LUKA 9

Jisua’n irchutir sômhleihni a tîr suakna thu

(Mt 10.5-15; Mk 6.7-13)

1Jisua’n irchutir sômhleihnihai kha a koi bûmhaia, an kuang, ramilhli inhnot suak theina le natnahai indam theina sinthotheina le irchamneina a pêka. 2Khanchu, Pathian Ram thu’nsîr hrang le damloi indam hrangin a tîr suakhai tâka.

3An kuang khan, “Inzinna hrangin khianghrol, hmarsa, bai, sum, songkol a’rthuamin chôi no roi, a ti pehaia.#Lk 10.4-11 4Nangni an lei lômna in taka khan om chian roi, kha khua kha nin mâk nôk mâka chu. 5Nangni an lei ingaisak loina khua chu, nin suaksan hrang tika an dikloizia inhriatirna hrangin nin kezaphaa vâiphin kha nûlpai roi,” a ti pehaia.#Tîr 13.51

6Khanchu, an suak tâka, kho tin an irfanga, hmun tina Thurchi Sa hrilin mihai an indam thiaia.

Heroda char a dong

(Mt 14.1-12; Mk 6.14-29)

7Khan, Galili-a rêng Heroda’n, thil omzia an hriatin a buai tâka. Senkhatin, “Johana kha mithi lai ata a ithoi nôk tâk kêng,” an tia.#Mt 16.14; Mk 8.28; Lk 9.19 8Senkhatin, “Elija a zuang inlâr nôk ta kêng,” an tia; senkhatin, “Tianlaia deipu tu mo khat a zuang ithoi nôk ta kêng,” an ti sika khan, a’rngaina lam chang inhre maka. 9Heroda khan, “Johana kha a lu ki itanpai tâk kha! A thurchi hiang dôra irkhêl ki inhriat hi tu mo a ini tâk?” a tia. Jisua kha hmu a tum tâka.

Mi sângringa a vâina thu

(Mt 14.13-21; Mk 6.30-44; Joh 6.1-14)

10Khan, tirtônhai an hong kîr nôkin chu an sinthohai Jisua kuang an hrila. Khan, a kuang a hruaihaia, Bethsaida khuaa an bingin a fe puihaia. 11Mipuiin an inhriatin chu an zuia, a lei lômhaia, Pathian Ram thu a hrila, indam innang ka chu an damhaia.

12Khan, khohloi a hong ni’n chu, irchutir sômhleihnihai an honga, a kuang, “Mipuihai hi infetirhai ta roh, kho sûnga le a kôl vêlhaia hin bu le riak hmun an hmu theina hrangin, ei omna lak hi hmun ramchâra om kêng ei ini,” an tia. 13Khan Jisua’n an kuang, “Nangni’n fâkrua pehai roi,” a ti pehaia. Anni’n “Bai ringa le nga inhni vai kêng kin inei. 14Hiang dôra mipui sângringa fâk hrang, kin va irchôk hrang ma ni?” tiin an sâma. Khan a irchutirhai kuang, “Mipuihai hi a buk bukin sômringa chitin intoitirhai roi,” a tia.

15Khanchu, irchutirhaiin a chong bê angin an intoihai tâka. 16Khan, Jisua’n bai ringa le nga inhni kha a lâka, irvân enin Pathian kuang lômthu an sîra, a khoia, khanchu mipuihai kuang sem hrangin a irchutirhai a pêk tâka. 17Khanchu, an rêngin an khop do dôrin an fâk hnungin, an fâk ban, khamphulu sômhleihni irchutirhaiin an la hrût insip a ni.

