METIU 25

Ralhiimeinah kearii mah ndasam

1“Tei tinglangki sating gam sazyii tei ahnyii mah thaomi poisii nou tiitang karam sapfii mpougo kadoutang karam jangpii tat kapat ralhiimeinah kearii takum tangle. 2Ahnyii mangiinii swikaga meile sateichii mangiinii kasakai- meile. 3Kadapokii swikaga ralhii- meinah hang teinii ahnyii mah thaomi tei poitakle, nlenii ahnyiinii thaodwi kaki teinii pungsutakle; 4nlenii kasakai ralhiimeinah hang- teinii ahnyii mah thaomi gotei kaswisii thaodwi bung katokryii pung wotakle. 5Nou tiitang karam sapfii mpou tei gong kari taiswisii, ahnyii hangtei zyiinasii zyiitutakle.

6Nlenii tinghum asum saa mpat takle, ‘Julo, nou tiitang karam sapfii mpou tei aiki leitakle! Patlo ninado mpougo gonyii kadou wolo.’ 7Teito ralhiimeinah kearii teinii gungkhiisii ahnyii mah thaomi hangtei mimasai wotakle. 8Sateichii swikaga ralhii- meinah teinii kasakai ralhiimeinah hang dateikii tamle, ‘gonyii mah thaodwi kiteito nyiigo chengniikii seilo, dapochiinii nyii mah thaomi hangteinii miit leitakle.’ 9Nlenii kasakai ralhiimeinah teinii kheka- latle, gonyii jangpiiniido nyiijangpii- niido buiwolakle; kajoi nitei maasii gonyii jangpii lyii wolo. 10Sateichii ahnyiinii maa lyii katu tinglang kak nou tiitang karam sapfii mpou tei gong takle. Sateichii tiida kalu mangii teinii mpougo kaswisii myii kapang takbai kitei liit wotakle, sateichii kitei takam takle.

11Tei-taito ralhiimeinah kakimei hangteido gongsii tamle, ‘Bangpii, Bangpii, nyiigo takam laat seilo.’ 12Nlenii Mpounii khekalatle, ‘Inii gonyii dakii kasangpii tam leile, Inii gonyiigo timakle.’

13Teijangpii sakailo, kadapokii gonyiinii leimikdo sateichii ting- langdo timakle.

Kikaleimei hangtum mah ndasam

(Luk 19.11-27)

14“Kadapokii ainii mei hangni- nanii sazyii kaki hangniniiki tat tuna mpouki kaleimeigo lat tosii mpou mah kabam mahlyiihang tei ahnyii dakii julosii atung kaikabam mei hangninii takumle, 15Mpounii mei hangninii dakii talent mangii kaki hangninii dakii hangna, sateichii kaki mei hangninii dakii hangninii, mpou mpounii kangam taiswisii ahnyii hang dakii pyiisii, mpou tat tutakle. 16Manoisek-kii talent mangii doukalupii teinii maasii teiteipii li-laa tiikalu kito, kaki talent mangii douki wotakle, 17Teitakumpii talent hangna doukalu kikaleipii teinii kaki talent hangna dou wotakle. 18Nlenii talent hangninii doukalupii teinii maasii sazyii laimathoksii, mpou pumpii mah sana tei kabai takle.

19“Aitoinii tinglang kathangkii soukalei-taito kikaleimeimah apum- pii teinii gong ahnyiigo kaswisii ajhii mashak takle. 20Sateichii talent mangii doukalupii teinii liitsanii, kaki talent mangii kisii poigongsii tamle, ‘Pumpii nangnii gudakii talent mangii pyiile; juseilo, Inii kaki talent mangii douki takle.’ 21Mpou pumpii teinii tamle, ‘hangkapii bitakle, kabi ninado malum kabui kikaleipii, nangnii mah kacheng phyiiryiito malum kabui tha tiika- bam taiswisii, Inii n-go mah hangka phyiiryiito tung tiisii kaju kashang bam tei kaipyii tangle, go pumpii mah ka-nta kitei liit tolo.’

22“Talent hangna kadoupii teinii liitsii tamle, ‘Pumpii nangnii gudakii talent hangna pyiile, juseilo, Inii kaki talent hangna douki takle.’ 23Mpou mah Pumpii teinii mpou dakii tamle, ‘hangkapii bitakle, Kabi ninado malum kabui kikaleipii, nangnii mah kacheng phyiiryiito malum kabui tha tiikabam taiswisii, Inii n-go mah hangka phyiiryiito tung tiisii kaju kashang bam tei kaipyii tangle, go pumpii mah ka-nta kitei liit tolo.’

24“Sateichii talent hangninii doukalupii teiniido liitsii tamle, ‘Pumpii, nangnii lingkaikasu niteito karachet, sateichii nangnii lwi maroukai kasu niteito poi ka-nkom, kaikashyii meile katu tei Inii tile; 25Teipiinii Inii hingsii, Inii maasii gomah talent tei sazyii kangkii kabai takle, juseilo, gomah sanah tei aiki leile.’

