LUK 6

Bam ntak piinei leimik karyii

(Met 12.1-8; Mrk 2.23-28)

1Bam ntak piinei leimik Jisunii lu sumto tatpatle, teito mpou bou- mei teinii rhiibui tei keksii bah lungkii manuisii chiitu takle. 2Teito kabijai katiimei kangkanii tamle, “Bam ntak piinei leimik nyii jaiting- shangnii tiisulo katu ai gonyiinii kadajangpii tiileipo?”

3Jisunii ahnyiigo khekalatle, “Devit ninado mpoumah mei teinii, moi mazyii kalei kak kadapei tiipo katu gonyiinii fiimakde? 4Mpounii Saraa kilung tei liitsii Saraa go pyiitoi kalei tiirok tei poisii chiile sateichii mpoumah mei hang goteido pyiile, nlenii teimah tiirok tei chii katu ai nyiimah Ajaitingshangnii mazhii makle.”

5Sateichii Mpounii ahnyii dakii tamle, “Meinah Sapfii Mpou teinii bam ntak piinei leimik mah Bangpiile.”

Bah lamkii tai kaleimei hangninii

(Met 12.9-14; Mrk 3.1-6)

6Sateichii kaki bam ntak piinei leimik hangniniiki aitiisii pat takle, katunii mpounii Jehudimei mah Ndwiki lung tei liitsii ralipyiile, sateichii teito bah ajiilam pang tai kaleimei hangninii leile. 7Sateichii ajaitingshang kati ojamei ninado kabijai katiimei teinii mpoumah kama fiisii, bam ntak piinei leimik mpounii katii kanhiimeigo tii tii mbipyii lakposii mbeisii jusii leile. 8Sateichii mpounii ahnyii mah lungswi tei tiwosii, bah hangninii tai kaleipii gotei tamle, “Gungkhii sat tolo, sateichii aiki sumto satlo,” teito mpounii gungtu satto takle. 9Teito Jisunii ahnyii dakii tamle, “Inii gonyiigo n-nhii leile, Bam ntak piinei leimik kabi katii mak-kii tiikamaga ai kadapii katii teinii bipo?” 10Sateichii mpounii ahnyiihang-go ju maguisii mpou dakii tamle, “Go-bah ntaalo” teito mpounii bah ntaapat sek-kii, mpou bah tei bitakle.

11Nlenii ahnyiinii rakarhiipii tokryiisii Jisu gamkii dapei tiichii bitangposii karashiitu takle.

Jisunii mpou boumei keariisiinakhiigo kalai kalu

(Met 10.1-4; Mrk 3.13-19)

12Teitinglangki Jisunii riita tang karam jangpii zang hangniniiki tatpi takle, sateichii mpounii tinghum matang Saraa go riitale. 13Sateichii tingtang sek-kii Jisunii mpou bou- meigo mpouda lat magongsii, ahnyii kakto keariisiinakhii go kalai mpat takle, sateichii ahnyiigo tiilamlwi kapyiimei sii zeido takpyii takle; 14ahnyii teinii: (mpounii Pitarsii kalat) Simon, sateichii mpoutai karhiipii Andru, Jems sateichii Jon, Filip sateichii Bartholomio, 15Metiu sateichii Thomas, Alfaiyas nah sapfii mpou Jems sateichii (Pwi sazyii jang- pii saryii katiipii sii kalat) Simon, 16Jems nah sapfii mpou Judas ninado ngoukaroumei bah kikii schoi choikai kapyiipii Judas Iskariot teile.

Jisunii rali kapyii sateichii tii mbi kapyii

(Met 4.23-25)

17Sateichii mpounii ahnyiigo kaswisii zang gamto tat humsii sazyii kathamkhang kito sat takle. Satei- chii Judiya kito, Jerosalem kito, Tair ninado Sidon dwijai kuto kalei Namdi hang kito mpou sam shiitang karam jangpii sateichii ahnyii mah katii kanhii hangtei tii mbipyii matu tang karam jangpii, meihangkii gong- takle. 18Sateichii sara kashyiinii kaswi kalei mei hang go tii mbipyii takle. 19Sateichii meihang teinii mpougo denglesii fiile, dapochiinii mpou dato teimaham patsii meihang mah ra katii kanhii hangtei tii mbipyiile.

