MARKA 16

Jisua thoinôkna thu

(Mt 28.1-8; Lk 24.1-12; Joh 20.1-10)

1Sabat nî a hong hekin Magdala mi Mari, Jakoba nu Mari, Salomi hai khan, Jisua ruak pol hrangin sahriak mirimhoi an irchôka. 2Pathianni zînga misa suak hnungin thâna an va fea. 3Lampuia an fe laiin, “Thân bâia lung kha tu mo nir hlumpai pe hrang tâk?” an irti lai takin. 4Lung lian tak a nia, an hong tanga lung kha irhlum saiin an hmu tâka. 5Thân sûnga an lûta, ruatharte inkhat puan chek sil chang tianga toi an hmua, an chi tâka. 6Khanchu, ama khan an kuang, “Lunginzîng no roi, Nazaret Jisua, an ihembe kha, nin izong ni a ta, hin om ta mah, a thoi nôk ta; en u ta, an inzâlna hi. 7Atûn chu fe unglân, a irchutirhai le Petera kuang khan, nangni a ihril tâk ang khan Galili-a fe masa a ta, kha khan hmu nin ti, tiin va hril roi,” a tia.#Mt 26.32; Mk 14.28 8Khanchu, thân ata kha an suaka, beidong le chi pumin an intân pat ta. An chi hrai sikin tûte kuang insîr mahai.

Magdala mi Mari kuang Jisua an lâr

(Mt 28.9-10; Joh 20.11-18)

[ 9Khan, Pathianni zînga a thoinôka khan, Magdala mi Mari a phîng sûnga irthokin ramilhli sari a inhnot suakpai penu kuang a masa takin an lâra. 10Mari khan Jisua chanpuihai a va hrila. Irngaiinsia le chapin an lei oma; 11Mari’n, “Jisua a hring nôka, hmu khom ki hmu lele,” a ti pehaia; an inhriat khomin taksôn mahai.

Irchutir inhni kuang Jisua an lâr

(Lk 24.13-35)

12Kha hnungin, Jisua kha hmêl danglam irputin mi inhni an ram tiang an fe laiin an kuang an lâr nôka. 13Khan, an hong kîra irchutir danghai an hong inhrila, khannisian tak lei sôn mahai.

Irchutir sômhleikhathai kuang an lâr

(Mt 28.16-20; Lk 24.36-49; Joh 20.19-23; Tîr 1.6-8)

14A hnungkhôn taka chu irchutir sômhleikhathai bu an nêk lai takin an kuang an lâr nôka. A thoinôk hnunga a hmuhai chong taksôn loiin an milung an inngar sik le iamna reng an nei no sikin, a halirchuhaia. 15Jisua’n an kuang, “Rammual pumpuia fe unglân, thil siam murdihai kuang Thurchi Sa hi insîr roi.#Tîr 1.8 16Tukhom a iama, baptisma chang chu saninhringin om an ta. A iam loihai chu thiamno changin om an ti. 17A iamhai chu sinirkhêl sintheina irtha ipêk ni an ta; ki’rhmingin ramilhli inhnot suak an ta, chong tharin chong an ti. 18Mirûlhai an kutin chel an ta, thina tûr i ang khom in an ta, ite ti no ni; damloihai chunga an kut irnghat an ta, dam thiai an ti,” a tia.

Jisua irvâna a kâi thu

(Lk 24.50-53; Tîr 1.9-11)

19An kuang thu an sîr zoiin chu, Rengpa Jisua kha irvâna ihruaiin a om tâka, Pathian chang tiang a hong toi tâka. #Tîr 1.9-11 20Irchutirhai khom kha an fe suaka, hmun tina thu an insîr tâka, Rengpa khomin a thophaia, an thu’nsîr kha a dik tiin le an sinirkhêl tho khom an det pehai thiaia. Amen.]#16.9-20: Kut ziak senkhata chu archang 9-20 hi om ma.

Currently Selected:

MARKA 16: HRACLBSI

Highlight

Copy