MATHI 10

Kenyee rek Sowm lei Knii

1Ungta Mma ngi msiikhu rek sowm lei knii ava Mhin own lam thida, pthla ktobor rek mdo rei pthii nraan, ungu omlai khim khai leh kduwng ksaan khim khai mdo pdam nraan rutan pii lamda. 2Kenyee rek miing sowm lei knii ava havale: ru kri ngi Pitor mdo dit Simon leh mnaopa Andrija: Jebedi chapa Jeems leh mnaopa Johon; 3Philip leh Bartholomio; Thomas leh khasna klou Mathi; Alphias chapa Jeems leh Thadius; 4Kanan ki Simon leh Mma kro kma Iskariot ki Judas.

Sowm lei Knii rek Nongtlot

5Ungta Jisu ngi sowm lei knii rek ava parseel lamda sii lamda, “Naanni ktlok chati rek hin ungu Samaria rek khuw thu lut maan, 6Pdainu kmaang kcha Isreel Jao rek inn thu echet in. 7Ungta naanni ache naan thu hanto aparyaam inra atheen, ‘Parwaan Kruwngpaam ava knai tekka.’ 8Kukoi apdam in, kdiyou apardel in, raaichii kthung rek apdam in, tarnam rek arei pthiin. Naanni mman ktaakki ado arlaan in, mman ktaakki apiin. 9Jeering hur maan, thiir kpowl hur maan, mdit mata thiir sum don arkowl in tunni hur maan. 10Alam ṭoi raan ki khau arkeeng maan, phrik karsakki hur maan, khu kok rek karsakki hur maan, kchung khdaat pre sin maan; mleija nong klou rek va then mdo arngai in. 11Ungta khuwpii joso khuw thung daat joso alu in mpha thu, ku ngi kurhuija tdit adei dok thiinra, asun duwn khim khai mma hin jiam daat in. 12Naanni inn thu alu in mpha thu salaam atlo in. 13Ungta inn ava mkurhuita, naan thungki kdaai ava mleen ni jiam so; pdainu mkurhui mata naan thungki kdaai ava aleen thaanni ekinle chaso. 14Ungu ku mii khatti akowl maan sora mdit mata apauna rek in maryaak maanta, inn mdit mata khuwpii ava amaak in mpha thu akhuwn arbaat akṭho pthiin. 15Kinditti, Neiji ahin thaanni kthea, makṭewl nit va khuwpii ava hinnu Sodom leh Gomora ngi kdiil dei bet ra.

Kthleng ra Kja Kakham

16“Ungta asuwn, tkei rek arlakki Jao lulu ngi Neiji ak sii inna; ava leiji pruwl lulu esing in ungu uṭhuw lulu ngi plung kparneem ahur chaan. 17Mii rek tuk asut chaan, mleija mmaanni karseel lop thu akparlaan pthii raan, synagog rek thu akṭhi raan, 18ungu Nei ktum mi rinpaumin ado hur nraan, paam kpu rek leh kruwng rek ungta ktlok chati rek hin akparlaan pthii raan. 19Mmaanni atparlaan pthiin mpha thu apau raan mdit mata ado the raan thung ngi plung pja maan; mleija ṭhang ava kat thung ngi ado the raanna akpii chraan; 20mleija kpau rang nga naan rang pme, pdainu naanki Apah pthla ngi naan thung ngi kpau ra. 21Unao khatti unao khat kdiyou rang ngi kparlaan pthii ra, ungu mpah ngi mnao, mnaole ngi mnuh leh mpah raal pii donle mdiyo nraan ktlo ra. 22Ungta Nei kmiing tummi naan ava mii mkheng ngi akipder chraan. Pdainu mṭut na kpha dekki kdiil pchaang ava kaktlan pik ra. 23Khuwpii khat thu mmaanni kja kakham atpiik inta, mbe ki hinni kunthot dok in; mleija kinditti, Neiji ahin thaanni kthea, Mii Chapa ngi murjun du khim khaiji Isreel khuwpii rek mkheng parkhil pchaang ni maan ti.

