MATHAIA 7

Mi dang sêl chungchâng

(Lk 6.37-38,41-42)

1“Mi sêl no roi, isêla nin om nona hrangin. 2Nin isêl lam ang takin Pathianin nangni sêl a ta, mi chunga dân nin ihmang tak kha nin chunga khom hmang an ti.#Mk 4.24 3Ithoa mo mâni mita thingtum om chu inhre loiin ni urêng mita minim hlekte om kha ni ihmu? 4Itin mo ni mita thingtum om chianin ni urêng kuang, ‘Ni mita minim hlekte kha nang lei la pe rong,’ ni iti ngam dân? 5Nang vârirlet! ni mita thingtum kha pai bakin lân, khanchu, ni urêng mita minim hlekte om kha fel takin hmu thei ni ti.

6“Ui kuang chu thil irthiang pe no unglân, vok makunga khom nin lunghlu pai no roi; sirpol an ta, chîl insiat chit an ti.

Nghi, zong, intôk thu

(Lk 11.9-13)

7“Nghi roi, pêk ni nin ti; zong unglân, hmu nin ti; intôk unglân, inhong pe ni nin ti. 8A nghi murdi’n an hmu ngai, a zong murdi’n an hmu ngai; tukhom an tôk chu inhong pe ni a ti. 9A ni le, nangnihai laia tu mani, a nâipa’n bai nghi sianlân, tu mo lung pe hrang? 10Nga nghi sianlân, tu mo mirûl pe hrang? 11Khanchu, nangni mi sualhai luan nin nâihai thil sa pêkna châng nin inhriatin te, nin Pa irvâna mi khan a nghituhai kha thil sa a ipêk intam ual hrang mo ni ma!

12“Khanchu, thil i khom mi’n nin chunga an itho nin inuam hrang ang khan mi chunga khom tho ngai roi; kha kha Dân le Deipuhai thu a lei ini chian a ni.#Lk 6.31

Mikot irchêp

(Lk 13.24)

13“Mikot irchêpa khan lût roi, irhmangna mikot chu a’rzata, a lam khom a hoia, kha lampuia fehai chu tamtak an ni. 14Hringna mikot chu a chîna, a lampui khom ar chêpa, a hmutuhai khom tômte an ni.

Thing sa chu a ra a sa

(Lk 6.43-44)

15“Deipu dolhai ata irdîn roi, khahai kha belra vun silin nin kuang an hong ngai; an sûng tiang chu inê ang an ni. 16Anni chu an sinthoa inhria nin ti. Ilhling kunga grep an irhmal ngai ma ni? Ilhling kunga khom theipui an ilâk ngai ma ni? 17Thing sa chu a ra a sa ngai, thing sia chu a ra sa thei ngai mah.#Mt 3.10; Lk 3.9 18Thing sa chu a ra siat ngai maka, thing saloi chu ra sa insua thei ngai mah. 19Thing tin ra saa raloi ka chu an phûra, meia an tua ngai. 20Khanchu, deipu dolhai chu an sinthoa inhriat nin ti.#Mt 12.33

Nangni inhre ngai ma ung

(Lk 13.25-27)

21“‘Rengpa, Rengpa,’ ni ti narânhai chu irvân Rama lût no nihaia, ka Pa irvâna mi nuamlam thotuhai kêng an ilût hrang. 22Kha nikhuaa khan mi tamtakin, ‘Rengpa, Rengpa! Ni’rhmingin thu kin insîra, ni’rhmingin ramilhlihai kin inhnot suak ngai, ni’rhmingin sinirkhêlhai kin itho ngai loi ma ni?’ la ti an ti. 23Kha zoiin chu, ‘Nangni thil sual thotuhaio, nangni inhre ngai ma ung, ki kuang ata rot pat roi,’ tiin la hrilhai ki ti.#Ipn 6.8

In sintu inhni

(Lk 6.47-49)

24“Khanchu, hi ki thu hi inhriata, zôm murdi chu mi vâr, lungpui chunga in sintu leh irkhek rua a ni. 25Rua a hong thoa, tuihai a hong liana, phâivua a hong thoa, kha in kha a hong nam rak raka, khannisianlân, chim ma, lungpui chunga sin indet khak a ni sikin. 26“Hi ki thu hi inhriata zôm loihai chu mi’nvêt, bâli chunga in sintu leh irkhek rua a ni. 27Rua a hong thoa, tuihai a hong liana, phâivua hai a hong thoa, kha in kha a hong nam rak raka, a chim tâka, a inrîl rup zôi a ni,” a tia.

Jisua irchamneina

28Jisua’n kha thu kha an sir zoiin chu mipuihaiin a thu irchutir kha a sân ar khêl an ti.#Mk 1.22; Lk 4.32 29Dân irchutirtuhai ang ni loia ircham nei taka ar chutirhai sikin.

Currently Selected:

MATHAIA 7: HRACLBSI

Highlight

Copy