Ka-nta ninado kamage

(Met 5.1-12)

20Sateichii Jisunii Mpou boumei dakii rajang matusii tamle:

“Mah kagamei doibile;

dapochiinii Saraa mah Sating Sazyii tei gonyii mahle.

21“Aitoi moi mazyiisii kaleimei, gonyii doibile;

dapochiinii gonyiigo tiitokryii pyiitangle.

“Aitoi hatsii kalei mei, doibile;

dapochiinii gonyiinii nuitangle.

22“Meinah sapfii mpou jangpii gonyiigo ngou karou, pak katoi, chyii ka n-gi sateichii gonyii jai shyiilesii pak ka-mpat tinglang kak, gonyii doibile! 23Teitinglang kak ntasii soklo, dapochiinii julo, sating gamto gonyii lhang dile; dapochiinii ai takumpii ahnyii peipao meinii Lungkakalingmei dakii tiitakle.

24“Nlenii mah kanimei gonyii kadaziikapii kamage tangpo!

Kadapochiinii gonyiinii kasamou hangtei doutakle.

25“Aitoi tokryiisii kaleimei gonyii kadaziikapii kamage tangpo!

Dapochiinii gonyiinii moi mazyii tangle.

“Aitoi nuisii kalei mei gonyii kadaziikapii kamage tangpo!

Dapochiinii gonyiinii madaksii hat tangle.

26“Meihangnii tam mbisii kaleimei gonyii kadaziikapii kamage tangpo! Dapochiinii ai takumpiinii ahnyii peipao meinii kasang kasu lungkakaling meigo tiibamle.

Ngou karoumeigo lungkasyii

(Met 5.38-48; 7.12a)

27“Nlenii shiisii kalei gonyii dakii Inii tam leile, Gonyiigo ngou karou- meigo lungsyiilo; gonyiigo mashyii makasii kalei meigo kabi tha tii- pyiilo. 28Gonyiigo sheengsii kaleimei go satoi pyiilo, sateichii gonyiigo adjyiirou kasumei jangpii riita kai- pyiilo. 29N-go mei kata hangninanii beeng lamkii kaphyii leponii, beeng lamkii teido ahgo leh pyiilo. Sateichii mei kata hangninanii gopeiba sao lepochiinii, go peijou katang piiniido ahgo poi malulo. 30Godato mah kata kakhangmei hang gotei pyiilo. Sateichii godato poi kalu mah tei nangnii khang kalei sulo. 31Sateichii mei kakimeinii gonyii dakii tiisei matu kanyii takumpii gonyiiniido ahnyii dakii teitakumpii tiipyiilo.

32“Gonyiigo lungkasyii meigo roinii gonyiinii lungsyii lepochiinii, gonyiinii dajangpii satoi doutangpo? Kadapochiinii kem kama katiimei teiniido ahnyiigo lungkasyiimei gotei lungsyiile. 33Sateichii gonyiigo kabi katiimei dakii roinii gonyiinii kabi tei tiipyii lepochiinii, gonyiinii kada- jangpii satoi doutangpo? Kadapo- chiinii kem kama katiimei teiniido teiteinii tiileile. 34Sateichii gonyiinii poi kaleiwo builesii maning kamalum meigo roinii mah matii lepochiinii, Kadajangpii gonyiinii satoi dou- tangpo? Kadapochiinii kem kama katiimei katangpii kem kama katiimeigo mah matii leile mai njoisii poi kaleiwo kabui jangpii. 35Nlenii gonyiigo ngou karoumei hang go lungsyiilo, sateichii kabi tiilo, sateichii matiilo, douloi tang karam jangpii maning sulo. Kadaponii gonyii lhang tei ditangle, sateichii sagoi kaki Saraa nah tei gonyiinii tiitangle; kadapochiinii tiikapyii mai tikasu kashyiimei godo mpounii lukai pyiile. 36Gonyii pfiinii lungsyii kati takumpii gonyiido lungsyii tilo.

