LUKA 4

Jisua’n thêmna a tong

(Mt 4.1-11; Mk 1.12-13)

1Jisua kha Irtha Irthiangin a sipa, Jordan dung ata a kîr nôka, Diabola inthêmin ramchâra a fe tâka. 2Khan Diabola’n sûn sômminli an thêma. Kha sûnga khan ite a fâk no sikin inhnunga chu a phîng a châm tâka.

3Diabola’n a kuang, “Pathian Nâi ni ni’n chu, hi lung hi bai inchangtir ro,” a tia. 4Jisua’n chu, “Bai ringotin chu mihriam hi an ihring hrang ni ma tih irziak a ni,” a tia.#Dhn 8.3 5Khanchu, Diabola’n a hong hruaia, mitkhap kâr vakin rammual pumpui an entira. 6A kuang, “Hi chunga irchamneinahai le roiinpuinahai hi nang pe ki ti; ki kuang ipêk an ni ta, ki inuampu tak kuang ki pêk thei. 7Chubai ni mûkin lân, a rêngin nang pe ki ti,” a tia. 8Jisua’n, “Rengpa ni Pathian chu chubai mûkin lân, Ama sin vai tho ro, tih irziak a ni,” tiin a sâma.#Dhn 6.13

9Khanchu, Diabola’n Jerusalema a hruaia, Tempil sîp irzuma a siaa, “Pathian Nâipa ni ni’n chu irchôm tha roh. 10‘Pathianin a vân vântîrtônhai nang indom hrangin zuang tîr a ti,’ ti irziak a ni.#Ipn 91.11 11An kutin nang indom an ta, ni ke khomin lung irfûi no chi ni,” a ti pea.#Ipn 91.12 12Jisua’n chu “Rengpa ni Pathian fia no roh,” ti irziak a ni, tiin a sâm nôka.#Dhn 6.16

13An thêmna hrang dôra an thêm zoiin chu, Diabola’n zoro’nchum danga hrangin a rotsan tâka.

Jisua’n Galili rama sintho a phut

(Mt 4.12-17; Mk 1.14-15)

14Khan, Jisua kha Irtha Irthiang sinthotheina neiin Galili rama a kîr nôka, kha ram sûnga khan a thurchi an thang tâka. 15An Sinagokhaia, mi ar chutir ngaia, mihai inpâkin a oma.

Nazaret Jisua ihnôlin a om

(Mt 13.53-58; Mk 6.1-6)

16A seilianna Nazaret khuaa a fea, Sabat ni’n chu a tho ngai lam angin Sinagoka a fea, Pathian Thubu tep hrangin a ngîra. 17Deipu Isaia lekhabu an pêka, lekha irzuat kha a phara, hi irziak omna hi a tepa.

18“Inrianghai kuang Thurchi Sa insîr hrangin a nin thang sikin,

Rengpa Irtha ki chunga a oma,

mi intânghai kuang zôkna thu inpuang hrangin a ni itîr a ni.

Mitchohai, mit vâr nôkna hrang le mi ihnuaisiahai zôkna hrangin. #Isa 61.1-2

19Rengpa’n a mihai an zôkna hrang zoro a hong intung tâk tih inpuang sa hrangin,”

ti hi.

20Khanchu, Jisua’n lekha kha an zuata, a dôntu a pêka, a toia, Sinagoka mi murdi’n an en chuta. 21Khan, an kuang, “Hi Pathian lekha thu hi a vuan hin nin mikuar inhriata a zuang tung ta,” tiin a hong insîr tâka. 22A chongbâi suak, lungkham thu insîrin, an lungrîl a tôna, ar khêl an tia, “Hi mi hi Josefa nâipa ni ma mo?” an tia.

23Khan, an kuang, “Nangni’n hi chongirkhek thu hi, Daktor, ni bingin indam irhlôm roh. ‘Kapernaum-ah ni sinthohai, kin lei inhriathai khom hi ni khua tiang khom hin sin ro,’ ni la ti ngêt nin ti,” a tia. 24Jisua’n, “Deipu chu mâni khuaa tûte’n lôm ngai mahai,” a ti pea.#Joh 4.44 25“Irngai u ta, hi hi a dik a ni, Elija zoro laiin Israel rama meithâi tamtak an oma, kum thum le tha ruk rua tho loiin a oma, a ram pumpui sûnga châmpui a tâka.#1 Rng 17.1 26Israel rama meithâi inkhat Sidon rama Zarefat kho mi kuang bana chu Elija kha tûte kuang itîr ni ma.#1 Rng 17.8-16 27Deipu Elisa zoro lai khomin Israel rama phâr tamtak an oma, khannisianlân, tûte dam loiin, Suria rama mi Naamana vai indamin a om,” a tia.#2 Rng 5.1-14

28Sinagoka mipuihai khan, a chong kha an inhriatin chu a sân an ning an mur. 29An thoia, an khua ata an kaisuaka, khan an khua omna tânga rôla namthâk hrangin an hruaia. 30Khannisianlân, mipui lai ata rel patin a rot tâka.

Ramilhli ichel indam

(Mk 1.21-28)

31Khanchu, Jisua Galili rama Kapernaum khuaa a fea. Sabat ni’n mihai ar chuhaia. 32Irchamnei takin ar chuhai sikin a sân an irngai ar khêl tâka.#Mt 7.28-29

33Sinagoka khan ramilhli irtha ichel a oma, inring takin a khêka. 34“O, Nazaret Jisua, imo ni lo hrang ni ni iti? Ni’rhmangtir hranga ni ihong ma ni? Nang kin hriat Pathian mi irthiang ni ni,” a tia. 35Jisua’n, “Dâihrekin lân a sûng ata hong suak roh,” a tia. Ramilhli khan irnênga an rîltir raka, innatir loiin a sûng ata a suak tâka. 36Khanchu, an rêngin ar khêl an tia. “Itina irchamnei ma ni? Irchamnei le sinthotheina neia ramilhli suak roi a tia, an isuak hi,” an irtia. 37Khanchu, kha rama khan hmun tina Jisua irhming an thang tâka.

Jisua’n mipui tamtak an damna thu

(Mt 8.14-17; Mk 1.29-34)

38Khan, Jisua Sinagok ata a suaka, Simona ina a fea, Simona tarpi a sân inkhur inrikin a oma, a ta hrangin Jisua a ngên pea. 39A kôla a va ngîra, an khur kha a hala, khanchu, a hong boi zôia, a thoia an sin a tho pehai tâka.

40Khanchu, misa a tâk hnungin, natna chi tinrênga damloihai a kuang an hong hruaia, an chung chita a kut pharin an damhai zita. 41Khan, “Pathian Nâipa ni ni,” tia khêkin ramilhlihai khom mihai sûng ata an suak tâka. Krista a ni tih an inhriat sikin. Jisua’n ramilhlihai kha chong hrang phalhai ma.

Sinagoka Jisua thu’nsîr

Mk 1.35-39)

42Khan, khua a vâr le chu khua ata fianriala a fea, mipuihaiin an zonga, an hmu’n chu, masanhai loia an kuang la om hrangin an ngêna. 43Khannisianlân, Jisua’n an kuang, “Pathian Ram Thurchi Sa kho tina insîr hrang piala tîr kêng ki ni,” a ti pehaia. 44Khanchu, Galili rama Sinagokhaia thu an sîr tâka.

Currently Selected:

LUKA 4: HRACLBSI

Highlight

Copy