26“Nlenii mpou mah apumpii teinii mpougo khekalatle, ‘Kashyii ninado mahat kashyii kikaleipii! Inii lingkai kasu nito Inii rachetle, sateichii Inii lwi marou kasu nito Inii poi nkomle katu nang tipo? 27Teitii leponii nangnii gumah sanah tei sanah amee kamatat nikii kai aitang karamle, sateichii Inii nlai kagongki gumah tei amee njasii Inii doutang karamle. 28Teipiinii ah dato talent tei poisii talent#Talent, ai talent hangninii ai jang kahemei hangninii mah tingkum keariisii mangii-nkhii mah pumjang mai sungdo moile. kearii kalei ah dakii pyii ailo. 29Kadapokii kaleimei hang dateikii kisii pyiitangle sateichii mpounii hangka leitangle, nlenii kaga ah dateito ah mah kalei katang tei poitoi aitangle.” 30Sateichii kakadak kikaleipii gotei saba mah kamyii kiteikii toikai ailo, teibam kiteito mpounii ghii kagetsii hat tangle.’

Kalui mah samtak katii

31“Meinah sapfii mpou teinii mpoumah pumtei kava kito, sating gamlui hang go kaswisii kagong tinglang kak, mpoumah pumtei kava mah sagong bam kitei mpounii bam tangle. 32Sateichii Lui hang go mpou doikii poi ndwi tangle, Jaokakoipiinii amyii kak kito Jaogo poi mpat tham katu takumpii, mpounii ahnyii hangninii kito hangniniigo poitaam tangle; 33sateichii mpounii Jaonah hang gotei mpou-bah ajiilamkii kaitangle, nlenii amyiinah hang gotei mpou-bah abilam pangkii kai tangle. 34Teitinglangki sagong teinii mpou- bah ajiilam pang kabam meihang dakii tam tangle, ‘Patlo, Gu pfii mah satoi doukalumei, sazyii pouryii tii ka-mpat saroi sekto gonyii jangpiinii tiida kabam sagong sazyii tei douwolo. 35Kadapokii Inii moi kama- zyii tinglang kak, gonyiinii n-gu pyii chiile, Inii kasaryii tinglang kak, gonyiinii n-gu dwi pyiisakle, Inii siisangmei tiisii kalei tinglang kak, gonyiinii n-gu lukai pyiile. 36Inii peimani kaga tinglang kak, gonyiinii n-gu peimani pyiile, Inii rakani tinglang kak, gonyiinii n-gu makot pyiile, Inii kabang kilungto kalei tinglang kak, gonyiinii guda gong pyiile.’

37“Teitinglang kak kasang kama- jyiimei hangteinii khekalat tangle, ‘Bangpii nangnii moi mazyiisii kalei nyiinii kadadou ngousii n-go pyii-chiipo? 38Sateichii nyiinii n-go kadadou siisangmei hangninii tiisii ngousii n-go lukaipyiipo? Mak-kii peimani gasii n-go pei mani kaipyiipo? 39Sateichii nyiinii n-go kadadou rakani ngoupo mak-kii kabang kilungto goda gongpyiipo?’ 40Sateichii Sagong teinii ahnyiigo khekalat tangle, ‘Inii gonyii dakii kasangpii tam leile, gukang sanamei kacheng chengsang hangninii dakii gonyiinii tiikapyii tatei gonyiinii gudakii tiipyii bamle.’

41“Teito mpounii mpou-bah abilam pangto kalei hang dateikii tam tangle, ‘He Saraa sheeng doukalumei, gonyii gudato tat mpasii seitan ninado mpou mah sating#Sating gamlui, ai kito Seitan nga kangameigo tam leile. gamlui hang jangpii tiida kabam kalui kaga mibam kitei tat tulo; 42kadapokii Inii moi kamazyii tinglang kak, gonyiinii n-gu pyii-chii makle, sateichii Inii dwi kasaryii tinglang kak, gonyiinii n-gu pyii-sak makle, 43Inii siisangmei hangninii tiisii kalei tinglang kak, gonyiinii n-gu lukaipyii makle, peimani kaga tinglang kak, gonyiinii n-gu peimani pyii makle, ra kani ninado kabang kilungto kalei tinglang kak, gonyiinii guda gongpyii makle.’

44“Teito ahnyiiniido khekalat tangle, ‘Bangpii nangnii moi kamazyii, kasaryii, siisang tiisii, pei mani kaga, rakani mak-kii kabang kilungto kalei nyiinii kadadou ngousii n-go tiiha sutakpo?’ 45Tei tinglang kak mpounii ahnyii dakii khekalat tangle, ‘Inii gonyii dakii kasangpii tam leile, ai kacheng chengsang hangninii dakii gonyiinii tiiha kasutatei gonyiinii gudakii tiiha sutakle.’ 46Sateichii ahnyii hang ainii kalui kaga kamage kalak nitei tat tang takle, nlenii kasang kamajyiimei hang teinii kalui kaga karing nitei tat tang takle.”

Currently Selected:

METIU 25: NAG2

Highlight

Copy