Petera’n Jisua nina a phuang

(Mt 16.13-19; Mk 8.27-29)

18Voikhat chu Jisua’n a bingin a chongchaia, a irchutirhai an honga, an kuang, “Mipuihaiin tu mo a ni, an ni ti ngai?” tiin ar donhaia. 19Senkhatin, “Baptistu Johana, senkhatin Elija, senkhatin tiana deipu tu khôk mani, a izuang nôk nang an ti ngai,” tiin an sâma.#Mt 14.1-2; Mk 6.14-15; Lk 9.7-8 20Khante, “Nangni’n teh tu mo nin ni ti?” tiin ar donhaia, Petera’n, “Pathian Mesia ni ni,” tiin a sâma.#Joh 6.68-69

Jisua’n a tuang hrang le a thi hrang thu an sîr

(Mt 16.20-28; Mk 8.30—9.1)

21Khan, Jisua’n hi thu hi tûte kuang insîr loi hrangin thu a pêka. 22An kuang, “Mihriam Nâipa hi upahai, Ochai inlalhai, Dân irchutirtuhaiin, hnôl an ta, dengintheitir an ta, that an ti, khan, sûn thum hnunga chu hringin thoi nôk a ti,” a tia.

23Khan, an rênga kuang, “Tukhomin ni zui a nuamin chu, mâni intakna uksak loiin, a nitin a kros irputin ni zui ri se.#Mt 10.38; Lk 14.27 24Tukhom mâni hringna inzôk nuam chu inchân a ta, Tukhom keima sika a hringna inchân murdi’n zôk an ti.#Mt 10.39; Lk 17.33; Joh 12.25 25Mi’n rammual hi a pumin nei sianlân, ama khan siatpuiin irhmangpui sian, a ta hrangin imo ar fêna? 26Ki thu le keima nin zakpui ka chu Mihriam Nâipa khomin a roiinpuina le, Pa le vântîrtôn irthianghai roiinpuina le, a zuang tika anni kha lan zakpui a ti. 27Dik takin nangni ki hril, hitaka ngîr senkhathai hi Pathian Ram an hmu mâka chu thiloi hrang an om,” a tia.

Jisua hmêl danglamna

(Mt 17.1-8; Mk 9.2-8)

28Kha thu an sîr zoi ata sûn riat vêl anga chu, Petera, Johana, Jakoba hai hruaiin chongchai hrangin tânga an fea.#2 Pet 1.17-18 29Khaanga a chongchai laiin a hmêl inlang dân kha a hong danglam tâka, a puanhai kha a vâr irtêk tâka. 30Irningloiin mi inhni an zuanga, an chongpuia. Mosia le Elija an ni. 31Irvân roiinpuina’n an zuang inlâra, Pathian tumna sua hranga, Jerusalema a thi hrang chungchâng thu Jisua leh an insîr a ni.

32Petera le a rualhai chu an lei ina, an hong harin chu Jisua roiinpuina le a kuanga mi inhni ngîr an hmua. 33Mihai khan Jisua an mâksan tôn chu, Petera’n a kuang, “Irchutirtu, hitaka om hi ei ta hrangin a sa, kairêng inthum sin ki ta, nangma ta hrang inkhat, Mosia ta hrang inkhat, Elija ta hrang inkhat,” a tia, (kha thu kha imo a iti khom a inhriat infel loi a ni.) 34A la chong lai takin sûmin a zuang irhlihaia, sûmin a zuang irhlihaiin chu irchutirhai kha an chia. 35Sûm ata kha hnuk irhai a zuang suaka, “Ama hi ki Nâipa, ki inthang chu a ni; Ama thu hi irngai roi,” tiin.#Isa 42.1; Mt 3.17; 12.18; Mk 1.11; Lk 3.22 36Hnuk irhai a zuang suak zoiin chu Jisua vai an hmua. Irchutirhai khan an thil hmuhai tûte hril loiin an ip chiana.

Jisua’n ramilhli ichel nâipang a indamna

(Mt 17.14-18; Mk 9.14-27)

37Zîng nôka tâng ata Jisua le a irchutir inthumhai an zuangin chu mipui tamtakin Jisua kha an lei nghâka. 38Mipui laia pa inkhat chu a khêk suaka, “Irchutirtu, ki nâipa inkhat neisun kha hong en hrangin nang ki ngên a ni; 39ramilhli’n a chela, a khêk raka, an rîla, a bâia a khasuai zung chupin a soisaka, thi hrang ang dôrin a rotsan ngai. 40Ni irchutirhai hi inhnot suak hranga ki ngên lakin tho thei mahai,” a tia. 41Jisua’n “Iamna nei loi, mi pualoihaio, idôr ten mo nin kuang ki omin nangni ki ingaitua hrang? Ni nâipa kha hin hong hruai roh,” a tia. 42Khan, nâipang kha a hongin chu, ramilhli khan irnênga an zuan raka, an rîl ta. Jisua’n ramilhli kha thu a pêka, nâipang kha an damtira, a pa kuang a pêk ta. 43Pathian sintho roiinpuizia chu ar khêl an ti tak taka.

