THA 22
22
Jehudimei dakii Polnii katam sam
1“Kangsanamei ninado Apfii- meihang, Inii aitoi gonyii dakii dangtang karam sam katam ai shii seilo.” 2Sateichii mpounii ahnyii dakii Hebrumei latpii tam kalei tei ahnyiinii shii wosek-kii, kisii malhii supiinii bam takle. Teito mpounii tamle,
3“I-Silisiya kito kalei Tarsas kito lung kalu Jehudimei sapfiimei hang- niniile, nlenii namdi aikito Gamaliel kangto makot makhiile, nyiipei nyiipaomei mah ajaitingshang tei tiigatpii kajumtai swisii ralikhiile, sateichii gonyiihangnii tingnei tii- kalei takumpiinii, Iniido Saraa dakii gulung pyiitoi kalei meile. 4Sateichii sapfiimei godo sapwimei godo ringpei wosii kabang kikii poiliit kaisii, Inii aitiisii ahnyiigo katai katang tei ahnyiigo tiikamage pyiile. 5Ai kaang ki aito kanat kajum Tingditupiinado katingmei samtak katiimei hang- niido n-gu sakchyiile. Ahnyii dato Inii kangsanamei dakii pyiitang karam larek tei dou wosii Damaskas kito lung kaleimei ahnyii godo tiikamagepyii tang karam jangpii sateichii rengpei wosii Jerosalem ki katang pang gong tang karam jangpii Inii teiki maale.
Polnii mpoumah lungkakali sam katam
6“Sateichii Inii aitiisii tatsii tatsanii Damaskas ki manang gong sek-kii, aitiisii pat takle, leimik tingna maruikii, binasek-kii Inii kasat guku hangteikii sating gamto kava kadi hangninanii vapyii takle. 7Teito I-sazyii koumang takle, sateichii rok hangninanii gudakii ‘Sol, Sol nangnii n-gu kadajangpii tiikamage leipo’ sii katam tei Inii shiitakle. 8Teito Inii khekalatle, ‘nang tapo, Bangpii?’ Teito mpounii gudakii tamle, ‘nangnii tiikamagesii kalei Nazaret ki Jisu tei I-le.’ 9Sateichii n-gu kaswisii tat kaleimei teinii kava teinii ngoule, nlenii gudakii tam kalei ah rok teinii ah- nyiinii shiimakle. 10Teito Inii tamle, ‘Inii kadapei tiitangpo, Bangpii?’ Teito Bangpiinii gudakii tamle, ‘Gungtusii Damaskas kitei liitlo, sateichii teiki teito nangnii tiitang karam jangpii ada tiikabam tha hang mah kaang kiteito godakii tampyii tangle.’ 11Sateichii teimah vakabi jangteipii Inii mik ngou wokalak kito n-gu kaswi kaleimeinii gubahto jumsii aitiisii Damaskas ki gong wotakle.
12“Sateichii teibam kito kalei Jehudimei hangnii kahi kalei, ajai tingshang taiswisii Saraago kama- lum mei Ananiyas sii lat kalei sapfiimei hangninanii guda gongsii, 13Gudato satsii n-gu tamle, ‘Kang- sanapii Sol, nangnii mik ngouloi wolo,’ sateichii teitinglang sek-kii Inii ngou wosanii mpougo jumakhiile. 14Teito mpounii tamle, Nyiipei nyii- paomei mah Saraa teinii n-go mpoumah kamaning tikabui, kasang kamajyiipii gotei ngoumatu tang karam sateichii mpou mwi kito mpou roktei shii matutang karam jangpii kalai mpatpyii takle; 15Kadapokii nangnii ngoukalu ninado shii kalu- hang tei meihang doito sakchyii tiitangle. 16Sateichii aitoi nang kadajangpii koileipo? Gungtu sat wolo, Bangpii zeigo latsii dwi mpum wolo sateichii gokem hangtei shyii mateilo.
Bangpiinii Polgo Jerosalem ki gong sulosii katam
17“Inii Jerosalemki nlaigongsii, Saraa kamaning kilungto riitasii kalei kak, n-gu madhangpyiisii, 18‘kalanglo, Jerosalem kito kalangsii tatpat tolo, kadapochiinii gu kaang kito katam karali gomah sakchyii tei ahnyiinii lukaipyii laklesii gudakii katam mpounii mangoule.’ 19Teito Inii tamle, ‘Bangpii ahnyiinii tile, Inii Jehudimei mah ndwini hang kito n-go kamalum meihang go kabang kikado jumkaile sateichii lakdo lakle. 20Sateichii gomah sakchyii katiipii Stifan mah zai kapat tinglang kak, gupum sekpiiniido akuto satdo satsii mazhiido mazhii kapyii ninado mpougo kagimei hang mah peimani tei koisii leile.’ 21Sateichii mpounii gudakii tamle, ‘tatpat tolo, kadaponii Inii n-go aikito dhiisii lui kakimei hang dakii lang mpat tangle.’ ”
22Sateichii ahnyiinii mpou sam ai aikatang shiitakle; teito ahnyiinii rok sagoisii tamle, “Ai kakum meigo sazyii pouryiito girang ailo!” kadaponii mpou ring kajyii makle. 23Sateichii ahnyiinii saado saasii, saasii, peimanido kajatsii sateichii sating gamkii buineido marou makhiitu sek-kii, 24Romki mei thang phyiiryiito kadipii teinii mpou phyiiryiikii ahnyiinii aitiiziikii saasii kalei kaangtei titang karam jangpii mpougo datsanii kachyiinhii tang karam jangpii mwija pyiisanii mpougo sakuiki pangliit kai ailosii mwija pyii aitakle. 25Sateichii ahnyiinii mpougo rengpii pei aisek-kii, Polnii mpou dato sat kalei saryiimei mei hai phyiiryiito apum katiipii dakii tamle, “Rom meigo samtak tiisupiinii kalak kathai ai gonyii mah ajaide?”
26Teito mei hai phyiiryiito apum katiipii teinii teitei shii wosek-kii, mpounii saryiimei mei thang mah apum katii kadipiida maasii tam takle, “Nang dapei tiilesii bam takpo? Kadaponii mei aipou ai Rom meile.”
27Sateichii saryiimei mei thang mah apum katiipii teinii gongsii mpou dakii tamle, “Gudakii tamlo, nang Rom meide?” Teito mpounii tamle, “Nle,”
28Teito mei thang mah apum katiipii teinii khekalatle, “Sana hangkii pyiisii Inii Rom mei ai tiiwole.”
29Sateichii Polnii tamle, Nlenii Inii Rom mei hangninii tiisii lung m-mangle. Teijangpiinii mpougo n-nhii tang karam meihang teinii teisek-kii mpou dato dhiisii tat tutakle, Rom meile katu tei tiwo sek-kii, mpounii mpougo reng pei kalei jangpii hingtakle.
Samtak katii katingmei doito Polnii kasat
30Nlenii supounei tei Jehudimei hangnii mpougo dapeijangpii tam mashyii leipo katu kasang tei mpounii tinyiisanii, mpougo mpat pyiitakle, sateichii kanat kanhii kajum tingdimei hang samtak katii katingmei hang go gong ndwilosii mwija pyiisanii Polgo pang humsii ahnyii doikii masat takle.
Currently Selected:
THA 22: NAG2
Highlight
Share
Copy

Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.