METIU 10

Tiilamlwi kapyiimei keariisiinakhii

(Mrk 3.13-19; Luk 6.12-16)

1Sateichii mpounii mpou boumei keariisiinakhii gotei mpouda lat magongsii, “Matei kasu rangii go baatoi matutang karam sateichii ra kashyii hang go tii mbipyii matutang karam jangpii mpounii ahnyii dakii teimaham pyiitakle.” 2Tiilamlwi kapyii mei keariisiinakhii zei tei aile: Karei reisang kito Pitar sii kalat Simon, sateichii mpoutai karhiipii Andru, Zebedi nah sapfii mpou Jems ninado mpou taikarhiipii Jon, 3Filip ninado Bartholomio; Thomas ninado aha kahapii Metiu; Alfaiyas nah sapfii mpou Jems ninado Tadios; 4Kainan mpfii Simon sateichii ngoukarou mei bah kikii mpougo pyii katoipii Judas Iskariot.

Keariisiinakhii mah tha

(Mrk 6.7-13; Luk 9.1-6)

5Keariisiinakhii aigo Jisunii aitiisii tam kakhatsii lang mpat takle: “Jehudimei kasu Lui kakimei mah sazyiiki mak-kii, Samariyamei mah namdi kitei liit sulo, 6nlenii Isrelmei mah maga kalei Jaonah mei datei tat tulo. 7Sateichii gonyiinii katat kak ‘Sating gam sazyii tei natakle’ sii tam ralipyiilo, 8sateichii katchii kanhiimeigo tii-mbipyiilo, kataimeigo tiimaringpyiilo, mpara tchiisii kalei meigo tiimatei pyiilo, sara kashyii hang go baatoi pyiilo. Gonyiinii matapii doutakle matapii pyiilo. 9Sona kado, sanah raguiba kado, sanah-gyii kado gonyii mah haikak kikii pung sulo; 10sateichii gonyii mah mbui tiitat jangpiinii takou paitu mak-kii, peijou hangna mak-kii pichot, mak-kii koktui kado pung sulo. Kadapokii tha katiimeinii ahmah chiitak tei doukajyiile.

11“Sateichii gonyiinii namki mak-kii namdi hangninii ki gongchii, gonyiinii tatliitsii gonyiigo lukainyii- sii kaleimei gotei fii wolo sateichii teibam kiteito gonyiinii tatpat kasuta teikito bamlo. 12Sateichii gonyiinii ki lung tat kaliit kak, ‘kamajung tei n-go kaswi matulo’ sii tamlo. 13Sateichii ki teinii gonyiigo lukai pyii leponii, gonyii mah kamajung tei ki teikito bam matulo; nlenii ki teinii gonyiigo lukai pyii suleponii, gonyiii mah kamajung tei gonyiida nlaigong matulo. 14Satei- chii mei kata kangkanii gonyiigo lukaipyii suleponii mak-kii gonyii samtei shiisei suleponii, teiki ki kiteito mak-kii namdi kiteito tat kapat kak, gonyii pi-pazhii ki buinei tei patamtoi ailo. 15Inii gonyii dakii kasangpii tam leile, samtak katii piinei namdi teigo teisungnii Sodom ninado Gomara go Saraanii kisii lungkasyii tei mangou tangle.

Gongkalei kaset kalak

(Mrk 13.9-13; Luk 21.12-17)

16“Julo, Inii gonyiigo Sanyii kak kikii Jaonah takumpii lang mpat leile. Teijangpii gonyiinii Sanhii takumpii sakailo, sateichii mahou takumpiinii lung manoilo. 17Mei dateito sakai wolo, kadapokii ahnyii- nii gonyiigo samtak katii kikii pyiitoi tangle sateichii ahnyii mah ndwibam hang kiteito gonyiigo dat tangle; 18sateichii ahnyii doito ninado Lui kakimei doito sakchyii pyiimatu tang karam jangpii Governor mei ninado sagongmei hang doito gujangpiinii gonyiigo chyii karhiitat tangle. 19Ahnyiinii gonyiigo pyiikatoi kak kada takumpii mak-kii kadapei tam tangposii gonyii lungnaang sulo, kadapokii kadapei tam tangpo katu tei teitinglang kinii gonyii dakii pyiitangle; 20kadapokii tam kalei tei gonyiinii makle, nlenii gonyii lung kito kalei go pfii mah rangii teinii tam leile.

