MARKA 11

Jisua’n roiinpui taka Jerusalem a lûtna thu

(Mt 21.1-11; Lk 19.28-40; Joh 12.12-19)

1Khan Jerusalem khua an tung tônin, Bethfage le Bethani kho kôl Oliv tâng an hong tungin, a irchutirhai laia mi inhni a tîra, 2an kuang, “Nin maton khuaa son fe unglân, nin tungin chu sakuartungte irkhit, tûte la chuang ngai loina va hmu nin ti. Kha kha sût unglân, hin hong kai roi. 3Khan, tukhomin, ‘Kha kha ithoa mo nin ikai?’ tiin nangni an irdonin chu, ‘Rengpa’n a izong kêng, hong inthaktir nôk zôi a ti,’ ti roi,” a tia. 4Khanchu an fe tâka, sakuartung te, mikot kôla irthung, pên tiang mikot kôla ngîr kha, an va hmua, an sût tâka.

5Khataka ngîrhaiin, “Ithoa mo sakuartung te kha nin isût?” an ti pehaia. 6Jisua’n a ihril pehai lam ang takin an sâma, khanchu an ife an phal tâka. 7Sakuartungte kha Jisua kuang an hong kaia, a chunga an puanhai an dâp zoiin chu, Jisua kha a chuang tâka. 8Mi tamtakin lampuia an puanhai an dâpa, mi dangin loia sôlhna sâtin an dâp saa. 9Khanchu a mân tianga fehai le a hnunga zuipuhai khan,

“Hosana! Rengpa irhminga zuang chu inpâkin om ri se;#Ipn 118.25-26

10Ram zuang tung hrang ei pa Davida ram chu inpâkin om ri se;

Anchungtaka khin Hosana,”

tiin an khêka.

11Khan, Jerusalem a tungin chu Tempila a lûta, thil tinrêng a en vêla. Khannisianlân khohloi a lei ni tâk sikin a irchutir sômhleihnihai leh Bethani-a an fe tâka.

Jisua’n theipui kung khua a sâlna

(Mt 21.18-19)

12Zîng nôka chu Bethani rengata an hong kîr nôkin, Jisua kha a phîng a châm pea. 13Khan, theipui kung hna nei hla vit ata a hei hmua, “A ra mo ki hmu ro rôi,” tiin a va pana; khanisianlân, a va tungin chu a hna ti no chu ite va hmu maka; a ra zoro a ni no sikin. 14Jisua’n theipui kung kuanga khan, “Atûn ata chu tûte’n ni ra fa ta no ri sehai,” a ti pea. A irchutirhai khomin kha chong kha an inhriat.

Jisua’n Tempil a’rthiangtir thu

(Mt 21.12-17; Lk 19.45-48; Joh 2.13-22)

15Khan, Jerusalem an tungin chu Jisua Tempila a va lûta, Tempila neinun zuartuhai le irchôkpuhai kha a’rzûlpaihaia. Sum thûltuhai maichâm le phervali zuartuhai toihmun khom a nam inrîlpai pehaia. 16Khan, tukhomin Pathian Tempila neinun an ichôi khom phal ta mah. 17Khanchu, an kuang, “ ‘Ki in chu nam tin ta hranga chongchaina in ti an tih,’ ti irziak a ini loi ma ni? Nangni rêkin chu inruhai chêng inbualna’n nin isiam hi,” tiin a’rchuhaia.#Isa 56.7; Jer 7.11 18Khan Ochai inlalhai le Dân irchutirtuhaiin kha kha an inhriatin, an that theina hrang lampui an zonga. Ama kha a sân an chia, asan chu mipuihai khan ar chutirna kha ar khêl an ti zap sikin. 19Khan, khohloi rikipin Jisua le a irchutirhai kha khopui ata an fe suak ngai.

Theipui kung ata irchu hrang

(Mt 21.20-22)

20A tûk zînga chu lampui kha an hong hro’n theipui kung kha a’rzung dêna thêmin an hmu tâka. 21Khanchu, Petera’n a hong inhriat suak nôka, a kuang, “Irchutirtu, en ta, theipui kung khua ni isâl kha a thêm ving ta,” a tia. 22Jisua’n a kuang, “Pathian iam roi. 23A diktakin nangni ki hril, tukhom hi Oliv tâng hi irsonin lân, so tuikhangliana zu irpai roh, ti sianlân, lungrîla lunghla viat loiin a ihril kha tung ngêt a ti, iamtuhai ka chu an ihril ang takin hmu an ti.#Mt 17.20; 1 Kor 13.2 24Khasikin nangni ki ti, itinrêng chongchaia nin inghi ka chu hmu sai angin irbe unglân, khanchu, hmu nin ti. 25Khan, chongchai hranga nin ngîr rikipa, tu chunga khom nuarna nin nei khomin ngaidam roi, nin pa irvâna mi khomin nin inchâinahai nangni a ngaidam theina hrangin.#Mt 6.14-15 26Khannisianlân, nin ngaidam no’n chu nin pa irvâna mi khomin nangni ngaidam ual no ni,” tiin a hril pehaia.

Jisua Irchamneina an irdonna thu

(Mt 21.23-27; Lk 20.1-8)

27Khan, Jerusalem an tung nôka, Tempila a lêng laiin Ochai inlalhai, Dân irchutirtuhai le upahai kha Jisua kuang an honga, 28“Tu irchamin mo hihai hi ni itho? Hi thilhai hi tho hrangin tu’n mo ircham nang a ipêk?” tiin an irdona. 29Jisua’n, “Kei khomin chongbâi khat nangni irdon ki ta, ni don unglân, khanchu, tu irchamin mo hi thilhai hi ki itho nangni hril ki ti. 30Johana’n baptisma a itho theina ircham kha, Pathian ata mo, mihriam ata mo? ni sâm roi,” a tia. 31Khanchu, an bingin an irsêla, “Imo ei iti hrang tâk? ‘Pathian rengata’ ei ti lakin te, itho sika mo a chong nin iiam loi? ni ti a ta. 32‘Mihriam rengata’ mo ti ih?” an tia. Khannisianlân, mipuihai kha an chia, asan chu, mi murdi’n Johana kha deipu’n an lei pom sikin. 33Khasikin, “Inhre ma ung,” tiin Jisua kha an sâma. Khan Jisua’n, “Kei khomin tu irchamin mo hi thilhai hi ki itho, nangni hril ual no ning,” tiin a sâmhaia.

Currently Selected:

MARKA 11: HRACLBSI

Highlight

Copy