IRPHUTNA 46

Jakoba-hai in sûng mi Aigupta an fena

1Khanchu Jakoba chu a inei murdi chôiin a suaka; Beerseba a tunga a pa Isaka Pathian kuanga khan irbôlna thil a’rhlana; 2khan Pathianin zâna a’rmang tiang Israel chu a chongpuia, “Jakob, Jakob,” a tia. Ama’n, “Hin ki om,” a tia. 3Khanchu Pathianin, “Keima hi ni pa Pathian chu ki ni. Aigupta rama fe chu chi viat no’n lân fe ro; khu hmuna khun irchi tam takin nang siam ki ti: 4Aigupta rama khom ni kuang om mai ki ta, hi rama hin nir chihai hong hruaisuak nôk ngêt ki ti. Khanchu Josefa khom ni thi nî dênin ni kuang om a ti,” a tia.

5Khanchu Jakoba chu Beerseba ata a suaka, a nâihaiin Faroa sakor hong tîra khan an pa Jakoba a dôngmahai le a tû a têhai leh an inchuangtirhaia; 6#Tîr 7.15 Khan, Jakoba le a’rchihai chu Kanaan rama an irchon neihai chôiin, Aigupta rama an tung tâka. 7a nâihai, a tuhai a nâinuhai, a tunuhai, an irchi pumin Aigupta ram chu a lûtpuihai tâk a ni.

8Hihai hi Israel irchi Aigupta rama lût Jakoba le a nâihai irhming chu a ni: Reubena Jakoba nâilutîr. 9Reubena nâihai chu Hanoka, Palua, Hezrona le Karmia-hai an ni. 10Simeona nâihai chu Jemuela, Jamina, Ohada, Jakina le Zohara Kanaan nupangnu le nâi Saula-hai hi an ni. 11Khan Levia nâihai chu Gersona, Kohatha, Meraria-hai an ni. 12Juda nâihai chu, Era, Onana, Sela, Pereza le Zera-hai an ni: Era le Onana chu Kanaan rama thi an ni ta. Pereza nâihai chu Hezrona le Hamula an ni. 13Isakara nâihai chu Tola, Pua, Jasuba le Simrona hai an ni. 14Zebulun nâihai chu Sereda, Elona le Jahleela hai an ni. 15Hihai murdi hi Leaii nâipa, a nâinu Dinaii le Padan-aram rama Jakoba a ineipuihai chu an ni: a nâi nupang le pasal, an rêngin sômthum inthum an ni.

16Khan Gada nâihai chu Zefona, Hagia, Sunia, Ezbona, Eria, Arodia le Arelia hai an ni. 17Asera nâihai chu Imna, Isva, Isvia le Beria le an farnu Seri. Khan Beria nâihai chu Hebera ke Malkiela-hai an ni. 18Hihai hi Zilpaii Labana nâinu Leaii kuanga a nâi pêkhai chu an ni, Jakoba a ineipui sômhleirukhai chu an ni.

19Khan Jakoba dôngma Rakili nâihai chu Josefa le Benjamina an ni. 20Khanchu Josefa’n Aigupta rama Manasea le Efraima a neia. Khahai kha chu On khuaa deipu Potifara nâinu Asenathi ineipuihai chu an ni. 21Benjamina nâihai chu, Bela, Bekera, Asbela, Gera, Naamana, Ehia, Rosa, Mupima, Hupima le Arda-hai an ni. 22Hihai hi Rakili’n Jakoba a ineipuihai chu an ni, an rêngin sômhlei minli an ni.

23Khan Dana nâi chu Husima a nia, 24Naftalia nâihai chu Jazeela, Gunia, Jezera, le Silema hai an ni. 25Hihai hi Bilhaii Labana nâinu Rakili a ipêk nâihai chu an ni, Jakoba a ineipuihai chu an rêngin mi sari an ni.

26Jakoba moihai tep loiin, Jakoba le Aigupta rama lût, ama irchia suak murdi chu an rêngin sômruk le kiruk an ni; 27#Tîr 7.14 Khan Josefa’n Aigupta rama a nâi nei chu inhni an ni. Jakoba in sûng mi Aigupta rama om chu sômsari an ni ta.

Jakoba-hai in sûng mi Aigupta rama om

28Jakoba’n Juda kha Gosen ram lei en hrangin Josefa kuang a lei tîr baka, khan Gosen rama an lûta, 29khan Josefa’n a sakor chu a’rsiamtirhaia; Gosen rama a pa don hrangin a fea, khanchu hmêlirhriatna neiin, Josefa’n a pa ringa a kut leh inkuapumin zoro sôttak a chapa. 30Khan Israela’n Josefa kuang khan, “A hring a dama ni la ioma, ni hmêl ki hmu nôk tâk sikin a thi khom ite irhroi ta ma ung, ki thi khomin a sa ta,” a tia. 31Khan Josefa’n a pa le a urênghai kuanga khan, atûn chu, “Faroa kuang hong fe ki ta, ki urênghai le ka pa in mihai ki kuang an zuang tung ta. 32Anni chu sa vâituhai an ni sikin, belra enkoltu an nia; an belra rualhai le an inei murdi an zuang chôi zit a ni,” tiin hong hril ki ti. 33Khanchu hiang hin hong ni a ti, Faroa’n nangni a koia, ‘Imo nin isin ual ngai? a tiin chu, 34nangni’n chu ni siahlohai hi kin irchibulhai ata irthokin atûn ten hin, sa vâi ngai kin ni’ ti unglân: khan kêng Gosen rama nangni a inomtir hrang,” a tia. Belra hrungtuhai hi chu Aigupta mihai intir tak ngai a ni.

Currently Selected:

IRPHUTNA 46: HRACLBSI

Highlight

Copy