Meigo samtak katii

(Met 7.24-27)

37“Meigo samtak tiisulo, sateichii Saraanii gonyii go samtak tiilakle. Meigo kama kikii lwikai sulo; sateichii Saraanii gonyiigo kama kikii lwikai pyii lakle. Kaleipyiilo, sateichii Saraanii gonyiigo kaleipyii tangle. 38Pyiilo sateichii gonyiigo pyiitangle, katokryii, kamadhii katha katumsii, ka-nlem teipii golakang gamkii kaipyii tangle; dapochiinii nangnii mei jangpii madhii kapyii bah teipiinii n-godo Saraanii madhii- pyii loikai tangle.”

39Sateichii mpounii ahnyii dakii ndasam hangninii aitiisii tamle, “Mik kachetmei hangninanii mik kachetmei hangniniigo majangtat-to buipo? Ahnei hangna siirungki takliit lakpo? 40boumei hangninanii Madhiikapyiipii sung dibui makle, nlenii nahmei hangteinii madhiisang takle sekchii Madiikapyiipii takum tangle. 41Sateichii gomik ki kahong kara kabam tei tisupiinii, gosanapii mik ki kara kabam tei kadatiisii nangnii juleipo? 42Go mik ki kahong kara kabam tei ngousupiinii, kada takumpiinii gosanapiigo, gusanapii, go mik kito kalei kara tei poitoi pyii lesii tamwo tangpo? He Kabijai katii- mei, Nangnii karei reisangki gomik kito kalei kahong kara tei poitoilo, teitii lepochiinii nangnii gosanapii mik kito kalei kara tei poitoi pyiitang karam jangpii mateisii ngou tangle.

Riitibang sateichii mpouti

(Met 7.16-20; 12.33-35)

43“Kadapochiinii riitibang kabi teinii riiti kashyii mati leimakle, sateichii riitibang kashyii teinii riiti kabi mati leimakle. 44Riitibang hang gotei kamati ati teipiinii tiwo leile. Dapochiinii Tiiratbang gamto gonyii- nii kadiit-ti rikai leimakle; sateichii atu kapung riingumbang kito gonyiinii Darkhati rikai leimakle. 45Mei kabimei teinii kabi tei poi mpatle, mpou lung kito kalei kabi tei, sateichii kashyiimei teinii kashyii poi mpatle, mpou lung kito kalei kashyii tei, kadapokii lungto tokryiisii kalei hangtei mwinii tam mpat leile.

Ki katiimei hangna mah ndasam

(Met 7.24-27)

46“Inii gonyiigo katam tei tiisupiinii kadajangpii gonyiinii n-gu Bangpii, Bangpii sii lat leipo? 47Mei kata hangninanii guda gong wosii sateichii gusamtam shii kalu sateichii teihang gotei majai kalumei ai kadago reipo katu Inii gonyiigo mangou tangle. 48Mpou teinii sazyii rai mathoksii kuitu kadi hangninii phyiiryiikii bangmaa sumsii ki tii kalumei hangninii takumle. Sateichii dwidi gongle, sateichii ki gotei dwi kadi teinii rot takle. Nlenii ki tei nlaipei lakle, dapochiinii ki tei tiigatpii tiibamle. 49Nlenii mei kata hangninanii gu samtei shii wosii teigotei majai kasumei teinii bang- maa tiisupii rangrhii phyiiryiikii ki tiimatu kabam mei hangninii takumle. Kadaponii karyii dwi kadi teinii ki gotei rot sek-kii binasek-kii koutakle; sateichii ki tei mah kakou tei kadaziikapii tiimashyii takle.”

Currently Selected:

LUK 6: NAG2

Highlight

Copy