MARKA 13
13
Tempil insiat hrang thu Jisua’n an sîr
(Mt 24.1-2; Lk 21.5-6)
1Khan, Jisua Tempila irthokin a suak laiin a irchutirhai laia inkhatin a kuang, “Irchutirtu en ta! A lunghai hi a lianin, a in sinhai hi a sa bâka!” a tia. 2Jisua’n a kuang, “Hi in lianhai hi ni hmu mo? Hi lunghai hi inchim ni a ta inkhat lua khom a omna hmuna hin mâksan ni no ni,” a tia.
Buaina le dengintheina
(Mt 24.3-14; Lk 21.7-19)
3Tempil irdîn, Oliv tânga Jisua a toi laiin Petera, Jakoba, Johana le Andria hai khan inrûkin thu an irdona; 4“Kha kha itika mo a hong iom hrang, khahai murdi hong tung hranga khan irsinsiana thilirkhêl i imo, a hong om hrang? Nin hril ta,” an tia. 5Jisua’n an kuang, “Tûte’n nangni an huang nona hrangin irdîn roi. 6Mi tamtakin, ‘Krista ki ni,’ tiin ki’rhming sâmin hong an ta, mi tamtakhai huang an ti. 7Khan nâi tenga irdoi irhu mani, hla viata irdoi thurchi mani, nin inhriat tika khom buai no roi, khahai kha chu a hong iom ngêt hrang a ni, khannisian zoro hnungkhôn chu la ni no ni. 8Nam le nam la’rdoi an ta; ram le ram la’rdoi an ti. Hmun tina hnîngnu lan hnîng a ta, châm la tâk a ti. Kha kha nâihase irphut ang kha ni a ti.
9“Nangni chu irdîn roi; ichel la ni nin ta, roirêltuhai kuang hruaiin la om nin ti. Sinagoka zêm phiar ni nin ta, anni Thurchi Sa nin insîr pe theina hrangin ki’rhming sikin roirêltuhai le rênghai makunga la ngîr nin ti.#Mt 10.17-20; Lk 12.11-12 10Zoro hnungkhôn a hong tung mân Thurchi Sa hi mi murdi kuang insîrin a iom bak ngêt hrang a ni.
11“Ichelin nin oma, roirêl hmuna hruaiin nin om tikin, nin iti hrang lei insâpin nin milung lei inbuai no roi; a zoro taka nin inhriat tak kha ti roi; nin iti kha nangni chong ni no nia, Irtha Irthiang chong ni a ti. 12Urêng khomin that hrangin a sangpa lan cheltir an ta, pa khomin a nâihai lan cheltir sa a ta, nâihai khomin an nu le pahai doi an ta, that an ti. 13Keima sikin mi tinin nangni la hnôl an ti. Khannisianlân, tukhom a mong dêna tuang diarhai ka chu saninhringin om an ti.#Mt 10.22
Intakna ichiom tak
(Mt 24.15-28; Lk 21.20-24)
14“Intakna ichiom tak kha a ngîr nona hranga a ngîr la hmu nin ti, (a teppu dôrin a omzia inhre ri se) kha tika chu Judai rama omhai kha tânga laizâm tho ri sehai.#Dan 9.27; 11.31; 12.11 15In chunga om khomin chumin a in sûnga neinun zu la no ri sehai.#Lk 17.31 16Loia om khomin a puan la hrangin in sûnga kîr no ri se. 17Nupang nâi vonghai le nâite pom laihai hrangin chu, kha nikhua hai kha nikho ichiom tak ni a ti. 18Khahai kha phalbia a tung nona hrangin chongchai roi. 19Kha nikhuahaia intakna kha chu Pathianin rammual a siam phut ata a vuan tena rammualin a lei inhriat ngai murdi nêka irkhêl ual tak chu a ni hrang sikin. Khaanga kha chu itiklai khom om nôk viat ta no ni.#Dan 12.1; Thup 7.14 20Rengpa’n kha nikhuahai kha inbong no sian mihriam tûte dam suak no nihai; a mi inthanghai sikin a inbong a ni.
21“Kha zoro tika chu, tukhomin nin kuang, ‘En u ta, Krista chu hi hi te,’ mani, ‘En u ta, so so mani,’ an ti khomin taksôn no roi. 22Krista dol le deipu dol an la suak hrang sikin, Pathian mi irthianghai ten khom an theiin chu an huang theina hrangin sin irkhêlhai le thilirkhêlhai khom tho an ti. 23Nangni chu irdîn roi! A zoro a tung mân itinrêng nangni ki lei hril diam ta a ni.
Mihriam Nâipa zuang hrang thu
(Mt 24.29-31; Lk 21.25-28)
24“Kha intakna zoro a theng zoi hnunga nikhuahaia khan chu misa hong inthim a ta, tha khom vâr ta no ni.#Isa 13.10; Ezek 32.7; Joel 2.10,31; 3.15; Thup 6.12 25Irvân ata ârsihai tâk a ta, irvân sinthotheinahai khom inhnîngtir ni a ti.#Isa 34.4; Joel 2.10; Thup 6.13 26Kha zoi tikin chu Mihriam Nâipa hi a sinthotheina irkhêl tak le roiinpui takin sûm laia zuang ta a ti.#Dan 7.13; Thup 1.7 27Kha tikin chu kôlkung ata kiang tianga kôlkung dêna rammual kil minli sûng ata Pathian mi inthanghai bûm hrangin vântîrtônhai tîr suak a ti.
Theipui kunga irchu hrang
(Mt 24.32-35; Lk 21.29-33)
28“Khanchu, theipui kung om lam ata irchu roi, a ôn a hong irnoia, a hna a hong incherin chu kholum anâi tah ti nin inhriat ngai. 29Khaang dênin nangni khomin ama kha a hong tung nin hmu tikin chu ama kha a hong nâi tâka, mikot renga a om tah ti inhre roi. 30Khan, khahai murdi kha a tung mâka chu atûnlai mihai hi la boi irman no nihai, ti inhre mai roi. 31Irnêng le irvân boi a ta, ki chong chu boi no ni.
A zoro le nikhua tûte’n inhre mahai
(Mt 24.36-44)
32“Khannisianlân, kha nikhua le a zoro chu Pa ti no chu tûte’n inhre mahai, irvâna vântîrtônhai khomin, Nâipa khomin.#Mt 24.36 33Irdîn unglân, irtûng chianin om roi, kha zoro kha nin inhriat no sikin. 34Mi, ram danga an zin hrangin a suakhai kuang an sintum chit mophurtira, mikot nghâktu khom irtûng chiana om hrangin hril baka fe pat tâk ang hi a ni.#Lk 12.36-38 35Khasikin irtûng chianin om roi, in chongpu hong hrang zoro kha khohloia mani, zâna mani, âr khuanga mani, zînga mani, a ini hrang nin inhriat no sikin. 36Kha ni’n chu voikhat rengin hong tung lik a ta, a inin nangni a hmu itinin. 37Nin laia ki iti hi mi tin tin kuang ki iti a ni, irtûng chianin om roi!” a tia.
Currently Selected:
MARKA 13: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