Jisua’n a thina hrang thu a lei insîr nôkna

(Mt 17.22-23; Mk 9.30-32)

Jisua’n sintho mihaiin ar khêl an la ti laiin, a irchutirhai kuang, 44“Nangni ki ihril hrang hi irnghil no roi, Mihriam Nâipa hi mihriamhai kuta ipêk nih a ti,” a tia. 45Khan, irchutirhai lakin a omzia inhre thei mahaia. An inhriat thei nona hranga thu irthup a nia, ama lak an chi sikin irdon ngam mahai.

Tu mo roiinpui tak?

(Mt 18.1-5; Mk 9.33-37)

46Khan, irchutirhai khan tu mo ei laia a roiinpui tak hrang, tiin an irsêla.#Lk 9.37-38 47Jisua’n an milung inchong an hriata, nâipangte a kaia, an kôla an ngîrtira. 48An kuang, “Tukhom hi nâipangte hi ki’rhming sika lôm chu, keima ni lôm a ni; keima ni lôm chu, a ni tîrtu lôm an ni. Nin laia a chîn tak hi a roiinpui tak a ni,” a tia.#Mt 10.40; Lk 10.16; Joh 13.20

Nangni doi loi ka chu nin tianga kop an ni

(Mk 9.38-40)

49Khan, Johana khan ama kha a chongpuia, “Irchutirtu, mi inkhatin ni’rhmingin ramilhli an hnotsuak kin hmua, keini angin nang a zui no sikin khap kin lei itum kêng,” a tia. 50Jisua’n a kuang, “Khap no roi, nangni doi loi ka chu nin tianga kop a ni,” a tia.

Samari khua mihaiin Jisua an hnôl

51Jisua, irvân a kâi hrang nî a hong nâiin chu, Jerusalema fe ngêt hrangin milung an chonga. 52A maton tiang thanginthei hrangin mi a tîra, a ta hranga tinrêng lei irfûktir hrangin Samari khua inkhata an lûta. 53Khan Jerusalema fe a nih ti an inhriat sikin lei lôm mahaia. 54Khan, irchutir Jakoba le Johana’n an inhriatin chu a kuang, “Rengpa, hihai kâng zit hranga hin Elija angin irvân ata mei koi thâk hrangin ni nuam mo?” an tia.#2 Rng 1.9-16 55Khan, Jisua’n anni tiang irheiin a halhaia. 56Khanchu, kho danga an fe tâka.

Jisua zui tumhai

(Mt 8.19-22)

57Khan, lampuia an fe laiin, mi inkhatin Jisua kuang, “Ni fena tina nang zui ki ti,” a tia. 58Jisua’n a kuang, “Sihalhaiin khur an neia, vahaiin irbu an neia; khannisianlân, Mihriam Nâipa chu a lu irnghatna hrang lua nei mah,” a ti pea. 59Khanchu, mi dang kuang, “Ni zui roh,” a ti pea. Khan, kha mi khan “Rengpa, fe ki ta, ka pa va irvûi bak ki ti,” a tia. 60Jisua’n a kuang, “Mithi’n anni mithi kha irvûi ri sehai; nang chu Pathian Ram thu hi va hril indarh ual roh,” a tia. 61Mi dangin a kuang, “Rengpa, nang zui ki ti, khan, ki in mihai chonghoiin ni van thâtir bak roh,” a tia.#1 Rng 19.20 62Jisua’n a kuang, “Tukhom âl kainaa kut irnghata, hnung tianga en chu Pathian Rama mi ni inruk ni mah,” a ti pea.

Currently Selected:

LUKA 9: HRACLBSI

Highlight

Copy