21“Asanapiinii sanapiigo sateichii Pfiinii Nahgo taimatu tang karam jangpii pyiitoi tangle, sateichii nahmeinii Pwi Pfii pyiiryiikii mazhii supiinii ahnyiigo gimatu tangle. 22Sateichii gu zei jangpii gonyiigo meihangnii ngourou tangle, nlenii kalui katang tei leh kalumeigo keipyii tangle. 23Ahnyiinii gonyiigo namdi aikito kaset kalak kapyii tinglang kak; kaki hangniniiki pak galo; kadapokii Inii gonyii dakii kasangpii tam leile, meinah sapfii mpou teinii gong kasunakii gonyiinii Isrel mah nam hang kitei gong mashangpei wolakle.

24“Taikaswimei hangninanii ahgo Madhiikapyiipii sung dibui makle, sateichii ki kalei mei hangninanii Mpou-pumpii sung dibui makle. 25Taikaswimei hangninanii mpougo Madhiikapyiipii sateichii ki kaleimei hangninanii mpou mah ki pumpii takum takle leponii lung mangtang karamle. Ki pumgpii gotei Belzabul sii lat takleponii, mpouki kalung teito kaleimei hang goteinii teisung kisii zei kashyii kashyii tei lat tangle!

Tago hingtangpo

(Luk 12.2-7)

26“Teijangpii ahnyiigo hinguslo; kadapokii mati mangoulak tang karam gomnei kabam samah kado gale; sateichii tilak tang karam kamakum samah kado gale. 27Inii gonyii dakii kamyii kito katam tei gonyiinii kava kito tam mpatlo sateichii gonyiinii gonyii khoi kito makumpii shiikalu tei ki kapouryii gam tu wosii saa mpatlo. 28Sateichii pumpotgo gi wosii rangiigo gipei wokalak ahnyii gotei hing sulo; nlenii rakot godo pumpot godo mibam kito tiimaga wokabui Ahgotei hinglo. 29Nkinah hangnago peisa hangninii jangpii joimakpo? Sateichii ahnyii hang kak kito hangninii kado gonyii Pfii mah kamaning kamazhii tei haisupiinanii sazyii takmang lakle. 30Nlenii go phyiitaam hang katang- piido pak fiibam takle. 31Teijangpii hingsulo, gonyiinii Nkinah hang sungdo mai-ting kile.

Tam ka mpat ninado Kristago mazhiikasu

(Luk 12.8, 9)

32“Teijangpii meihang doito n-gu mazhii katumei hang gotei Iniido sating gamto kalei Gu pfii doito ahgo mazhiipyii tangle. 33Nlenii meihang doito n-gu mazhii kasumei gotei Iniido sating gamto kalei gu Pfii doito mazhiipyii lakle.

Kamajung makle nlenii saryiikhangle

(Luk 12.51-53; 14.26-27)

34“Inii sazyii pouryiikii kamajung pung gongziilesii maning sulo; Inii kamajung pung gonglesii gong makle, nlenii saryiikhang hangninii pung gong leile. 35Kadapokii nah sapfiimei teinii ahnyii Pfiimeigo, nah sapwimei teinii ahnyii Pwimeigo, sateichii nah-noumei teinii ahnyii hneimeigo mazhii matulak tang ka- ram jangpii Inii gongle. 36Sateichii mei hangninii mah ngou karoumei teinii mpouki kalung mpung mah mei tei tangle.

37“N-gu sung Pfiigo mak-kii pwigo kisii lungkasyii ah teinii gutai kaswimei tiitang karam akajyii- makle, sateichii n-gu sung nah sapfii mpougo mak-kii nah sapwi mpeigo kisii lungkasyii ah teinii gutai kaswimei tiitang karam akajyii- makle. 38Sateichii Ah-mah krosh poimatusii gutai swikasu ah teinii gutai kaswimei tiitang karam akajyiimakle. 39Karing dousii kalei ah teinii teitei maga tangle sateichii gujangpiinii karing maga kalei ah teinii teitei doutangle.

Jisutai kaswimei mah alangh

(Mrk 9.41)

40“Gonyiigo lukakai mei teinii n-gu lukaile, sateichii n-gu lukakai mei teinii n-gu lang kamagong ah go lukaile. 41Lungkakalingmei hangni- niigo Lungkakalingmei lesii lukakai mei teinii lungkakalingmei hangninii mah alangh tei doutangle; sateichii kasang kamajyiimei hangniniigo kasang kamajyiimei lesii lukakaimei teinii kasang kamajyiimei hangninii mah alhang tei doutangle. 42Satei- chii kacheng aihang kak kito mei hangninii dakii gu boumei hangninii katii jangpii mei kata kangkanii dwikung peek-kii katangdo pyiile- ponii, Inii gonyii dakii tam leile, Ahmah lhang tei gasang galakle.”

Currently Selected:

METIU 10: NAG2

Highlight

Copy