MATHAIA 10

Irchutir sômhleihnihai

(Mk 3.13-19; Lk 6.12-16)

1Jisua’n a irchutir sômhleihnihai kha a koihaia, ramilhlihai inhnot suak theina le damloi chi tinrêng le natna chi tinrêng indam theina sinthotheina a pêkhaia.

2Tirtôn sômhleihnihai irhming chu hihai hi an ni; a masa taka Simon (Petera an iti) le a sangpa Andria; Zebedaia nâipa Jakoba le a sangpa Johana; 3Filipa le Bartholomaia; Thoma le khâzana irfuangtu Mathaia; Alfaia nâipa Jakoba le Thadaia; 4Kanaan mi Simona le an cheltirtu Juda Iskariota hai an ni.

Sômhleihnihai tho hrang

(Mk 6.7-13; Lk 9.1-6)

5Kha sômhleihnihai kha Jisua’n a tîr suakhaia, an kuang hiang hin chong a bê. “Jentailhai rama le Samari mihai khuaa chu fe no roi. 6Israel nam belra irhmanghai kuang nin ife hrang a ni. 7‘Fe unglân, Irvân Ram chu anâi ta,’ ti thu van sîr roi!#Lk 10.4-12 8Damloihai indam unglân, mithihai kaithoi unglân, phârhai irthiangtirhai unglân, ramilhlihai inhnot suak roi. Manboiin nin mana, manboi ngêtin pe roi. 9Nin zêpa rângachak poisa mani, sum mani, sumsen mani, chôi no roi; 10inzinna hrangin hmarsa mani, songkol irthuam mani, kekok irthuam mani, khianghrol irthuam mani chôi no roi. Sinthotu chu a innanghai kha pêk ni a ti.#1 Kor 9.14; 1 Tim 5.18

11“Kho liana mani, kho chîna mani nin lûtin nangni intung nuam hrang mi zong unglân, kha hmun kha nin mâk nôk mâka chu kha ina khan om mai roi. 12In sûng nin lûtin chu ‘Irtharngamna nin chunga om ri se,’ ti roi. 13Kha ina mihai khan nangni an lei lômin chu nin irtharngamna chubai kha an chunga tung ri se; khannisian, nangni an lei lôm no’n chu nin chubai chong kha la kîr nôk roi. 14Khan, kho khua khom nangni an pom noa, nin chong an irngai no’n chu marak unglân, nin ke bop kha nûlpai roi.#Tîr 13.51 15Thudik nangni ki hril, Roirêl nikhuaa chu kha khuahai tuang hrang nêkin chu Sodom le Gomora khuahai tuang hrang chu a zâi om ual a ti.#Irp 19.24-28; Mt 11.24

Dengintheina hong tung hrang thu

(Mk 13.9-13; Lk 21.12-17)

16“Irngai u ta! Inê kâra belra lût angin nangni ki itîr a ni. Mirûl anga vârin, vasu anga nunirnêmin om roi.#Lk 10.3 17Aniachu irdîn roi, nangni chela, Sanhedrin-ah nangni intunga, an sinagokhaia nangni zêm an ti.#Mk 13.9-11; Lk 12.11-12; 21.12-15 18Keima sikin hruaituhai le rênghai makunga la ngîr nin ti, anni leh Jentailhai chu Thurchi Sa nin insîr pehai theina hrangin. 19Nin chungthu ngaitua hranga nangni an hruai tikin nin ti hrang lei insâpin nin milung inbuai no roi; a zoro a hong tungin inhriattir nih nin ti. 20Nin iti hranghai kha nangni iti ni no nia, nin Pa Irtha khan nangni ti pe ti.

