LUK 5

Jisu ngi Ru kri reep ki Siikhu mdo Own

1Mii rekki Isowr pauna karyaa ra Mma hin mnam kurduwl arlaanni, Mma ava Kenasarit duwm biing ngi rip daat da. 2Ungta duwm be ngi arkuwng rek knii Mma ngi dei da; pdainu tuwlva kse rek mii ava mthungki sun chlam da, ungu makchak in arsu meek lamda. 3Arkuwng rek arlakki Simon arkuwng leenni tuwng da,laan ki mruk mkursown nra mhin theda; ungta Mma ngi arkuwng leen ko ong thida mii rek hin purchuk da. 4Ungta Mma ngi pau saam dok thida, Simon hin theda, “Ado kjown nra kukthuk bet thung ngi akchak rek adeeng.” 5Ungbi Simon ni arthawng da, “Chukpu, neenni jaan khat ti deeng innu ungu do khat lee kjowng chmaan ring. Pdainu Nah apauna ngi kchak rek ava deeng ni.” 6Ungta mmaanni hava mtlot in thungta, kchak rek kekṭet daat rang ngi, tuwlva knempok khum lamda. 7Ktlok arkuwng thung ki mmaan miiṭhi rek ki mdo bom chaak nraan the lam da, ungbi mmaanni arva lamda, ungta arkuwng ava mikniing ngi dim da, ava leiji dii thung ngi kpurlup rang ngi tloda. 8Pdainu Simon Pitor ri ava mdee thungta, Jisu khuther ri tluw da Mhin theda, “O, Mukpu, nei kihin ki ekursown dok mleija neia pnu kirvei mii pa ping.” 9Mleija tuwlva mdo kjown lei inni, mma leh mmiiṭhi mkheng nga kdung ngi ngak chlam da. 10Ungta Jebedi chapa rek Jeems leh mnaopa Johon rukka Simon miiṭhi kurthuwk lamda. Ungu Jisu ngi Simon hin theda, “ṭi ma; tun ki kupṭhun ni nang ngi mii kjowng nadi.” 11Ungta mmaanni arkuwng rek ava laan tha mhowl dok inle, do khim khai mmaanni ma pthii lam thida Mma dil ṭoi chlam da.

Jisu ngi Miilai Khat mdo Pdam

12Khuwpii rek khat thu Mma ngi ma am mpha thu, raaichii kthung miilai khat arva da, mma ngi Jisu mdee thungta, Mmaiṭhuwm mi tluw da Mhin ktham chda, “Mukpu, Nang ngi atrot pik ta nea mhai partleu cha.” 13Ungbi Mma ngi mkhut khiing da kmei thida,mhin theda, “Neiva krotta, ekartleu cha.” Ungu tun kat daatti mraaichii ava tlei chda. 14Ungta mma ngi ku mii khat lee hin mdo the thut ma nra mhin pau pṭum da; Pdainu vang ra thiimpu hin adaksaa ktardet cha, ungu Mousi paureen dil kṭoiji nang ngi ditta mii rek hin ado tdet na ngi, adaksaa kartleu na ki tlaai adown cha.” 15Pdainu Mma mlei thung ngi pau ava duwn thang ngi kdung kurjou da; ungbi karyaa ra kurtuwl mii klin langlang khat thuwk da. 16Pdainu Mma ngi kbowklai tha chet da ṭhil chda.