24“Siikhu khat ava mma chukpu tunni ame, mdit mata sra owr khat ava mma kpupa tunni ame; 25Siikhu khatti mma chukpu hep daat ungu sra owr khatti mma kpupa hep daat mkurthut nrang nga ko khop kcha a. Mmaanni inn kpupa ava Beljebul kdingi mo own inbi, inn thungki ka am rek ngaalla tak hep pang ngi kthe psuk lam rang.

Ku hin Tiṭit rang

26“Ava leiji mmaanna ṭi maan; mleija mdo pandan ma rang ngi mdo khum daat do khat lee ame, mdit mata tdee mara kurdowl daat ame. 27Kjiing thu Neiji ado ktheen ava; mar awng thung ngi kthuwk ra; ungu tuprut pau naanni ado aryaak in ava, innthlun leenni mdo ksam dok. 28Ungta daksaa daat aeyou thida raothla ke eayou pchaang kma mii ava naanni ṭi maan; ava kchang nga daksaa leh raothla mikniing sim thung ngi kaptlayou pchaang Mma lamchi aṭi chaan. 29Priit rek knii ava ana khatti mdo jur pme mo? Ungu Apah in plung bin kma donle khdaat pre dul leen tla nime. 30Ungta aluw leen inki sam rek daat rap klua mkheng ngi mdo tai dok. 31Ava ngi mlei kurthuwk da, ṭi maan; naan ava priit rek knempok hinnu mman klu lang lang in pti

Khrista Kthethuw leh Kipthlei

32“Ava leiji mii rek maiṭhuwm mi Nei makdei pandi mii pum ktai ava Nei ruk va, parwaan ki Kpah maiṭhuwm mi deipandi chnik di. 33Pdainu mii rek maiṭhuwm mi Nei makipthlei mii ava, Nei rukku parwaan ki Kpah maiṭhuwm mi pthlei nik di.

Kdaai rang pme pdainu Kaangksaang Khat

34“Dultipaam thu Neiji kdaai kurjun ksin rang pi kdingi bin maan; Neiji kdaai arjun sin nimaang, pdainu kaangksaang khat ra. 35Mleija Nei kurjun ava chapa miilai khatti mpah raal mdo piik nra, ungu chanu khatti mnuh raal mdo piik nra, mukmou khatti makternu raal mdo piik nra; 36ungu miilai khatti mdo snuwm mara ava mphungka thungki kat kurthuwk ra. 37Nei wonsat mdo talo kipkheel dekki ku mii khatti mpah leh mnuh wonsat mlobi, ava Nei kihinni kurhui chme; ungu Nei wonsat mdo talo kheel li mchapa mdit mata mchanu wonsat mlobi, ava ruk Nei kihinva kurhui me. 38Ungta mma mdaksaa ki khros hurda Nei kdil kṭoi kma mii ava Nei kihinva kurhui chme. 39Mrinkhu kpha kcha mii ava kmaang chra, ungu Nei ktummi mrinkhu kvardeen kcha mii ava kpha chra.

Mnah rek

40“Naan akarlaang kchaan mii va Nei ruk mdo tarlaan chaak, ungta Nei mkarlaang kcha mii ava va Nei mju ksii Mma ava mdo arlaan chaak. 41Mma ava khulpu khat mkurthuw leiji khulpu khat marlaan chaakbi, khulpu khat ki mnah kpha chra, ungta rinkindit khat mkurthuw leiji, rinkindit khat ava marlaan chaakbi, rinkindit ki mnah kpha chra. 42Ungu ku mii khatti siikhu khat mkurthuw leiji, hava kdil sisi khat hin dii kdai tong khat pang mpiik chaak bi, kinditti, Neiji ahin thaanni kthea, mma ki mnah ava pmaan pik liit nime.”

Currently Selected:

MATHI 10: LAMKBSI

Highlight

Copy