21“Urêng khomin that hrangin a urêngpa lan cheltir a ta, pa khomin a nâihai lan cheltir sa ta, nâihai khomin an nu le pahai doi an ta, that an ti.#Mk 13.12; Lk 21.16 22Keima sikin mi tinin nangni la hnôl an ti. Khannisian tukhom a mong dêna tuang diar ka chu saninhringin om a ti.#Mt 24.9,13; Mk 13.13; Lk 21.17 23Khua inkhat ata an nuam nuamin nangni an lo’n chu, kho danga rot pat roi. Thudik nangni ki hril, Mihriam Nâipa a zuang mân Israel ram kho murdia nin sintho zoi no chin ni.

24“Irchulai chu ar chutirtu nêkin lian ual ma, suak khom a pu nêkin lian ual mah.#Lk 6.40; Joh 13.16; 15.20 25Khasikin irchulai kha ar chutirtu angin a hong iom le, suak khom a pu anga a hong iom kha a ruk. In chongpu lua Belzebula an ti’n te, a in sûng mihai len vâng chu ti nok ual an ti!#Mt 9.34; 12.24; Mk 3.22; Lk 11.15

Tu mo chi rua

(Lk 12.2-7)

26“Khasikin mihriamhai kha chi no roi. Tinrêng inlang loi hranga ithup om maka, inhriatloi hranga thup ite om sa no ni.#Mk 4.22; Lk 9.17 27Inthima nangni ki ihril hi sûn khovâra insîr unglân, inrûka nin inhriat hi in chunga chuangin tânginsampui roi.

28Taksa thata irtha that theiloihai chu chi no unglân, hremhmuna nin taksa le irtha that theitu Pathian kha chi ual roi. 29Chongzong inhni poisa khatin nin irchôk thei, khannisian, an laia inkhat lua nin Pa thu ni no’n chu irnênga ta no ni. 30Nangni chu nin samzâi ten lua tep zit a ini kêng. 31Khasikin chi no roi, chongzong tamtak nêkin chu nin hlu ual kêng! a tia.

Krista thop le hnôl

(Lk 12.8-9)

32“Tukhom mihai makunga ni thop ka chu kei khomin ka Pa irvâna om makunga thop ki ti. 33Khannisianlân, tukhom vântâng inhriata ni hnôl chu ka Pa irvâna mi makunga hnôl ki ti.#2 Tim 2.12

Irngeina ni loiin, khandai inlêng hrang thu

(Lk 12.51-53; 14.26-27)

34“Rammuala hin irngeina inlêng hranga zuang ni sôn no roi. Irngeina inlêng hranga zuang ni ma unga, khandai inlêng hranga zuang kêng ki ini. 35Nâipa’n a pa doi a ta, nâinu’n a nu, moiin a tarpi indoitir hranga zuang kêng ki ini.#Mik 7.6 36Mi a râl hrang chu a in sûngkua mihai ngêt ni an ti. 37Tukhom keima nêka a nu mani, a pa mani lungthung ual chu, ki irchutir rua ni mah. 38Tukhom a kros irputa ni zui no chu ki irchutir rua ni mah.#Mt 16.24; Mk 8.34; Lk 9.23 39Tukhom mâni hringna sûnghual an tumin chu inchân an ta, keima sika an hringna inchân chu hmu an ti.#Mt 16.25; Mk 8.35; Lk 9.24; 17.33; Joh 12.25

Lômmanhai

(Mk 9.41)

40“Tukhom nangni lôm chu, a ni lôm an ni; tukhom a ni lôm chu a ni tîrtu lôm an ni.#Mk 9.37; Lk 9.48; 10.16; Joh 13.20 41Tukhom Pathian tirtôn kha Pathian tirtôn a nina sika lei lôm chu Pathian tirtôn lômman hmu a ti. Tukhom mi fel chu mi fel a nina sika lôm chu mi fel lômman hmu a ti. 42Tukhom ki irchutirhai laia a chîn tak khom ki irchutir a nina sika tui dâi khilât khat khom lei pêk chu nangni ki hril, lômman hmu ngêt a ti,” a tia.

Currently Selected:

MATHAIA 10: HRACLBSI

Highlight

Copy