LUK 13

Apnu ton in thungki Akinlet maanbi Diyou naan di

1Mpha ava kat thung ngi Pilat ti Galil mii rek hii ava tlaai mdo down tu mpur chuwmma tdit mii angṭhe ngi Mhin son pik da. 2Ungta Mma ngi mhin inni arthawng da, “Galil mii rekki suwk mthuw lei inni Galil mii rek mkheng nga kheel sii ngi pnu kirvei rek pi kdingi abin inmo? 3Neiji ahin thaanni kthea, ava liit pme; pdainu naanni plung apinlet maanbi, naan akheng in rukka anto maang chnaan di. 4Mata Siloham thungki innmai ktluw ngi mdo nenyo mii sowm lei tret ava Jerusalem thu ka am mii rek mkheng hinnu kheel sii ngi ktuwl riim cha rek kdingi naanni abin inmo? 5Neiji ahin thaanni kthea, ava liit pme; pdainu naanni plung ren ahur liit maanbi, anto heppi naan rukka maang chnaan di.”

Thei Kchui kma Kduwt Ding Paupurtol

6Ungta Mma ngi hava paupurtolli theda, “Miilai khatti rikrou bil thung ngi kduwt ding khat phunda; ungta mma ngi mthei kthlaamra arva da, ungu khat lee pre pha mda. 7Ungbi mma ngi rik rou bil knum hin theda, ‘Asuw, hava kum kdum lik thung ngi neiji kduwt thei kthlaamra arva kchok nu, ungu pha maang, Talu leiji dul kpartlai krep rangda, aphur pthii lo?’ 8Ungbi mma ngi mhin arthawngda, ‘Ocha, hava kum rukva am chdaat so, neiji ploi nira vuwr thida haar thlaak ni. 9Ungta taikummi thei mchui ta, ṭha che; pdainu thei mchui mata, phuwr pthii daat ndi.’ ”

Sabath Nitti Snu Kyeng Khat Jisu do Pdam

10Tunva Mma ngi sabath nitti synagog khat thung ngi purchuk da. 11Ungta kum sowm lei tret lik thung ngi pthla khat omlai kirvei cha snu khat amda, mdaksaa ava kirjii pchaang kma ngi tkum chda. 12Ungu Jisu ngi mdee thungta, ownda mhin theda, “Snu, nah a omlai thungki karthlet kcha im pti.” 13Ungta Mma ngi mleenni mkhut khiin pikda, ungbi tun kat daatti mma ava kirjii da, Isowr panpaak chda. 14Pdainu synagog kpupava kdung ngi plung pthit da, mleija sabath nitti Jisu ngi mii pdamda, mma ngi mii rek hin theda, “Nong tatlot nra nii truk lik ka am, ava nit rek thung ngi arva ra apdam, ava sabath nit rek thung rang pme.” 15Ava dilli Mukpu ngi mhin theda, “ṭha tlot ktlo nang! Naan mii pum ktaiji sabath nitti asil in mata, askowlraam in ado kom in thungki parthlet inti, dii kpii ra ṭhi maan timo? 16Ungta Abraham chanu khat kthuwk hava snu ava, seitaan ni kum sowm lei tret lik thung ngi mdo bowl, ava sabath nit khat thung ngi tparthle pik ro memo?” 17Hava theda Mma ngi Mma kusnuwm kma mii rek khim khaija ning kja piida; ungta kunlor nong mkheng Mma dotlot ava ngi mii rek mkheng nga kanpa chda.

Anruwng Muh Paupurtol

18Ava ngi mlei kurthuwk da, Mma ngi theda, “Isowr Kruwngpaam ma tak mdutta? Ungu ava Neiva talu purtol nik di? 19Ava miilai khatti anruwng muh louda innbil thung ngi mdovar lulu; ungta mowngda, ding klin khat kurthuwk da, ungu kjuwng puwa rekki mbaak rek leen mbuw sa chlam da.”

Thowl Paupurtol

20Ungta Mma ngi the nowl da, “Isowr Kruwngpaam ma tak purtol nik damma? 21Ava snu miilai khatti tpartee na jaam ava kdum louda, thowl thlaak da, mkheng mkurhou du khim khai mdo parhou ava hep daat kurthuwk.”

Thurngot Ktarbik

22Jerusalem kphara Mma ngi khuwpii rek leh khuw rek tha chet da purchuk da. 23Ungta ku mii khatti Mhin theda, “Mukpu, mdo ktlan dok mii rekka mruk daat mo?” Ungbi Mma ngi mhin inni theda, 24“Thurngot ktarbik thu alu nraan kanthi atloin; mleija Neiji ahin thaanni kthea, mii knempok ki klut rangki kthlaamra ungta pchaang nime. 25Inn kpupa ngi kardel da thurngot markam dok diltha, naanni duwn tha rip da thurngot ṭhilda, ‘Mukpu, thurngot mhai pvan pik chaan,’ dida kthe pṭhun naan di, pdainu Mma ngi naanna adei maan ring, tva ki kthleng in pti di donle akarthawng raan. 26Ava dilli naanni kthe pṭhun naandi, nah a awng ngi neenni chaanee innu, neen ki inn lam in thung ngi Nang ngi purchuk tinu. 27Pdainu Neiji naan hin kthea, ‘Naanna tva ki kthleng in pti Neiji adei maan ring, Kihin ki sun dok in, kṭha kma ktlo naan akheng in,’ didon Mma ngi kthera. 28Naanni Abraham, Isek, Jakob ungta khulpu rek mkheng Isowr Kruwngpaam thung ngi adee in mpha thu ṭap da ahaa in kril naan di, ungta naan adaksaa in katta akikneng pthii raan. 29Ungta mii rekki kniw thuwna ki leh kniw tlaak naki, ungu karthak ki leh kurdu ki thleng donle Isowr Kruwngpaam tha tebol be ngi kmaal kuk ong lamra. 30Ungta asuwn, ru kri kira dil knau kcha mii ka amma, ungu dil knau rangki ru kri kcha mii angṭhe ka amma.”

Jisu ngi Jerusalem Wonsat mdo Lo

31Mpha ava kat thung ngi Pharisi rek mii angṭhe ngi arva da Mhin theda, “Hava thungki sun dok, mleija Herod ti ake eayou ra mthlaam ma.” 32Ungbi Mma ngi mhin inni theda, “Vang inra tkei ava hin atheen, ‘Asuw, snii ruk pduk ruk neiji tarnam rek rei pthiida, ungu kapdam tlo nik di, ungta mnii kdumna ngi Nei knong tlot ava kurkhum ra.’ 33Anto daat joso snii ruk pduk ruk ungta adai nii rukva Neiji tlo daat nik di; mleija Jerusalem duwn tha khulpu khat lee kmaang rome. 34O,Jerusalem, Jerusalem, nah hinni kdo juk sii khulpu rek ava eayou tinu lung ngi ado deen lam! Harnuh ngi mapthla tingi msuwn rek mdo om purku lulu ngi Neiva nah naolea tak hep pang kurnowlda, om purkuk lam nik da, pdainu nangva ro nuwm mti. 35Asuw, nah inn ava kmaak pthia, ungta Neiji ahin kthea, ‘Mukpu miing ngi kurjung Mma ava msuw kṭha,’ dida athe du khim khai nang ngi mdei liit nim ti!”

Currently Selected:

LUK 13: LAMKBSI

Highlight

Copy