanni ava atar thaan inbi Nei rukku talu rutanni hava lea kdo tlot tdit athe pik ni kaan di. 25Baptis kuptlot Johon na tva ki kthleng? Parwaan kimo mdit mata dulti mii rek hin ki?” Ungbi mmaanni khat leh khatti karseel lamda,nenni ‘Parwaan ki pi,’ dida narthaan inbi, ‘Talu leiji mma ava rin chmaan ti,’ di donle mi kthe raan. 26Pdainu nenni ‘Dulti mii rek hin ki pi’ dida nthe inbi, hava mii rek mluwngpa ava nṭit inna; mleija mii mkheng ngi Johon na khulpu khat pi di lamda. 27Ava leiji mmaanni Jisu hin arthawng lamda, “Dei maan ring.” Ungbi Mma ngi mhin inni theda, “Nei rukku talu rutan ni hava lea kdo tlot tdit athe pik ni maan ring.

Chapa rek Knii Paupurtol

28“Naanni talu abin inna? Miilai khatti chapa rek knii thloi da; upa bet hinni mma ngi vangda theda, ‘Kchapa, sniiva rik rou bil tha chet nong alou.’ 29Ungta mma ngi arthawngda, ‘Chet ni maang’; pdainu ava dil tha mma ngi plung pinle da chet da. 30Ungu miknit na hin mma ngi vangda anto heppi theda, ungbi mma ngi ‘Chet laini ocha’, di thida chet mda. 31Hava mmaanve knii thungva ku ngi mpah plungbin mtlotta?” Mmaanni theda, “Ru kri ki,” Ungta Jisu ngi mhin inni theda, “Kinditti, Neiji ahin thaanni kthea, naan adu thaanni khasna klou rek leh ko ok kma rekki Isowr Kruwngpaam thangva ku hung lamra. 32Mleija naan hinni Johon ni lam kindit deek ktong tha arjung da, ungta naanni rin chmaan ti, pdainu khasna klou rek leh ko ok kma rekki rin chlam da; ungu naanni kdei kurthuwk jownti, mdil thang daat ruk va naanni plung ren hur da mhin krin cha kurthuwk maan ti.

Rik rou Bil Knum rek Paupurtol

33“Ungta ktlok paupurtol ruk aryaa chaan. Inn kpupa khat amda,mma ngi mbil thu rik rou phunda, ungu mrowng tlot psuk da, mdii mdo sun nra khur kvel da, ungta mbuk sada, knum rek hin sil na thida, khuwpaam ktlok tha pjiin chda. 34Ungta thei mchui na ki mkaal mvee thungta, thei klou ra msra owr rek ava knum rek hinni hai siida; 35ungbi knum rek va sra owr ra lou lamda khat bun lamda, ktlok khat eayou lamda, ktlok khat ava lung ngi deeng lamda 36Ungta mma ngi msra owr rek haisii nowl da, ru kri ki hinnu kheel sii ngi mmaanni mhin inni tlo lamda. 37Mṭut na rel va mma ngi mchapa haisii da theda, ‘Kchapa ava mmaanni kakjat kro lam.’ 38Pdainu knum rekki mchapa mdee in thungta, mmaanni the lamda, ‘Hava lamchi pipa, arvaan mma ava eayou in che ungu alrou ava nenni ta thloi chaak raan.’ 39Ungta mmaanni lou lamda rik rou bil nowmbe ngi var pthii lam thida eayou lamda. 40Ava leiji rik rou bil kpupa ngi arva don knum rek hin talu ktlo rang?” 41Mmaanni Mhin the lamda, “Mma ngi kṭha kma mii rek ava tiṭit kirvei daatti ke eayou lamra, ungta mkaal mkaal thung ngi thei kpii ra ktlok mii rek ava hinni mma ngi rik rou bil knum rang nga ksil nra.”

42Jisu ngi mhin inni theda,

naanni Laaika rek ava pa maan ti mo:

‘Inn ksapa do pthlei lung ava katti,

markil ki ksuwk bul kurthuwk da;

hava Mukpu nong tlot,

ungta nen nmik sut naan thu tnga chaak in pme mo’?

43“Ava leiji, Neiji ahin thaanni kthea, naan athung kiin Isowr Kruwngpaam ava lou donle thei kchui rangki chati khat hinni kpii pthii ra. 44Ungta hava lung leen ni ktluw mii ava mikṭiik mikṭiikki kukui chra; pdainu mma ngi mtlaak na mii ava purvut ti kjuwng chra.”

45Thiimpu kinreel rek leh Pharisi rekki ava paupurtol maryaak in thungta, mmaan mlei thung ngi mdo the na tdit dei lamda. 46Pdainu mmaanni kukjowng rang ki mtlot in thungta, mii rek mkluwngpa ava ṭi chlam da, mleija mmaanni Khulpu khat kdingi bin lamda.

Currently Selected:

MATHI 21: LAMKBSI

Highlight

Copy