Kyeng Miilai Khat Jisu do Pdam

17Hava nit rek thung ngi, Mma ngi mpurchu meek arlaanni, Galil ungta Judia ungu Jerusalem khuw ktai ki kthleng Pharisi rek leh Nowlam chukpu rek mbe ngi ko ong daat lamda; ungu kapdam ki Mukpu rutanni kurthlo ṭhi da. 18Ungta asuwn, mii rekki kyeng miilai khat mi iina kpher tu haiṭhi lamda, Mma hin ṭhida Jisu maiṭhuwm mi mdo pi ii nraan mlam thlaam lamda. 19Pdainu mthung ngi mii mkurtuwl reen leiji mvan lu nraan lam am mda, innthlun leen mmaanni hangkal lamda, klong thung ngi mi iina tu Jisu maiṭhuwm mi ju ptla lamda. 20Ungu mdo rin chaak in Mma ngi mdee thungta theda, “Miilai nah apnu ton rekka akuptlot pikka.” 21Ungbi Nowlam chukpu rek leh Pharisi rekki kir khewl lamda, “Isowr kjowm cha ngi kpau Mma ava ku da? Isowr kma donle pnu rek kuptlot pchaang rang nga ku da?” 22Mmaanni pau mkarkhewl in ava Jisu ngi deida, mhin inni theda, “Talu leiji aplung in thung ngi karkhewl in pti? 23‘Apnu ton rek akuptlot pikka,’ dida tithe, mata ‘Kardel ra echet,’ dida tithe ava tva ngi ko ol rang? 24Pdainu Mii Chapa ava ngi dultipaam thung ngi pnu rek mdo ptlot pik na ki rutan mthloija tdit naanni ado dee nraan” kyeng miilai hin Jisu ngi theda, “Nah hinni Neiji kthea, kardel ra a iina achom ra a inn tha vang cha!” 25Ungbi tun kat daatti mmaiṭhuwm inni mma ngi kardel da, mma ngi mleen mi iina kpher ava chom da, Isowr panpaak da mi inn tha vang chda. 26Ungta mmaan mkheng nga ngak chlam da, ungu kdung kngak cha ngi Isowr panpaak lamda, “Snii va tdee liit maan do ndee chaak inna.”

Jisu ngi Levi mdo Own

27Hava diltha Mma ngi duwn thuwk da, ungu khasna klou kchok mmiing Levi tdit mma ava khasna inn thung ngi kuk ong daat deida; ungbi Mma ngi mhin theda, “Nei kdil aṭoi cha.” 28Ungta mma ngi do khim khai ma thida, rip daat da Mdil ṭoi chda.

29Ungta Levi ngi mi inn thung ngi klin lang lang kmaal khat tlo da; ungu khasna klou rek leh mii murson knempok tu tebol be ngi kmaal ra ku ong lamda. 30Ungta pharisi rek leh Nowlam chukpu rekki msiikhu rek hin Mma ava mraal kpii ngi the lamda, “Talu leiji naanva khasna klou rek leh pnu ktong rek tu ado chaak ado neek in da?” 31Ungbi Jisu ngi mhin inni arthawng da, “Kchun mii rek va kdim kriingme, pdainu kukoi rek daat; 32rinkindit rek ku own ra Neia kurjung pmaang, pdainu pnu ktong rek ki plung ren mdo pinlet nraan ki kurjung ping.”

Kngowl mlei thung ngi mdo Khewl

33Ungta mmaanni Mhin theda, “Johon siikhu rek va maknem thung ngi then ngowl lamda mdo ṭhil chaak in, ungta Pharisi rek siikhu rek ruk va anto tlo lamda, pdainu Nah asiikhu rek va chaanee lamda.” 34Ungbi Jisu ngi mhin inni theda, “Kphalpa ngi ma am ṭhi daat arlaannu mmal rek va then kngowl lam rang mo? 35Mmaan arlakki kphalpa mdo lo dok nrangki mnit rek karvangg ra, ava nit rek thung ro ngi mmaanni then kngowl lamra.” 36Mma ngi mhin inni paupurtol ruk va theda, “Ku mii khat lee ngi buw ren khat tunki mlaak khat kṭet da, buw pliw tun ni kleng lot nime, mma ngi ava mtlot bi, ren ava kikṭet pthii ra, ungta ren ava laak va pliw tu kurlo nime. 37Ungta ku mii khat lee ngi rik rou dii ren ava, rik rou dii pliw saavun khau ava thung ngi daal nime; mma ngi ava mtlot bi, rik rou dii ren ava ngi saavun ava ksai phok ra, ungu kjaan chra, saavun rek ruk kmaang chra. 38Pdainu rik rou dii ren ava rik rou saavun khau ren rek thu mdo daal ra. 39Ungta ku mii khat lee ngi rik rou dii pliw mneek dil tha, rik rou dii ren nee nuwm nime; mleija mma ngi kthera, ‘Pliw ava ngi kṭha.’ ”

Currently Selected:

LUK 5: LAMKBSI

Highlight

Copy