MATHI 14

Baptis Kuptlot Johon Diyo

1Mpha ava kat thung ngi paamkpu Herod ti Jisu mlei thung ngi pau karjaam ava aryaa da. 2Ungta msra owr rek hin mma ngi theda, “Hava ava baptis kuptlot Johon kdiyou dok thungki kring kardella; ava leiji nong mdo tlot naki rutan mma thung ngi ka am.” 3Mleija Herod ti Johon na kjowng da, bowl thida, mnaopa Philip numei Herodia tummi rowng inn thung ngi thiida; 4mleija Johon ni mhin theda, “Nang ngi mma adolo ava Nowlam dorot ava pme.” 5Ungta mma ngi ae you nuwm da, anto daat joso mii rek ṭi da, mleija mmaanva khulpu khat pi kdingi bin chlam da. 6Pdainu Herod ṭouna mnit arvangda, Herodia chanu ngi lop maiṭhuwm mi mkardaam thungta Herod ning tupthlungda, 7ava leiji mma ngi pau kthamda mma doṭhil khim khai mhin mdo piik nra paureel dok da. 8Mnuh do sin chaakki mma ngi theda, “Hava arkuw thung ngi baptis kuptlot Johon luwchai ado tpiik chaak ra neiji kingeija.” 9Ungta kruwng ava kdung ngi kansiir chda; pdainu mpau ktham leh mmal rekki mlei kurthuwk da mdo arvan sin nraan mma ngi paureen da; 10rowng inn thungki Johon luw mdo reen nraan mma ngi mii hai siida, 11ungta mluw ava arvan sin lamda, arkuw thung ngi nalanao hin pii lamda,ungu nalanao vi mnuh hin arvan sin da. 12Ungta msiikhu rekki arva lamda mukluwng ava lou lamda alruwl chlam da; ungu mmaanni sun lam da Jisu hin song lamda.

Jisu ngi Mii Pun Parnga mdo Pmaal

13Tunva Jisu ngi hava maryaak thungta, Mma ngi ava thungki kurlou da, arkuwng khat leen mmun ktliing khat thung ngi chet da. Pdainu kurtuwl mii rekki aryaa da, khuwpii rek thungki mkhuwnni chet lamda mdil ṭoi lamda. 14Mma ngi diibiing ngi mhai thungta kurtuwl mii klin lang lang ngi ka am deida; ungbi Mma ngi wonsat lo chlam da, ungta kukoi rek pdam pik lamda. 15Khuw mjiin thungta, siikhu rekki Mhin arvang lamda, the lamda, “Hava munna ktliing nga, ungta kokto dokka; kurtuwl mii rek ava mdaksaa in tummi then mdo ren chaak nlamra apsun chlam.” 16Jisu ngi theda, “Sun lamnime; naanni mdo chaak raan do mruk apii chaan.” 17Mmmaanni Mhin the lamda, “Neenni thenpen parnga leh tuwlva knii hava tha kthloi inna.” 18Ungta Mma ngi theda, “Nei kihin tha arvan sin in.” 19Ava dilli Mma ngi kurtuwl mii rekka nowmsuwl leen mko on nraan pau pṭum da; ungta thenpen parnga leh tuwlva knii louda parwaan hansuw da,ungu phowl kṭha parlaan da, ungta khui thida thenpen rek ava siikhu rek hin pii da, ungu siikhu rekki kurtuwl mii rek hin them pik lamda. 20Ungta mmaan mkheng ngi poi kpa ngi chaa lamda. Ungu mkikleem kṭik ava mmaanni bowr sowm lei knii kdim jilli lou lamda. 21Ungta kmaal mii rek ava snu rek leh kmo rek kthekma mii pun parnga arveel kurthuwk.

Jisu ngi Dii leen Mche

22Ava dilli Mma ngi kurtuwl mii rek mupsun slii arlaanni, siikhu rekka arkuwng leen raalpha khat ktong tha mvan nraan tlo da. 23Ungta Mma ngi kurtuwl mii rek mupsun dok dil tha, mthi na ngi kṭhil chra lown leen hang da. Khuw mjiin thungta Mma mthi ndaatti ava tha am daat da. 24Pdainu mpha ava thungva arkuwng ava laan tu kdung ngi lam karlat da, mleija tarthli ngi raan lamda, dii kakna ngi prei lamda. 25Ungta jaan ki ṭhang plii thung ngi Mma ngi truwn leen mkhu ngi chet da, mhin inni arvang da. 26Pdainu truwn leen mche ava siikhu rekki mdee in thungta, kdung piir lamda, thelamda, “Ava raothla khat!” Ungta mṭit inni mmaanni owng lamda. 27Pdainu Mma ngi mhin inni pau teng da, theda, “Aplung apnet chaan, Nei ping; ṭi maan.”

28Ungta Pitor ri Mhin arthawng da, “Mukpu, Nah akurthutta, dii leen Nah hinni kahai nra pau mhai pṭum pik.” 29Mma ngi theda, “Arva.” Ava leiji Pitor ri arkuwng leen ki ṭum da, ungu dii leenni Jisu hin vada; 30Pdainu tirthli kraang mdee thungta mma ngi ṭi chda, ungu dii thung ngi mtlaak slii thungta, “Mukpu mhai ktlan cha” dida owngda. 31Ungbi Jisu ngi mkhut hai khiing tengda kjowng thida mhin theda, “O mruksuwn daatti krin cha miilai, talu leiji plung kinṭheek ki abinna?” 32Ungu mmaanni arkuwng leen mkal in thungta, tarthli kraang ava down dok da. 33Ungta arkuwng thungki mii rekki Mhin luwbuk lamda, the lamda, “Kindit katti Nah Isowr Chapa pti.”

Jisu ngi Kenasarit thu Kukoi mdo Pdam

34Ungu mmaanni mvan klaan dok in thungta, Kenasarit tha arvang lamda. 35Ungta mun ava thungki mii rek va Mma ava tin chlam da, ungu marveel mkheng thung ngi mii sii lamda, kukoi rek mkheng Mhin ṭhi paphaak lamda, 36ungta mbuw mor rek rek mdo thown chaak nlam ra mmaanni Mhin ktham chlam da; ungu kthowng mii knempok ava dam da.

Currently Selected:

MATHI 14: LAMKBSI

Highlight

Copy