MARK 2

Jisunii pum-pei taisii kalei meigo tii mbi kapyii

(Met 9.1-8; Luk 5.17-26)

1Leimik chengniikii tai Jisunii Kaiparnam ki nlailiit loi kaile, sateichii mpou ki kalung leile katu ngaha tei shii gong takle. 2Binasek- kii mei hangka gong ndwi wotakle, teipiinii ahnyiigo mbam tang karamni tei gatakle, ki kajang kamwi katang piinii ani gatakle, sateichii mpounii ahnyii dakii ralipyiitu takle. 3Sateichii ahnyiinii mei hangninii pumpei kataimeigo mei madaipii kasisii Jisuda poiliitle. 4Sateichii ahnyiinii meimoi kakto mpougo Jisuda poiliitpei kalak jangpiinii, mpounii kabam ki kapou asum tei ratoisii apum-pei kataipii gotei azyii gamkii mazyiisii kapouryii gamto m-mang takle. 5Ahnyii mah kamalum tei Jisunii ngou wosanii, apum pei kataipii gotei tamle, “Gunah gomah kem hangtei kaleipyii takle.”

6Nlenii ajaitingshang kati ojamei kangka tei kito bam kaleimei teinii ahnyii roinapii ahnyii lung kito n-nhiile, 7“Mei aipou ainii dajangpii aitiisii tam leipo? ai ai Saraago tam mashyiile! Saraa roinale kem kaleipyii kabui tei!”

8Ahnyiinii maning kalei tei Jisunii tiwosek-kii mpounii ahnyii dakii tamle, “Gonyiinii dajangpii gonyii lung kito ai kakum swi ai maning leipo? 9‘Gokem kaleipyii takle’ katu mak-kii ‘gungtu gozyii poisii tat tulo,’ sii apum pei kataipii go tam tang karam tei kadapiinii mala buipo? 10Sateichii meinah sapfii mpou teinii sazyii pouryiito kem kaleipyii kabui teimaham leile katu gonyii go mangou tangle,” sanii mpounii apum pei kataipii dateikii tamle. 11“Inii n-go tam leile, gungtu wolo, gozyii tei poimatu wolo, sateichii aki gong tulo.”

12Teisek-kii mpounii gungkhii takle sateichii azyii poi matu takle ninado meihang doito tatpat takle. Ahnyiihangtei khiipat takle ninado Saraago aitiisii tam matoile, “Ai takumpii nyiinii mahdou kado ngousang ngoumakle!”

Jisunii Levi go kalat

(Met 9.9-13; Luk 5.12-16)

13Jisunii Galili dwijaiki nlailoisii tatpat takle, sateichii meimoinii mpouda gong takle, sateichii mpounii ahnyiigo ralipyiile. 14Sateichii mpounii chengniikii tat-hum sek-kii, Alfaiyas nah sapfii mpou Levi teinii haboi kahaki teito bamsii kalei tei ngoule teito Jisunii mpou dakii tamle, “Gutai swi wolo.” Sateichii mpounii tusat tosii mpou-tai swiwo takle.

15Sateichii Jisunii Levi kito chiitang karam jangpii bam kalei tinglang kak, Bangpii ninado mpou boumeigo kaswisii aha kahamei ninado kem kama katiimei hangka tak kachii bamki tei kaswisii bamtakle; dapochiinii mpou-tai swikalei mei tei moile. 16Sateichii Farasismei kak kito ajaitingshang kati ojamei teinii aha kahamei ninado kem kama katiimeigo Jisunii kaswisii chii kajyii ninado sak kajyii tei ngou wosii mpou-tai kaswimei dakii tamle, “kadajangpii Jisunii aha kahamei ninado kem kama katiimeigo kaswisii chii njoi sak njoi leipo?”

17Teisek-kii Jisunii ahnyii dakii tamle, “Ara kagamei teinii peimhii- meigo fiimakle, nlenii ara kanimei teinii peimhiimeigo fiile. Inii kasang kamajyiimei jangpii gong makle, nlenii kem kama mei jangpii gongle.”

Malotryii katu jangpii kakachyii

(Met 9.14-17; Luk 5.33-39)

18Tinglang hangniniiki Jon dwi mpum kapyiipii mah boumei ninado Farasismeinii malotryiile, teito mei kangkanii Jisuda gong n-nhiile, “Jon mah ninado Farasismei mah bou- meinii malotryii sanii, Bangpii mah boumei teinii dajangpii malotryii makpo?”

19Jisunii ahnyii dakii khekalatle, “Amyii kapangki gonghai kalei kangmei teinii nou tiitang karampii gotei kaswisii bamleibangpii malot- ryii wobuipo? Nou tiitang karampii gotei ahnyiinii kaswisii kaleita ah- nyiinii malotryiipei wolakle. 20Nlenii tinglang tei gong tangle, nou tiitang karampii gotei ahnyii kak kito poitoi tangle, sateichii teipiinei leimik ahnyiinii malotryii tangle.

21“Mei kaniido pei kaham kikii pei kasatai makotkai leimakle, kadapokii makot kakai pei kasatai teinii chyiisii pei kaham gotei hetriit toi tangle, sateichii tei teinii kisii tiimahak maditu tangle. 22Sateichii mei kaniido jou kasatai tei kaham joubung kikii ruikai leimakle, ruikai lepochiinii pungpak aitangle, satei- chii jou nei joubung tei kadak tangle, teipiinii jou kasatai tei bung kasatai kikii ruikai leile.”

Ntak piinei leimik mah kaang kito kachyiinhii katu

(Met 12.1-8; Luk 6.1-5)

23Ntak piinei leimik Jisunii lu sumto tatpatle, mpou-tai kaswi- meinii mpou-tai swisii tat leibangpii, arhiibwi tei dangtutakle, 24teipiinii Farasismeinii Jisuda tamle, “Julo, Kadajangpii go boumeinii ntak piinei leimik mei tiikanhii tiileipo?”

25Jisunii ahnyii dakii khekalatle, “Gonyiinii fiisang fiimakde; Devit ninado mpoutai swikalei meinii mazyii kasaryii tinglangki dapei tiipo katu tei? 26Mpounii Saraaki lung liitsii Saraa go kattoi kalei tiirok tei chiile, aitiisii Abiatarnii Tingditupii pungkalei kak pat takle, nyii jai taiswisii tiirok tei kakimeinii chii katu mazhii makle, nlenii atingmei roinii chii katu mazhiile. Nlenii Devitnii chiitakle ninado mpou-tai kaswimei godo pyiitakle.”

27Jisunii ahnyii dakii tamle, “Ntak piinei leimik ai meinah jangpii tiipyiile, nlenii meinah ai ntak piinei leimik jangpii makle. 28Teipiinii Meinah Sapfii mpou tei ntak piinei leimik mah bangpiile.”

Currently Selected:

MARK 2: NAG2

Highlight

Copy